ଅନୁଗୁଳ – ଲାଞ୍ଚ ନେଇ ଭିଜିଲାନ୍ସ ହାତରେ ଧରାପଡିଥିଲେ । ଏବେ ଚାକିରୀରୁ ବିଦା ହେଲେ । ଅନୁଗୁଳ ଜିଲ୍ଲା ଛେଣ୍ଡିପଦା ତହସିଲର ପୂର୍ବତନ ବରିଷ୍ଠ କିରାଣୀ ତଥା ଏବେ ଜିଲ୍ଲା ଯୋଜନା ଓ ପର୍ଯ୍ୟବେକ୍ଷଣ ୟୁନିଟ୍‌ର ବରିଷ୍ଠ ରାଜସ୍ବ ସହାୟକ ଥିବା ଲମ୍ବୋଦର ବେହେରା ସରକାରୀ ଚାକିରୀରୁ ବିଦା ହୋଇଛନ୍ତି । ୨୦୧୨ ମସିହାରେ ସେ ଛେଣ୍ଡିପଦା ତହସିଲରେ ଚାକିରି କରୁଥିଲା ବେଳେ ଜମି ପଟ୍ଟା ଦେବାକୁ ଲାଞ୍ଚ ନେଲା ବେଳେ ଭିଜିଲାନ୍ସ ହାତରେ ଧରା ପଡ଼ିଥିଲେ । ତାଙ୍କ ସହ ଅନ୍ୟ ଜଣେ କର୍ମଚାରୀ ମଧ୍ୟ ଭିଜିଲାନ୍ସ ହାବୁଡ଼ରେ ପଡ଼ିଥିଲେ । ଏହି ମାମଲାରେ ଗତ ଜୁଲାଇରେ ତାଙ୍କୁ ଭିଜିଲାନ୍ସ କୋର୍ଟ ଦୋଷୀ ସାବ୍ୟସ୍ତ କରିଥିଲା । ତାଙ୍କୁ ଅଦାଲତ ୨ ବର୍ଷ ସଶ୍ରମ କାରାଦଣ୍ଡ ଦେବା ସହ ଜରିମାନା କରିଥିଲେ । ଏହା ସହିତ ଲମ୍ବୋଦର ବେହେରାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଭିଜିଲ‌ାନ୍ସ ପକ୍ଷରୁ ସରକାରଙ୍କୁ ଚିଠି କରାଯାଇଥିଲା । ଶେଷରେ ସରକାର ତାଙ୍କ ଉପରେ ଏହି କଠୋର କାର୍ଯ୍ୟାନୁ‌ଷ୍ଠାନ ସ୍ୱରୂପ ଚାକିରୀରୁ ବିଦା କରିଛନ୍ତି ।