ଅନୁଗୁଳ – ଅନୁଗୁଳ ସହର ଉପକଣ୍ଠ ରାଣୀଗୁଡା ରେ ଅବକାରୀ ବିଭାଗ ଓ କଟକ ଫ୍ଲାଇଙ୍ଗ ସ୍କ୍ବାର୍ଡର ମିଳିତ ଚଢ଼ାଉ ବେଳେ ବିପୁଳ ପରିମାଣର ବିଦେଶୀ ମଦ ବୋତଲର ଠିପି , ଲେବଲ ଓ ଏକ୍ସସାଇଜ ଆଢେସିଭ ଲେବଲ ଜବତ କରା ଯାଇଛି । ସୂଚନା ଅନୁସାରେ ଅନୁଗୁଳ ସହର ଉପକଣ୍ଠ ରାଣୀଗୁଡା ଠାରେ ଜୟ ପ୍ରକାଶ ଗୁପ୍ତା ନାମକ ଜଣେ ବ୍ୟକ୍ତି ଭଡାଘର ନେଇ ଗତ ୫ ବର୍ଷ ହେଲା ରହୁଥିଲେ । ତେବେ ଏହି ଭଡା ଘରେ ରହି ସେ ଚଳାଇ ଥିଲେ ତାଙ୍କ କଳା ସାମ୍ରାଜ୍ୟ । ଯାହାର ସୋର ଶବ୍ଦ ମଧ୍ୟ ପାଇ ନଥିଲେ ଘର ମାଲିକ କି ପଡୋଶୀ । ରାଜ୍ୟ ବାହାରୁ ନକଲି ବିଦେଶୀ ମଦ ବୋତଲର ସାମଗ୍ରୀର ଆଣି ରାଜ୍ୟ ତଥା ରାଜ୍ୟ ବାହାରକୁ ସପ୍ଲାଇ କରୁଥିଲେ । ଏହି ଭଡା ଘରେ ତାଙ୍କ ଶାଶୁ ଶଶୁର , ସ୍ତ୍ରୀ ଓ ପୁଅ ବହୁ ରହୁଥିଲେ । ପଡୋଶୀ ଓ ଘର ମାଲିକଙ୍କୁ ସ୍ପେୟାର ପାର୍ଟ୍ସ ବେପାର କରୁଥିବା କହି ଚଳାଇଥିଲେ ଏହି କଳା ବ୍ୟବସାୟ । ସମସ୍ତଙ୍କ ସହ ଭଲ ଆଚରଣ କରି ଆସୁଥିବା ବେଳେ କେବେ ବି କେହି ତାଙ୍କ ଏହି ବେପାର ସମ୍ପର୍କରେ ଖବର ପାଇ ପାରୁ ନଥିଲେ । ଘରର ସମସ୍ତ ଝରକାରେ ସେ କାଗଜ ପେଟି ମାରି ସିଲ କରି ଦେଇଥିଲେ । ଯେପରିକି ବାହାର ଲୋକ ଝରକା ଫାଙ୍କରୁ କିଛି ଜାଣି ପାରିବ ନାହିଁ । ତେବେ କଲିକତାରୁ ଏକ ବସ ରେ ଏହି ବିଦେଶୀ ମଦ ବୋତଲର ଠିପି , ଲେବଲ ଓ ଏକ୍ସସାଇଜ ଆଢେସିଭ ଲେବଲ ସାମଗ୍ରୀ ଆସୁଥିବା ବେଳେ ବାଲେଶ୍ୱରରେ ଧରା ପଡିଥିଲା । ଏହାକୁ ଲିଙ୍କ କରିବା ପରେ ଅବକାରୀ କମିଶନର ଆଶିଷ କୁମାର ସିଂହଙ୍କ ନିର୍ଦେଶ କ୍ରମେ ବସକୁ ଫଲୋ କରିବା ପରେ ରାଣୀଗୁଡାରେ ଜୟା ପ୍ରକାଶ ରହୁଥିବା ଏହି ଭଡା ଚଢ଼ାଉ ହୋଇଥିଲା । ଚଢାଉ ବେଳେ ପ୍ରାୟ ୧୦୦ ରୁ ଊର୍ଦ୍ଧ୍ଵ ବସ୍ତା ଠିପି , ବହୁ ପରିମାଣର ଲେବଲ ଓ ଏକ୍ସସାଇଜ ଆଢେସିଭ ଲେବଲ ଜବତ ହୋଇଥିଲା । ଏହି ନକଲି ଲେବଲରେ ବାର କୋଡ ମଧ୍ୟ ରହିଥିବା ବେଳେ ସରକାରୀ ସପ୍ଲାଇ ହେଉଥିବା ଏକ୍ସସାଇଜ ଆଢେସିଭ ଲେବଲ ଅବକାରୀ ବିଭାଗ ଚକିତ କରିଥିଲା । ତେବେ ଚଢାଉ ପରେ ଜବତ ସାମଗ୍ରୀର ଆକଳନ ଅବକାରୀ ବିଭାଗ କରୁଥିବା ବେଳେ ମୁଖ୍ୟ ଅଭିଯୁକ୍ତ ଜୟ ପ୍ରକାଶ ଗୁପ୍ତା ଫେରାର ହୋଇ ଯାଇଛି । କୌଣସି ସୂତ୍ରରୁ ଖବର ପାଇ ଆଜି ସକାଳୁ ସେ ଭୁବନେଶ୍ଵର ଯାଉଛି କହି ସପରିବାର ଘରୁ ବାହାରି ଯାଇଥିଲେ । ଅବକାରୀ ବିଭାଗ ଚଢାଉ ବେଳେ ଘରେ ତାଲା ପଡିଥିବାରୁ ତାକୁ ଭାଙ୍ଗି ଘରେ ପଶିଥିଲା । ଆଉ ଘର ଭିତରୁ ମିଳିଥିଲା ବିପୁଳ ପରିମାଣର ବିଦେଶୀ ମଦ ବୋତଲର ଠିପି , ଲେବଲ ଓ ଏକ୍ସସାଇଜ ଆଢେସିଭ ଲେବଲ । ସେପଟେ ନକଲି ସାମଗ୍ରୀ ଆସିଥିବା ବସକୁ ମଧ୍ୟ ଜବତ କରା ଯାଇଛି ।