ଅନୁଗୁଳ – ଅନୁଗୁଳ ଥାନାରେ ଜଣେ ବ୍ୟାଙ୍କ୍ ମ୍ୟାନେଜରଙ୍କୁ ୨୪ ଘଣ୍ଟାରୁ ଅଧିକ ସମୟ ଥାନାରେ ଅଟକ ରଖିବା ପରେ ତାଙ୍କୁ ଜେଲ୍ କୁ ପଠାଇବା ଏବେ ପୁଲିସ୍ ପାଇଁ କାଳ ହୋଇଛି । ମାମଲାରେ ଥାନାର ତତ୍କାଳୀନ ଆଇଆଇସି ଓ ଏସଆଇ ତଥା ତଦନ୍ତକାରୀ ଅଧକାରୀ ଏଥିପାଇଁ ଦାୟୀ ବୋଲି କମିଶନଙ୍କ ତଦନ୍ତକାରୀ ଟିମ୍ ତାଙ୍କ ରିପୋର୍ଟରେ ଦର୍ଶାଇଛନ୍ତି । ଅନୁଗୁଳ ଏଚଡ଼ିଏଫସି ବ୍ରାଞ୍ଚର ପୂର୍ବତନ ମ୍ୟାନେଜର ଶକ୍ତିବେଦାନ୍ତ ଦାସଙ୍କୁ ଅନୁଗୁଳ ଟାଉନ ଥାନା ପୁଲିସ ବେଆଇନ ଭାବେ ୫୬ ଘଣ୍ଟାରୁ ଊର୍ଦ୍ଧ୍ବ ସମୟ ଅଟକ ରଖିବା ଘଟଣାରେ ଟାଉନ ଥାନାର ତତ୍କାଳୀନ ଆଇଆଇସି ଓ ତଦନ୍ତକାରୀ ଅଧିକାରୀ ଦାୟୀ ବୋଲି ଓଡିଶା ମାନବିକ ଅଧିକାର ଆୟୋଗ (Odisha Human Rights ) ଙ୍କ ତଦନ୍ତକାରୀ ଟିମ ତାଙ୍କ ତଦନ୍ତ ରିପୋର୍ଟରେ ଦର୍ଶାଇଛନ୍ତି । ସୂଚନା ଅନୁସାରେ ୨୦୧୯ ସେପ୍ଟେମ୍ବର ୧୨ ତାରିଖରେ ଶକ୍ତି ବେଦାନ୍ତ ଦାସଙ୍କୁ ପ୍ରଶାସନର ଟଙ୍କା ହେରଫେର ଅଭିଯୋଗରେ ଅନୁଗୁଳ ପୁଲିସ ଥାନାକୁ ଆଣିଥିଲା । କିନ୍ତୁ ତାଙ୍କୁ ସେପ୍ଟେମ୍ବର ୧୪ ତାରିଖରେ କୋର୍ଟ ଚାଲାଣ କରାଯାଇଥିଲା । ବେଆଇନ ଭାବେ ଶକ୍ତି ବେଦାନ୍ତଙ୍କୁ ୫୬ ଘଣ୍ଟାରୁ ଊର୍ଦ୍ଧ୍ବ ସମୟ ଅଟକ ରଖା ଯାଇଥିଲା ବୋଲି ଅଭିଯୋଗ କରି ରାଜ୍ୟ ମାନବାଧିକାର କମିଶନଙ୍କ ଦ୍ବାରସ୍ଥ ହୋଇଥିଲେ ଶକ୍ତି ବେଦାନ୍ତ ଦାସ । ଅଭିଯୋଗକୁ ନେଇ ଅନୁଗୁଳ ଏସପି ଓ ଜିଲ୍ଲାପାଳଙ୍କୁ ରିପୋର୍ଟ ତଲବ କରିଥିଲେ ଓଡିଶା ମାନବାଧିକାର କମିଶନ । ପରେ ଅନୁଗୋଳ ଏସପିଙ୍କ ରିପୋର୍ଟରେ ଅସନ୍ତୋଷ ପ୍ରକାଶ କରି କମିଶନ ଓଏଚଆରସିର (Odisha Human Rights Commission) ନିଜସ୍ବ ତଦନ୍ତକାରୀ ସଂସ୍ଥାକୁ ତଦନ୍ତ କରି ରିପୋର୍ଟ ଦେବାକୁ ନିର୍ଦ୍ଦେଶ ଦେଇଥିଲେ । ଇତିମଧ୍ୟରେ ଓଡିଶା ମାନବ ଅଧିକାର ଆୟୋଗଙ୍କ ତଦନ୍ତକାରୀ ଟିମ ତାଙ୍କ ତଦନ୍ତ ରିପୋର୍ଟରେ ତତ୍କାଳୀନ ଆଇଆଇସି ଓ ତଦନ୍ତକାରୀ ଅଧିକାରୀଙ୍କୁ ବେଆଇନ ଅଟକ ପାଇଁ ଦୋଷୀ ସାବ୍ୟସ୍ତ କରିଛନ୍ତି । ଓଡିଶା ମାନବିକ ଅଧିକାର ଆୟୋଗ ଆସନ୍ତା ଜାନୁଆରୀ ୪ ତାରିଖରେ ଏହି ମାମଲାର ପରବର୍ତ୍ତୀ ନିର୍ଦ୍ଦେଶନାମା ଦେବେ ବୋଲି ଦିନ ଧାର୍ଯ୍ୟ କରିଛନ୍ତି ।