ଅନୁଗୁଳ – ପୌର ନିର୍ବାଚନ ପାଇଁ ରାଜନୀତି ସରଗରମ ହୋଇ ଉଠିଛି । ନିଜ ନିଜ ଦଳର ପତିଆରା କେମିତି ଜାହିର ହେବ ସେଥିପାଇଁ ସମସ୍ତ ଚେଷ୍ଟା କରୁଛନ୍ତି ତିନି ପ୍ରମୁଖ ଦଳ । ତେବେ କିଏ କେଉଠି ଜିତିବ ସେହି ଆକଳନ ନେଇ ସମସ୍ତ ଦଳ ପ୍ରାର୍ଥୀ କରୁଥିବା ବେଳେ ପ୍ରାଠୀତ୍ଵ ନ ମିଳିବାରୁ ଅସନ୍ତୋଷ ମଧ୍ୟ ଦେଖା ଦେଇଛି । କିଛି ଦିନ ଆଗରୁ ଜିଲ୍ଲାର ବରିଷ୍ଠ ଓକିଲ ତଥା ପୂର୍ବତନ ଓକିଲ ସଂଘ ସଭାପତି ଦିଲୀପ ଦାସ ଏଭଳି ଅସନ୍ତୁଷ୍ଟ ହୋଇ କଂଗ୍ରେସ ଛାଡିଥିଲେ । ଆଜି ସେ ବିଧିବଦ୍ଧ ଭାବେ ବିଜେପିରେ ଯୋଗ ଦେଇଛନ୍ତି । ସେହିଭଳି ଅନେକ ଦିନ ହେଲା ବିଜୁ ଜନତା ଦଳ ପାଇଁ କାମ କରି ଆସୁଥିବା ସୁନୀଲ କୁମାର ସାହୁ(ପୁଇନ) ଚଳିତ ପୌର ନିର୍ବାଚନରେ ପୌରଧ୍ୟକ୍ଷ ପ୍ରାର୍ଥୀ ହେବା ପାଇଁ ଆଶା ରଖିଥିଲେ । ତେବେ ବିଜେଡ଼ି କଂଗ୍ରେସ ଦଳ ଛାଡି ଗତ ଫେବୃୟାରୀ ମାସ ୨୮ ତାରିଖରେ ବିଜେଡ଼ିରେ ଯୋଗଦାନ କରିଥିବା ଅକ୍ଷୟ କୁମାର ସାମନ୍ତଙ୍କୁ ପ୍ରାର୍ଥୀ କରିଥିଲା । ଏଥିପାଇଁ ସୁନୀଲ ମଧ୍ୟ ଆଜି ବିଧିବଦ୍ଧ ଭାବେ ବିଜେଡ଼ି ଛାଡି ବିଜେପିରେ ଯୋଗ ଦେଇଛନ୍ତି । ଆଜି ଉଭୟ ଦିଲୀପ ଓ ସୁନୀଲଙ୍କ ସହ ବିଜେଡ଼ିରୁ ସଞ୍ଜୟ ସାହୁ , କଂଗ୍ରେସରୁ ଶରତ ମୁଖି ଆଦି ଦିଲ୍ଲୀ ଠାରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଉପସ୍ଥିତିରେ ବିଜେପିରେ ଯୋଗ ଦେଇଛନ୍ତି ।