ଆଠମଲ୍ଲିକ – ମଧ୍ୟାହ୍ନ ଭୋଜନ ଖାଇ ୨୪ ଛାତ୍ରୀ ଗୁରୁତର ହୋଇଥିବା ଜଣା ପଡ଼ିଛି । ଅନୁଗୋଳ ଜିଲ୍ଲାର ଅଙ୍ଗପଡା ଆଦିବାସୀ ଛାତ୍ରୀ ନିବାସର ଛାତ୍ରୀ ଅସୁସ୍ଥ ହୋଇ ଡାକ୍ତରଖାନାରେ ଭର୍ତ୍ତି ହୋଇଛନ୍ତି । ପ୍ରଧାନ ଶିକ୍ଷକ ରୋହିତ କୁମାର ପ୍ରଧାନଙ୍କ କହିବା ମୁତାବକ ଛାତ୍ରୀ ନିବାସର ଛାତ୍ରୀମାନେ ଏମ୍.ଇ. ସ୍କୁଲକୁ ମଧ୍ୟାହ୍ନ ଭୋଜନ କରିବାକୁ ଯାଇଥିଲେ । ହଷ୍ଟେଲକୁ ଆସିବା ପରେ କିଛି ଛାତ୍ରୀଙ୍କ ମୁଣ୍ଡ ବୁଲାଇ ବାନ୍ତି ହେଇଥିଲା । ପରେ ପରେ ଆଉ କିଛି ଛାତ୍ରୀ ମାନଙ୍କୁ ବାନ୍ତି ହେବାରୁ ମେଡିକାଲରେ ଭର୍ତ୍ତି କରାଯାଇଛି । ମିଳିଥିବା ସୁଚନା ମୁତାବକ ଦିଆଯାଇଥିବା ଅଣ୍ଡାରୁ ଏକ ଟ୍ରେର ଅଣ୍ଡା ପଚା ଥିଲା ବୋଲି ଛାତ୍ରୀ ମାନେ ଅଭିଯୋଗ କରିଛନ୍ତି । ଯାହାକୁ ଖାଇ ଫୁଡପଏଜନ ହୋଇଥିବା ଅନୁମାନ କରାଯାଉଛି । ଅସୁସ୍ଥ ସମସ୍ତ ଛାତ୍ରୀଙ୍କୁ କିଶୋରନଗର ମେଡିକାଲରେ ଭର୍ତ୍ତି କରାଯାଇଛି ।