ଛେଣ୍ଡିପଦା  – ଅନୁଗୁଳ ଜିଲ୍ଲା ଛେଣ୍ଡିପଦା ବ୍ଲକ ବରପଦା ଗ୍ରାମ ପଞ୍ଚାୟତର ଗୋପୀବଲ୍ଲଭପୁର ଗ୍ରାମର ଶତାଧିକ ଗ୍ରାମବାସୀ ଭୋଟ ବର୍ଜନ ନିମନ୍ତେ ଗ୍ରାମ୍ୟ ଦେବୀଙ୍କ ନିକଟରେ ଶପଥ କରିଛନ୍ତି । ଦୀର୍ଘ ୨୦ ବର୍ଷ ହେବ ଗ୍ରାମରେ ସରକାରୀ ଯୋଜନା ସଠିକ ଭାବରେ କାର୍ଯ୍ୟକାରୀ ହେଉନଥିବାରୁ ଗ୍ରାମବାସୀ ଭୋଟ୍ ବର୍ଜନ ପାଇଁ ବଜ୍ର ଶପଥ ନେଇଛନ୍ତି । ଏପରିକି ଗ୍ରାମର ଉଭୟ ପାର୍ଶ୍ବରେ ଗ୍ରାମ୍ୟ କମିଟିର ବିନା ଅନୁମତି ସରକାରୀ ବାବୁ ଓ ନେତାଙ୍କ ପ୍ରବେଶକୁ  ନିଷେଦ୍ଧାଅଞ୍ଚଳ ଭାବେ ଗ୍ରାମ୍ୟ କମିଟ ପକ୍ଷରୁ ଘୋଷଣା କରିଛନ୍ତି  । ବରପଦା ପଞ୍ଚାୟତର  ଗୋପୀବଲ୍ଲଭପୁର ଗ୍ରାମରେ ସରକାରଙ୍କ ସମସ୍ତ ଯୋଜନାରୁ ଗ୍ରାମବାସୀ ବଞ୍ଚିତ ଥିବାରୁ ଚଳିତ ବର୍ଷ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ଭୋଟ ବର୍ଜନ କରିବା ପାଇଁ ନିଷ୍ପତ୍ତି ନେଇଛନ୍ତି । ଉକ୍ତ ଗ୍ରାମରେ ୪ଶହ ପରିବାର ଥିବା ବେଳେ  ୮୬୦ରୁ ଉର୍ଦ୍ଧ୍ବ ଭୋଟର  ରହିଛନ୍ତି ।  ଆଜିକୁ ୨୦ ବର୍ଷରୁ ଉର୍ଦ୍ଧ୍ବ ହେବ ହେବ କଳିଙ୍ଗ ଡି କୋଲ ବ୍ଲକ୍,ଉତ୍କଳ ଇ କୋଲ୍ ବ୍ଲକ୍ ଏବଂ ଏଫ କୋଲ୍ ବ୍ଲକ୍ କୁ ୪/୧ ଜାରି  କରାଯାଇଛି । ସେହିଦିନ ଠାରୁ ଗ୍ରାମବାସୀଙ୍କୁ ସରକାରୀ ଯୋଜନା ସୁବିଧା ମିଳୁନାହିଁ । ଦୀର୍ଘ ବର୍ଷ ଧରି ବସବାସ କରୁଥିବା ଆଦିବାସୀ ଓ ହରିଜନ ଶ୍ରେଣୀ ଲୋକମାନେ ନାହିଁ ନଥିବା ଅସୁବିଧାରେ ସମ୍ମୁଖୀନ ହେଉଛନ୍ତି । ବିଶେଷ ଭାବେ ପାନୀୟଜଳ, ରାସ୍ତା ଘାଟ , ଶିକ୍ଷା , ସ୍ବଛଭାରତ ଯୋଜନା ନାମରେ ଶୌଚାଳୟ ,ଆବାସ ଯୋଜନାରେ ଆଦି ଯୋଜନାରୁ  ଲୋକମାନେ ବଞ୍ଚିତ ହେଉଛନ୍ତି । ବର୍ଷ ବର୍ଷ ଧରି  ସରକାରଙ୍କ ପାଖରେ ଅଭିଯୋଗ କରିଥିଲେ ମଧ୍ୟ ଆଜି ପର୍ଯ୍ୟନ୍ତ ପ୍ରଶାସନ ଦୃଷ୍ଟି ନଦେଇଥିବାରୁ ଗ୍ରାମର ସମସ୍ତ ଭୋଟର ଶପଥ କରି ଭୋଟ୍ ବର୍ଜନ କରିବା ପାଇଁ ନିଷ୍ପତ୍ତି ନେଇଛନ୍ତି । ଆଉ କିଛି ଦିନ ପରେ ଭୋଟ ଗ୍ରହଣ ହେବାକୁ ଥିବା ବେଳେ ଗାଁକୁ କୈାଣସି ରାଜନୈତିକ ବ୍ୟକ୍ତିଙ୍କୁ ଗ୍ରାମକୁ ଛାଡୁ ନଥିବା ସହିତ ଚଳିତ ପଞ୍ଚାୟତ ନିର୍ବାଚନରେ ମଧ୍ୟ ଗ୍ରାମର କୌଣସି ବ୍ୟକ୍ତି ୱାର୍ଡ ସଭ୍ୟ ନିମନ୍ତେ ମଧ୍ୟ ନାମାଙ୍କନ ପତ୍ର ଦାଖଲ କରିନାହାଁନ୍ତି ।