ଅନୁଗୁଳ -ପାର୍କିଂରେ ଥିବା ଗାଡିକୁ ପଛରୁ ଧକ୍କା ଦେଲା ଲକ୍ଷ୍ମୀବସ । ଅନୁଗୁଳ ଷ୍ଟେଟ ବ୍ୟାଙ୍କ ସମ୍ମୁଖରେ ପାର୍କିଂ ହୋଇଥିବା ଦୁଇଟି କାରକୁ ପଛରୁ ଧକ୍କା ଦେବା ସହ ପଳାଇଥିଲେ। ପୁରୁଣା ସୂଚନାକେନ୍ଦ୍ର ନିକଟରେ ସ୍ଥାନୀୟ ଲୋକ କାବୁ କରି ପୁଲିସ ଜିମାରେ ଦେଇଥିବା ଜଣାପଡିଛି । ଏପରି ଘଟଣା ଘଟାଇଛନ୍ତି ଜଣେ ମଦ୍ୟପ ବସ ଚାଳକ। ସୂଚନା ଅନୁସାରେ , ଥାନା ଛକରୁ ହରିମହୁରୀ ଛକ ଆଡକୁ ଯାଉଥିବା ଏକ ଲକ୍ଷ୍ମୀବସ ଓଡ଼ି୧୯ ୟାଇ ୦୭୫୦ ରାସ୍ତା ପାର୍ଶ୍ଵରେ ଛିଡା ହୋଇଥିବା ଦୁଇଟି କାରକୁ ଧକ୍କା ଦେଇଥିଲା । ଓଡ଼ି୩୩ ଜେ ୩୧୦୧ ନମ୍ବର ବିଶିଷ୍ଟ ଏକ ସ୍ୱିପ୍ଟ ଡିଜେଆର ଗାଡିଟିକୁ ଧକ୍କା ଦେବା ଫଳରେ ଗାଡିର ପଛଅଂଶ ଭାଙ୍ଗି ଚୁରମାର ହୋଇଯାଇଥିବା ଦେଖାଯାଇଛି । ଏଥି ସହ ଏହି ଗାଡି ଆଗରେ ଥିବା ଏକ ବାଲେନୋ ଗାଡି ମଧ୍ୟ ଦୁର୍ଘଟଣା ଶିକାର ହୋଇଛି । ପ୍ରଥମେ ଏଠାରେ ଦୁର୍ଘଟଣା ଘଟାଇ ଗାଡିକୁ କ୍ଷିପ୍ର ଗତି ରେ ନେଉଥିବା ବେଳେ କେତେକ ବାଇକ ଚାଳକ ମାନଙ୍କୁ କଟ ମାରି ଉକ୍ତ ଚାଳକ ଯାଇଥିବା ଅଭିଯୋଗ ହୋଇଛି । ଶେଷରେ ପୁରୁଣା ସୂଚନା କେନ୍ଦ୍ର ନିକଟରେ ସ୍ଥାନୀୟ ଲୋକ ଡ୍ରାଇଭରକୁ କାବୁ କରି ମାଡ ମାରିଥିଲେ । ଦୁଇଜଣ ବରିଷ୍ଠ ସାମ୍ବାଦିକ ଘଟଣା ସ୍ଥଳରେ ପହଞ୍ଚି ଲୋକଙ୍କ ଆକ୍ରୋଶରୁ ଡ୍ରାଇଭରକୁ ରକ୍ଷା କରିଥିଲେ । ଖବର ପାଇ ପୁଲିସ ପହଞ୍ଚି ଉକ୍ତ ଚାଳକଙ୍କୁ କାବୁ କରିଥିବା ବେଳେ ସେ ମଦ୍ୟପାନ କରି ଗାଡି ଚଳାଉଥିବା କେତେକ ଲୋକେ ଅଭିଯୋଗ ଆଣିଛନ୍ତି । ପୂର୍ବରୁ ମଧ୍ୟ ସମାନ ଭାବେ ଜଣେ ଲକ୍ଷ୍ମୀବସ ଚାଳକ ମଦ୍ୟପାନ କରି ଗାଡି ଚଳାଉଥିବା ଘଟଣା ସାମ୍ନାକୁ ଆସିଥିଲା। ପୁଣି ଥରେ ସମାନ ଘଟଣାର ପୁନରାବୃତ୍ତି ହୋଇଥିବା ବେଳେ ଏନେଇ ପଦକ୍ଷେପ ଆବଶ୍ୟକତା ଅଛି ବୋଲି ସହରବାସୀ ଦାବି କରିଛନ୍ତି।