ଅନୁଗୁଳ – ଅନୁଗୁଳ ଜିଲ୍ଲାରେ ଏବେ ସହର ଅପେକ୍ଷା ଗାଁ ମାନଙ୍କରେ କରୋନା ଆକ୍ରାନ୍ତ ସଂଖ୍ୟା ଅଧିକ ବାଢୁଛି । ସେହି ଗାଁ ଆକ୍ରାନ୍ତ ମାନଙ୍କୁ ଡାକ୍ତରଖାନା ଆସିବା କଷ୍ଟକର ହୋଇ ପଡୁଥିବା ବେଳେ ଅନୁଗୁଳ ଜିଲ୍ଲା ପ୍ରଶାସନ ଏଥିପାଇଁ ଗାଁରେ ଅଟୋ-ଆମ୍ବୁଲାନ୍ସ ଯୋଜନା ଆରମ୍ଭ କରିଛି । ବିଭିନ୍ନ ପଞ୍ଚାୟତରେ ରୋଗୀଙ୍କୁ ଡାକ୍ତରଖାନା ପହଞ୍ଚାଇବା ପାଇଁ ଗୋଟିଏ ଅଟୋ ସଂରକ୍ଷିତ ରହିବ । ଲୋକଙ୍କ ଠାରୁ ସୂଚନା ମିଳିବା ପରେ ରୋଗୀଙ୍କୁ ଅଟୋ ମେଡିକାଲରେ କିଭଳି ପହଞ୍ଚାଇବ ସେନେଇ ବିଧିବଦ୍ଧ ଭାବେ ଅନୁଗୁଳ ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦେଶକ ଦିଲୀପ ସାହୁ ଭିଡ଼ିଓ କଂଫେରେନ୍ସି ଜରିଆରେ ବିଡ଼ିଓ ଓ ସରପଞ୍ଚ ଙ୍କ ସହ ଆଲୋଚନା କରିଛନ୍ତି । ସୂଚନା ଅନୁସାରେ ବର୍ତ୍ତମାନ ସ୍ଥିତିରେ ସମୟରେ ଜଣେ ରୋଗୀକୁ ଗାଁରେ ଛୁଇଁବାକୁ ଲୋକେ ନାରାଜ । ଗାଁ ଗାଡ଼ିରେ ଲୋକଙ୍କୁ ଡାକ୍ତରଖାନାକୁ ନେବାକୁ ବି ଲୋକେ ଭୟ କରୁଛନ୍ତି । ବର୍ତମାନ ସମୟରେ ହଠାତ ରୋଗୀଙ୍କର ଅକ୍ସିଜେନ ଦରକାର ପଡୁଛି । ଠିକ ସମୟରେ ରୋଗୀ ଟିଏ ଡାକ୍ତରଖାନା ଯାଏ ନ ପହଞ୍ଚି ପାରିଲେ ଜୀବନ ଚାଲି ଯିବାର ଭୟ ରହିଛି । ତେଣୁ ଆମ୍ବୁଲାନ୍ସ ଅନୁପସ୍ଥିତିରେ ଏହି ଅଟୋ-ଆମ୍ବୁଲାନ୍ସ ଯେମିତି ଲୋକଙ୍କୁ ଅନ୍ତତଃ ଡାକ୍ତରଖାନା ଯାଏ ପହଞ୍ଚାଇ ଜୀବନ ବଞ୍ଚାଇ ପାରିବ ସେଥିପାଇଁ ଜିଲ୍ଲା ପ୍ରଶାସନ ଏହି ଯୋଜନା ଆରମ୍ଭ କରିଛି । ଏଥିପାଇଁ ସରପଞ୍ଚ ଓ ବିଡ଼ିଓ ମାନଙ୍କ ସହ ଆଲୋଚନା କରାଯିବା ସହ ଅନ୍ତଃତ ଦୁଇ ତିନୋଟି ପଞ୍ଚାୟତରେ ଗୋଟିଏ ଲେଖାଏଁ ଅଟୋ ଏହି ସେବା ଯୋଗାଇବା ପାଇଁ ଠିକ କରିବାକୁ ନିର୍ଦେଶ ଦିଆଯାଇଛି । ଏହି ଅଟୋ ଗୁଡିକ କୋଭିଡ ହସ୍ପିଟାଲକୁ ଯିବେ ନାହିଁ । ସରକାରୀ ଆମ୍ବୁଲାନ୍ସ ଅନୁପସ୍ଥିତିରେ ରୋଗୀକୁ କେବଳ ଗାଁରୁ ବ୍ଲକ ମୁଖ୍ୟ ଡାକ୍ତରଖାନା (ସିଏଚସି) ଯାଏ ନେବ । ପ୍ରତି ସିଏଚସି ରେ ଫ୍ଲୁ ସେଣ୍ଟର କରାଯାଇଛି । ଯେଉଁଠି ଅକ୍ସିଜେନ ସିଲିଣ୍ଡର ଠାରୁ ଆରମ୍ଭ କରି ସବୁ ପ୍ରକାରର ପ୍ରାଥମିକ ଚିକିତ୍ସା ବ୍ୟବସ୍ଥା କରାଯାଇଛି । ଗାଁରେ ଗୁରୁତର ଥିବା ରୋଗୀ ଟି ଅଟୋ-ଆମ୍ବୁଲାନ୍ସ ଜରିଆରେ ସିଏଚସି ଯାଏ ପହଞ୍ଚି ଗଲେ ସେଠି ତାଙ୍କୁ ପ୍ରାଥମିକ ଚିକିତ୍ସା ଦିଆଯିବ । ଅବସ୍ଥା ଅତି ଗୁରୁତର ଥିଲେ, ଏଠାରୁ ସରକାରୀ ଆମ୍ବୁଲାନ୍ସରେ କୋଭିଡ ହସ୍ପିଟାଲ କୁ ସ୍ଥାନାନ୍ତର କରାଯିବ । ଅଟୋ-ଆମ୍ବୁଲାନ୍ସକୁ କୋଭିଡ ହସ୍ପିଟାଲ ଯିବା ଆବଶ୍ୟକ ନାହିଁ । ରୋଗୀଙ୍କୁ ପରିବହନ କଲା ବେଳେ ଡ୍ରାଇଭର ର ସୁରକ୍ଷା ପାଇଁ ତାଙ୍କୁ ଆବଶ୍ୟକ ମାସ୍କ, ସାନିଟାଇଜର ଦିଆଯିବ । ଅଟୋ ଡ୍ରାଇଭର ଓ ରୋଗୀଙ୍କ ମଧ୍ୟରେ ଜରି ଭିଡି  ରୋଗୀ ଠାରୁ ଡ୍ରାଇଭର ଯେମିତି ସଂକ୍ରମିତ ନ ହୋଇ ପାରିବେ ସେ ବ୍ୟବସ୍ଥା କରାଯିବ । ଅଟୋ-ଆମ୍ବୁଲାନ୍ସରେ ଷ୍ଟିକର ମରାଯିବ । ସେମାନଙ୍କର ମୋବାଇଲ ନମ୍ବର ପଞ୍ଚାୟତ କାର୍ଯ୍ୟାଳୟରେ ମରାଯିବାକୁ କୁହାଯାଇଛି । ପ୍ରଶାସନ ପକ୍ଷରୁ ଅଟୋ ଭଡା ବ୍ୟବସ୍ଥା କରାଯାଇଛି । ୧୦ କିଲୋମିଟର ପାଇଁ ୧୨୦ ଟଙ୍କା ଧାର୍ଯ୍ୟ କରାଯାଇଛି ।