ତାଳଚେର – ଅନୁଗୁଳ ଜିଲ୍ଲା ତାଳଚେର ପୁଲିସ ୪ ଡ଼କାୟତଙ୍କୁ ଗିରଫ କରିଛି  । ଏହି ଚାରିଜଣ ଡକାୟତଙ୍କୁ ପୁଲିସ ଗିରଫ କରିବାସହ ତାଙ୍କଠାରୁ ୨୧ହଜାର ଟଙ୍କା , ଗୋଟିଏ ଭୁଜାଲି ଓ କାତି ଜବତ କରିଛି । ସୂଚନା ଅନୁସାରେ ନୃସିଂହ ଜେନା ନାମକ ଜଣେ ବ୍ୟବସାୟୀ ୧୫ ତାରିଖ ଭୋର ୩ ଟା ବେଳେ ବାଲିପଟ୍ଟା ଅଞ୍ଚଳରୁ ଏକ ପିକଅପ ଭ୍ୟାନରେ ଦୁଇଜଣ ସାଥୀଙ୍କ ସହ ତାଳଚେର ଥର୍ମାଲ ସାପ୍ତାହିକ ହାଟକୁ ପରିବା କିଣିବା ପାଇଁ ଆସୁଥିଲେ । ସେହି ସମୟରେ କଣ୍ଢାଳ ନିକଟ ତାରିଣୀ ମନ୍ଦିର ପାଖରେ ୬ ଜଣ ଯୁବକ ମୋଟରସାଇକେଲରେ ଆସି ତାଙ୍କ ଭ୍ୟାନକୁ ଅଟକାଇବା ସହ ଭୁଜାଲି ଓ କାତି ଦେଖାଇ ନୃସିଂହ ଓ ତାଙ୍କ ସାଥୀଙ୍କ ଠାରୁ ୭୯ ହଜାର ୨୦୦ ଟଙ୍କା ଲୁଟକରି  ଫେରାର ହୋଇଯାଇଥିଲେ । ଅଭିଯୋଗ ପାଇଲା ପରେ ତାଳଚେର ପୋଲିସ ବିଭିନ୍ନ ଜାଗାରେ ଚଡାଉ କରି ଅଭିଯୁକ୍ତ ତାଳଚେର ବାଘୁଆବୋଲ ଅଞ୍ଚଳର ସତ୍ୟଜିତ ନାଏକ , ଆନନ୍ଦ  ନାଏକ ,ଏବଂ ଢେଙ୍କାନାଳର ବବୁଲ ବେହେରା, ଏବଂ ଚନ୍ଦନ ପାତ୍ରଙ୍କୁ  ଗିରଫ କରିବା ସହ ତାଙ୍କଠାରୁ ନଗଦ ୨୧ ହଜାର ଟଙ୍କା ସହ ଗୋଟିଏ ଭୁଜାଲି ଓ କାତି ଜବତ କରିଛି ।