ତାଳଚେର – ଝିଅ ଘରୁ ଅଷ୍ଟମୀ ଭାର ଦେଇ ଫେରୁଥିବା ବେଳେ ଦୁର୍ଘଟଣାରେ ଚାଲିଗଲା ବାପାଙ୍କର ଜୀବନ । ଏଭଳି ଘଟଣା ଦେଖିବାକୁ ମିଳିଛି ତାଳଚେର କାଳନ୍ଦୀପ୍ରସାଦ ଗ୍ରାମ ଛକ ନିକଟରେ । ସୂଚନା ଅନୁଯାୟୀ କାମାକ୍ଷାନଗର ଆଳୁତୁମା ଗ୍ରାମର ବିପ୍ରବ ସାହୁ କଣିହାଁ ଅଞ୍ଚଳର ବଜ୍ରକୋଟ ଗାଁରେ ନିଜ ଝିଅ ଘରେ ଅଷ୍ଟମୀ ଭାର ଦେଇ ବାଇକ ଯୋଗେ ଫେରୁଥିବା ସମୟରେ ତାଳଚେର କାଳନ୍ଦୀ ପ୍ରସାଦ ଛକ ନିକଟରେ ଏକ  ହାଇୱା ଟ୍ରକ ତାଙ୍କୁ ଧକ୍କା ଦେଇଥିଲା । ଘଟଣା ସ୍ଥଳରେ ହିଁ ତାଙ୍କର ମୃତ୍ୟୁ ଘଟିଥିଲା । ଘଟଣା ସ୍ଥଳରେ ପରିବାର ଓ ସ୍ଥାନୀୟ ଲୋକ ପହଞ୍ଚି କ୍ଷତିପୂରଣ ଓ ଭାରିଯାନ ଚଳାଚଳରେ ଟ୍ରାଫିକ ବ୍ୟବସ୍ଥା କରିବା ପାଇଁ ରାଜପଥକୁ ଅବରୋଧ କରିଥିଲେ । ଫଳରେ ତାଳଚେର ଠାରୁ ପାଲଲହଡ଼ାକୁ ଯାତାୟତ ବାଧାପ୍ରାପ୍ତ ହେବା ସହ ରାସ୍ତାର ଉଭୟ ପାର୍ଶ୍ଵରେ ଶହ ଶହ ଗାଡି ମଟର ଅଟକି ରହିଥିଲା । ଘଟଣା ସ୍ଥଳରେ ତାଳଚେର ପୁଲିସ ପହଁଚି ଲୋକଙ୍କୁ ବୁଝାସୁଝା କରିବା ସହ ଘଟଣାର ଅଧିକ ତଦନ୍ତ ଜାରି ରଖିଛି ।