ଅନୁଗୁଳ – ମାର୍ଚ୍ଚ ମାସ ପହିଲାରୁ ଗ୍ରୀଷ୍ମ ପ୍ରବାହ କଷ୍ଟ ଦେଲାଣି । ଖରାର ପ୍ରକୋପରେ ବାହାରକୁ ବାହାରିବା ମୁସ୍କିଲ ହୋଇ ଗଲାଣି । ଏପରିସ୍ଥଳେ ପାଣି ପାଇଁ ଅନେକ ଗାଁରେ ସମସ୍ୟା ଦେଖାଗଲାଣି । ଅନୁଗୁଳ ଜିଲ୍ଲା ମହୀଧରପୁର ଗାଁରେ ମଧ୍ୟ ଏହି ପାଣି ସମସ୍ୟା ଦେଖା ଦେଇଥିବା ବେଳେ ପାନୀୟ ଜଳ ପାଇଁ ଆଜି ମହୀଧରପୁର ଗ୍ର‌ାମର ମହିଳା ରାସ୍ତା ଅବରୋଧ କରିଥିଲେ । ଏହି ଗାଁରେ ପାନୀୟ ଜଳ ଯୋଗାଣ କରା ଯାଇନଥିବାରୁ ଗ୍ର‌ାମର ମହିଳା ଅନୁଗୁଳ-କଟକ ରାସ୍ତା ଅବରୋଧ  କରିଥିଲେ । ଗ୍ରାମର ଏକାଧିକ ନଳକୂପ ଅଚଳ ହୋଇଥିଲେ ମଧ୍ୟ ମରାମତି ହେଉନଥିବାର ଗ୍ରାମବାସୀ ଅଭିଯୋଗ କରିଛନ୍ତି । ଏଥିପାଇଁ ମହୀଧରପୁର ଠାରେ ଅନୁଗୁଳ-କଟକ ମୁଖ୍ୟ ରାସ୍ତାକୁ ଆଜି ସକାଳେ ଗରା, ବାଲ୍ଟି ଧରି ଅବରୋଧ କରିଥିଲେ । ମହୀଧରପୁର ଗ୍ରାମପଞ୍ଚାୟତରେ ପାନୀୟ ଜଳ ପ୍ରକଳ୍ପ ପାଇଁ କୋଟି କୋଟି ଟଙ୍କାର ବ୍ୟୟ ଅଟକଳ ହୋଇ  ଏକାଧିକ ପ୍ରକଳ୍ପ ନିର୍ମାଣ କରିଥିଲେ ମଧ୍ୟ ଗ୍ରାମର ଅଧାରୁ ଅଧିକ ସାହିକୁ ପାନୀୟ ଜଳ ଯୋଗାଣ ହୋଇନଥିବାରୁ ଗ୍ରାମବାସୀମାନେ ଅସନ୍ତୋଷ ବ୍ୟକ୍ତକରି ରାସ୍ତା ଅବରୋଧ କରିଥିଲେ । ଦୀର୍ଘ ୩ ଘଣ୍ଟା ସମୟ ଧରି ସେମାନେ ଏହି ରାସ୍ତା ଅବରୋଧ କରିଥିଲେ । ଏହା ଫଳରେ ଅନୁଗୁଳ ମହୀଧରପୁର , ବଅଁରପାଳ, ଆଠଗଡ଼ ଅଞ୍ଚଳକୁ ଯାତାୟାତ ଠପ ହୋଇଥିଲା । ବଅଁରପାଳ ବିଡିଓ ଏଲିଜା ମିଶ୍ର , ମହୀଧରପୁର ସରପଞ୍ଚ ବିନୋଦ କୁମାର ବେହେରା ପ୍ରମୁଖ ପହଞ୍ଚିଥିଲେ । ଏହାପରେ ମହିଳାମାନଙ୍କୁ ବୁଝାସୁଝା କରିବା ସହିତ ବର୍ତ୍ତମାନ ଜଳ ସଙ୍କଟ ଦୂର ପାଇଁ ଟ୍ୟାଙ୍କର ଯୋଗେ ପାନୀୟ ଜଳଯୋଗାଣ କରାଯିବ ଓ ଅଚଳ ନଳକୂପ ଆଜି ମରାମତି କରାଯିବ ବୋଲି ପ୍ରତିଶ୍ରୁତି ଦେବା ପରେ ମହିଳାମାନେ ରାସ୍ତାରୋକରୁ ଓହରିଥିଲେ ।