ଅନୁଗୁଳ – ଅନୁଗୁଳ ଜିଲ୍ଲା ଦେଇ ଅତିକ୍ରମ କରିବ ଆଉ ଏକ ଜାତୀୟ ରାଜପଥ । ଏ ନେଇ ଆଜି ଜାତୀୟ ରାଜପଥ ଓ ପୂର୍ତ୍ତ ବିଭାଗ ଅଧିକାରୀଙ୍କ ସହ ଉପ-ବାଚସ୍ପତି ତଥା ଅନୁଗୁଳ ବିଧାୟକ ରଜନୀକାନ୍ତ ସିଂହ ଆଲୋଚନା କରିବା ସହ ସ୍ଥିତି ପରଖିଛନ୍ତି । ୬୫୫ ନମ୍ବର ବିଶିଷ୍ଟ ଏକ ଜାତୀୟ ରାଜପଥ ଖୁଣ୍ଟୁଣୀରୁ ବାହାରି ଆଠଗଡ , ଶଙ୍କରପୁର , ମହୀଧରପୁର ଦେଇ ଅନୁଗୁଳ ଆସିବାର ଥିଲା । ଏହାକୁ ଏବେ ଅନୁଗୁଳ ନ ଆସି ବଅଁରପାଳକୁ ଲିଙ୍କ କରାଯିବାକୁ ଲକ୍ଷ୍ୟ ରଖା ଯାଇଛି । ୧୮ କିଲୋମିଟର ବିଶିଷ୍ଟ ଏହି ରାସ୍ତା ୪ ଲାଇନ ବିଶିଷ୍ଟ ହେବ । ଏହା ମହୀଧରପୁର , ବଉଳିଗଡ , ତାଳମୂଳ ଦେଇ ସିଧାସଳଖ ବଅଁରପାଳରେ ସଂଯୋଗ ହେଲେ ଏହା ଏକ ଅର୍ଥନୈତିକ କରିଡର ହେବ । ଏହି ଜାତୀୟ ରାଜପଥ ଦେଇ ନାଲକୋ , ଏମସିଏଲର ଗାଡି ମୋଟର ସହଜରେ ଚଳାଚଳ କରିବା ସହ ରାଉରକେଲାରୁ ମଧ୍ୟ ଗାଡି ଯିବା ଆସିବା କରିବାକୁ ସହଜ ହେବ । ଆଜି ଅନୁଗୁଳ ସର୍କିଟ ହାଉସ ଠାରେ ଏ ନେଇ ସବିଶେଷ ଆଲୋଚନା କରିବା ସହ ଉପ-ବାଚସ୍ପତି ରଜନୀକାନ୍ତ ସିଂହ ତୁରନ୍ତ ସମସ୍ତ ପ୍ରକ୍ରିୟା ଶେଷ କରିବାକୁ ପରାମର୍ଶ ଦେଇଛନ୍ତି ।