ମସଲମାନିଆ ଇଣ୍ଡିଆ ଚାମ୍ପିଆନ ସିପରେ ଚମକିଲେ ବିଦୁର

ଅନୁଗୁଳ – ଦିଲ୍ଲୀରେ ଚମକିଲେ ଅନୁଗୁଳର ପୁଅ ବିଦୁର । ଶହ ଶହ ପ୍ରତିଦ୍ଵନ୍ଦୀଙ୍କୁ ପଛରେ ପକାଇ ଅନୁଗୁଳର ବିଦୁର କୁମାର ମହାପାତ୍ର ମସଲମାନିଆ ଇଣ୍ଡିଆ ୨୦୨୧ ଟାଇଟଲ ହାସଲ କରିବା ସହ ଏସୀୟ ବଡି ବିଲଡିଂ ଚାମ୍ପିୟାନସିପରେ ଭାଗ ନେବା ପାଇଁ ଯୋଗ୍ୟତା ହାସଲ କରି ପାରିଛନ୍ତି ।  ଦିଲ୍ଲୀର ଏନସିଇଉଆଇ ଅଡିଟରିଅମରେ ଗତ ଡିସେମ୍ବର ୪ ଓ ୫ ଦୁଇ ଦିନ ଧରି ଆୟୋଜିତ ହୋଇଥିବା ମସଲମାନିଆ ଇଣ୍ଡିଆ ୨୦୨୧ ବଡି ବିଲଡିଂ ଚାମ୍ପିୟାନସିପରେ ଅନୁଗୁଳର ବିଦୁର ମହାପାତ୍ର ଯୋଗଦେଇ ଓପନ ସର୍ଟ ବରିଷ୍ଠ ବିଭାଗରେ ଚାମ୍ପିୟାନ ଆଖ୍ୟା ଅର୍ଜନ କରିଛନ୍ତି । ଏହି ପ୍ରତିଯୋଗିତାରେ ତିନି ଶହରୁ ଊର୍ଦ୍ଧ୍ଵ ପ୍ରତିଯୋଗୀ ଅଂଶଗ୍ରହଣ କରିଥିଲେ । ଯେଉଁଥିରେ ସେ ସମସ୍ତଙ୍କୁ ପଛରେ ପକାଇ ଏହି ଆଖ୍ୟା ଅର୍ଜନ କରିଛନ୍ତି । ଏହା ସହ  ଆସନ୍ତା ବର୍ଷ ଡିସେମ୍ବରରେ ସିଙ୍ଗାପୁରରେ ହେବାକୁ ଥିବା ଏସୀୟ ବଡି ବିଲଡିଂ ଚାମ୍ପିୟାନସିପରେ ଭାରତ ପକ୍ଷରୁ ଅଂଶ ଗ୍ରହଣ କରିବାକୁ ଯୋଗ୍ୟ ବିବେଚିତ ହୋଇଛନ୍ତି । ଗତ ୧୦ ବର୍ଷ ଧରି ସେ ଦେଖି ଆସୁଥିବା ଏଭଳି ସ୍ଵପ୍ନ ଏବେ ତାଙ୍କର ପୂରଣ ହୋଇଥିବା ବେଳେ ଆଗକୁ ଆହୁରି ପରିଶ୍ରମ କରିବେ ଏବଂ ଆନ୍ତର୍ଜାତୀୟ ସ୍ତରରେ ମଧ୍ୟ ସଫଳତା ପାଇବେ ବୋଲି ଆଶା ରଖିଛନ୍ତି । ବିଦୁରଙ୍କ ବାପା ଜଣେ ଅବସରପ୍ରାପ୍ତ ନାଲକୋ କର୍ମଚାରୀ । ନିଜ ଅକ୍ଲାନ୍ତ ପରିଶ୍ରମ , ନିଷ୍ଠା ଏବଂ ଜିମରେ ଉପଯୁକ୍ତ ଅଭ୍ୟାସ ହେତୁ ସେ ଏଭଳି ସଫଳତା ପାଇଥିବା କଥା  ବିଦୁର କହିଛନ୍ତି । ଆଜି ଏକ ସାମ୍ବାଦିକ ସମ୍ମିଳନୀରେ ସେ ଏହା କହିଥିବା ବେଳେ ଏଭଳି ସଫଳତା ପାଇବାରେ ବିଦୁର ଯେଊଁଭଳି ପରିଶ୍ରମ କରିଛନ୍ତି ତାହା ଅନ୍ୟ ମାନଙ୍କ ପାଇଁ ବହୁ କଷ୍ଟସାଧ୍ୟ ବୋଲି ତାଙ୍କ କୋଚ ସୌରଭ ଦାସ କହିଛନ୍ତି । ତାଙ୍କର ନିଷ୍ଠା ହିଁ ଏହି ସଫଳତା ପଛର ରହସ୍ୟ ବୋଲି ସୌରଭ କହିଛନ୍ତି । ଆଜିର ଏହି ସାମ୍ବାଦିକ ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ବିଦୁରଙ୍କ କୋଚ ସୌରଭ ଦାସ , ଅବଦୁଲ ତଫିକଙ୍କ ସମେତ ତାଙ୍କ ବାପା ବଳରାମ ମହାପାତ୍ର , ମା ମିନିଲତା ମହାପାତ୍ର ଏବଂ ତାଙ୍କ ସ୍ତ୍ରୀ ଲିଜା କୁମାରୀ ଉପସ୍ଥିତ ଥିଲେ ।

Advertisement