ଅନୁଗୁଳ – ଅନୁଗୁଳ ସଦର ଥାନା ମୁଷାପାପୁଲି ଗ୍ରାମରେ ଆଜି ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ଏକ ବିଦ୍ୟୁତ ଟ୍ରାନ୍ସଫର୍ମର ରେ ଲାଗି ଜଣେ ଚାଷୀଙ୍କର ମୃତ୍ୟୁ ହୋଇଛି । ସୂଚନା ଅନୁସାରେ ମୂଷାପାପୁଲି ଗ୍ରାମର ପ୍ରକାଶ ସାହୁ(୪୨)ଙ୍କ  ଆମ୍ବତୋଟା ନିକଟରେ ଏକ ଚାଷ ବଗିଚା ରହିଛି । ସେଠାରେ ସେ ମକା ଚାଷ ସହ ଅନ୍ୟାନ୍ୟ ଫସଲ କରିଥିଲେ । ତେବେ ଚାଷ କ୍ଷେତ ନିକଟରେ ଥିବା ବିଦ୍ୟୁତ ଟ୍ରାନ୍ସଫର୍ମରରେ ସପ୍ତାହେ ହେଲା ତ୍ରୁଟି ରହିଥିବା ଯୋଗୁଁ ଚାଷୀ ଜଣଙ୍କ ଚାଷ ଜମିରେ ପାଣି ଦେଇପାରୁନଥିଲେ । ସେ ବାରମ୍ବାର ଏସମ୍ପର୍କ ରେ ବିଦ୍ୟୁତ ବିଭାଗ କୁ ଜଣାଇଥିଲେ ମଧ୍ୟ ଟ୍ରାନ୍ସଫର୍ମର ଟି ମରାମତି କରାଯାଇନଥିଲା । ଫଳରେ ଚାଷୀ ପ୍ରକାଶ ସାହୁ ଆଜି ସକାଳ ୭ ବେଳକୁ  ନିଜେ ଟ୍ରାନ୍ସଫର୍ମର ମରାମତି କରିବାକୁ ଉପରେ ଚଢିଥିଲେ । କିନ୍ତୁ ସେ ସେଠାରେ ୧୧କେଭି ବିଦ୍ୟୁତ ସଂସ୍ପର୍ଶରେ ଆସି ଜଳି ଯାଇଥିଲେ । ଏହି ଘଟଣାକୁ ନେଇ ଘଟଣାସ୍ଥଳରେ ଉତ୍ତେଜନା ଦେଖାଦେଇଛି । ବିଦ୍ୟୁତ ବିଭାଗର ଅବହେଳାକୁ ଦାୟୀ କରି କ୍ଷତିପୂରଣ ଦାବି କରିଛନ୍ତି ଗ୍ରାମବାସୀ । ଜାତୀୟ ରାଜପଥ ୫୫ ଅବରୋଧ କରି ବସି ରହିବା ଫଳରେ ଗାଡି ମୋଟର ଚଳାଚଳ ବାଧାପ୍ରାପ୍ତ ହୋଇଛି ।