ତାଳଚେର – ଅନୁଗୁଳ ଜିଲ୍ଲା ତାଳଚେର ଠାରେ ଥିବା କୋଭିଡ କେୟାର ସେଣ୍ଟରରେ ଅସନ୍ତୋଷ ଦେଖା ଦେଇଥିଲା । ଏହି ସେଣ୍ଟରରେ ବିଭିନ୍ନ ପ୍ରକାର ସମସ୍ୟା ଥିବା ଅଭିଯୋଗ କରି ରୋଗୀମାନେ ଧାରଣାରେ ବସିଥିଲେ । ରୋଗୀ ମାନଙ୍କ ଅଭିଯୋଗ ହେଲା ଯେ ଏହି ସେଣ୍ଟରରେ ନିମ୍ନ ମାନର ଖାଦ୍ୟ ଦିଆ ଯାଉଥିବା ବେଳେ ପିଇବା ପାଣିର ସମସ୍ୟା ରହିଛି । ପାଇଖାନା ଓ ଗାଧୁଆ ଘର ସଫା କରା ଯାଉ ନଥିବା ଯୋଗୁଁ ଅସନା ହୋଇ ରହିଛି । ସେପଟେ ଗାଧୁଆ ଘର ପାଣି ନିଷ୍କାସନ ହୋଇ ନପାରି ଆଣ୍ଠୁଏ ପାଣି ଜମି ରହିଲାଣି । ଯାହା ଫଳରେ ନିତ୍ୟକର୍ମ କରିବାକୁ ରୋଗୀ ମାନଙ୍କୁ ଘୋର ଅସୁବିଧାର ସମ୍ମୁଖୀନ ହେବାକୁ ପଡୁଛି  । ଏହି ସବୁ ସମସ୍ୟା ଥିବା ଅଭିଯୋଗ କରି ରୋଗୀମାନେ ସକାଳୁ ଧାରଣାରେ ବସିଥିଲେ । ପରେ ତାଳଚେର ପୌରପାଳିକା ଅଧିକାରିଣୀ ରଶ୍ମିରେଖା ଅମାନ୍ତ , ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଧକାରୀ ଅଭୟ କୁମାର ଦାସ ଆଦି ପହଞ୍ଚି ସେମାନଙ୍କ ସହ ଆଲୋଚନା କରିବା ସହ ସମସ୍ୟାର ସମାଧାନ ପ୍ରତିଶ୍ରୁତି ଦେବା ପରେ ରୋଗୀମାନେ ଆନ୍ଦୋଳନରୁ ଓହରିଥିଲେ ।