ଅନୁଗୁଳ – ସରକାରୀ ସେବାର ଡିଜିଟାଇଜେସନ୍ ଦିଗରେ ଆଉ ଏକ ପଦକ୍ଷେପ ଗ୍ରହଣ କରି ଅନୁଗୁଳ ଜିଲ୍ଲା ପ୍ରଶାସନ ଜିଲ୍ଲାରେ ଇ-ପରମିସନ୍ ମଡ୍ୟୁଲ୍ ଆରମ୍ଭ କରିଛି । ଯାହା ଜନସାଧାରଣଙ୍କ ପାଇଁ ବିବାହ କାର୍ଯ୍ୟ, ବ୍ରତଘର , ଅନ୍ତ୍ୟେଷ୍ଟିକ୍ରିୟା ଏବଂ ଜରୁରୀକାଳୀନ ଗତିବିଧି ପାଇଁ ଡିଜିଟାଲ୍ ଅନୁମତି ପ୍ରଦାନ କରିବ । 5T ଇନିସିଏଟିଭ୍ ଅଧୀନରେ ଅନୁଗୁଳ ଜିଲ୍ଲା ପ୍ରଶାସନ ଆଜି www.angulcms.com ର ଅଂଶ ଭାବରେ ମଡ୍ୟୁଲ୍ ଲଞ୍ଚ କରିଛି ।

କାରୋନା ମହାମାରୀ ସମୟରେ ସାମାଜିକ ଦୂରତା ରକ୍ଷା କରିବା , ଅଧିକ ଭିଡ ନକରିବା ଏବଂ ସରକାରୀ କାର୍ଯ୍ୟାଳୟରେ ଭିଡ ଏଡ଼ାଇବା ପାଇଁ ଏହି ଯୋଜନା କରା ଯାଇଛି । ଅନଲାଇନ୍ ଜରିଆରେ ଲୋକମାନେ ବର୍ତ୍ତମାନ ବିବାହ, ବ୍ରତଘର , ଅନ୍ତ୍ୟେଷ୍ଟିକ୍ରିୟା ଏବଂ ଜରୁରୀକାଳୀନ ଗତିବିଧି ପାଇଁ ଆବେଦନ କରିପାରିବେ । ଜରୁରୀକାଳୀନ ଭ୍ରମଣ ଅନୁମତି ପାଇଁ ସଂପୃକ୍ତ ସରକାରୀ କାର୍ଯ୍ୟାଳୟକୁ ନ ଯାଇ ଏହି ୱେବସାଇଟ ଜରିଆରେ ଅନୁମତି ପାତ୍ର ପାଇ ପାରିବେ । ଏହା ଏପରି ଭାବରେ ଡିଜାଇନ୍ ହୋଇଛି ଯେ ସମସ୍ତ ଆବଶ୍ୟକୀୟ ସୂଚନା ୱେବସାଇଟ୍ ମାଧ୍ୟମରେ ପ୍ରଦାନ କରାଯାଇପାରିବ ।

ବିବାହ ପାଇଁ ବର ଏବଂ କନ୍ୟାଙ୍କର ପ୍ରମାଣପତ୍ର ଏବଂ ଫଟୋ ଅପଲୋଡ କରି ବୟସ ତଦାରଖ କରିବା ପରେ ହିଁ ଅନୁମତି ପତ୍ର ଦିଆଯାଇ ପାରିବ । ଏଥିସହ ରାଜ୍ୟ ସରକାରଙ୍କ ଦ୍ଵାରା ଜାରି କରାଯାଇଥିବା କୋଭିଡ୍ -୧୯ ଗାଇଡଲାଇନ ଅନୁଯାୟୀ ଏହି ମଡ୍ୟୁଲ୍ ଡିଜାଇନ୍ କରାଯାଇଛି । ଯଦି ଆବଶ୍ୟକ ହୁଏ, ସେହି ଅନୁଯାୟୀ ମଡ୍ୟୁଲ୍ ସଂଶୋଧିତ ହେବ । ଅଧିକାରୀମାନେ ଆବେଦନକାରୀଙ୍କ ଦ୍ଵାରା ଦିଆଯାଇଥିବା ବିବରଣୀ ଯାଞ୍ଚ କରିବେ ଏବଂ ସେହି ଅନୁଯାୟୀ ଅନୁମୋଦନ କିମ୍ବା ଅଗ୍ରାହ୍ୟ କରିବେ । ୱେବସାଇଟରେ ଅନୁମୋଦନ ମଧ୍ୟ ଉପଲବ୍ଧ ହେବ ଯାହା ଆବେଦନକାରୀମାନେ ସେମାନଙ୍କ ମୋବାଇଲ୍ ନମ୍ବର ଏବଂ ୟୁନିକ୍ ଆଇଡି ବ୍ୟବହାର କରି ପିଡ଼ିଏଫ ଫର୍ମାଟରେ ଡାଉନଲୋଡ୍ କରିପାରିବେ । ଅନ୍ତ୍ୟେଷ୍ଟିକ୍ରିୟା ସେବା ତଥା ଜିଲ୍ଲାର ଲୋକଙ୍କ ଗତିବିଧି ପାଇଁ ଅନୁମତି ପାଇଁ ସମାନ ପଦ୍ଧତି ପ୍ରଯୁଜ୍ୟ ରହିବା । ଜିଲ୍ଲାରେ କୋଭିଡ କଟକଣାକୁ ମଜବୁତ କରିବାରେ ଏହା ବହୁ ସହାୟକ ହେବ । ନୂତନ ମଡ୍ୟୁଲ ଉପରେ ସୂଚନା ଦେଇ କଲେକ୍ଟର ସିଦ୍ଧାର୍ଥ ଶଙ୍କର ସ୍ଵାଇଁ କହିଛନ୍ତି ଯେ ଏହା ଜିଲ୍ଲାର 5T ଉଦ୍ୟମର ସମ୍ପ୍ରସାରଣ । ଏହା ସହିତ ଆମେ ଆମର ଉତ୍ସ ଏବଂ ସମୟକୁ ବହୁତ ଭଲ ଭାବରେ ସଞ୍ଚୟ କରିପାରିବା । ଏହା ସରକାରୀ କାର୍ଯ୍ୟାଳୟ ଏବଂ ପୋଲିସ୍ ଷ୍ଟେସନରେ ହେଉଥିବା ଭିଡ଼କୁ ମଧ୍ୟ ହ୍ରାସ କରିବ ଯାହାଦ୍ୱାରା କୋଭିଡ୍ ସଂକ୍ରମଣ ବୃଦ୍ଧି ନ କରିବାରେ ସାହାଯ୍ୟ କରିବ ।