ଅନୁଗୁଳ – ପୌର ନିର୍ବାଚନ ପାଇଁ ଭୋଟ୍ ତାରିଖ ଯେତିକି ପାଖେଇ ଆସୁଛି , ପୌରାଞ୍ଚଳ ଇଲାକାରେ ପ୍ରଚାର ସେତିକି କୋର୍‌ଦାର ହେଉଛି । ବିଜେଡି ନଗରପାଳ ପ୍ରାର୍ଥୀ ଅକ୍ଷୟ କୁମାର ସାମନ୍ତ , ବିଜେପି ନଗରପାଳ ପ୍ରାର୍ଥୀ ଦିଲ୍ଲୀପ କୁମାର ପ୍ରଧାନ ଓ କଂଗ୍ରେସ ନଗରପାଳ ପ୍ରାର୍ଥୀ ବଲବୀର ସିଂହଙ୍କ ସପକ୍ଷରେ ଦଳର ବରିଷ୍ଠ ନେତୃବର୍ଗ ଦିନରାତି ଏକ କରିଦେଇଛନ୍ତି । ସେପଟେ କଂଗ୍ରେସରୁ ନଗଦ ଆସି ବିଜେଡ଼ିରେ ସାମିଲ ହୋଇଥିବା ଅକ୍ଷୟ ସାମନ୍ତ ନିର୍ବାଚନୀ ମଇଦାନରେ ନିଜର ବଳ କଳ ଲଗାଇ ଦେଇଛନ୍ତି । ତାଙ୍କ ଉପରେ ବିଜେଡ଼ିର  କିଛି କର୍ମୀ ଅସନ୍ତୁଷ୍ଟ ଥିବା ବେଳେ ସେ ସମସ୍ତଙ୍କୁ ମନାଇବାରେ ଉଦ୍ୟମ ଜାରି ରଖିଛନ୍ତି । ଆଉ ଏଥିରେ ଅନେକ ମାତ୍ରାରେ ସଫଳ ହୋଇ ନିଜ ଶକ୍ତି ବଢାଇବାରେ ସମର୍ଥ ମଧ୍ୟ ହୋଇଛନ୍ତି । ଅକ୍ଷୟଙ୍କ ସପକ୍ଷରେ ବିଜେଡି ଭିନ୍ନ ଗୋଷ୍ଠୀର ସଦସ୍ୟ ଦୁଇ ପୂର୍ବତନ ନଗରପାଳ ଶକ୍ତିପ୍ରସାଦ ପଟ୍ଟନାୟକ ଓ ଭକ୍ତିପ୍ରସାଦ ଦାସ ପ୍ରଚାର ଚଳାଇଥିବା ରାଜନୈତିକ ମହଲରେ ରୋଚକ ଚର୍ଚ୍ଚାର ଖୋରାକ୍‌ ଯୋଗାଇ ଥିବା ବେଳେ ଏଥିରେ ଅକ୍ଷୟଙ୍କ ସାମର୍ଥ୍ୟ ବୃଦ୍ଧି ପାଇବ ବୋଲି ଆଶା କରାଯାଉଛି । ସାଂସଦ ମହେଶ ସାହୁ ନିଜେ ଅନୁଗୁଳ ପୌରପାଳିକାର ମଙ୍ଗ ଧରିଥିବା ବେଳେ ଏହି ଦୁଇ ବିଜେଡି ନେତା ଶକ୍ତି ଓ ଭକ୍ତି ବିଭିନ୍ନ ସାହି , ଗୋଷ୍ଠୀକୁ ଭେଟି ବିଜେଡ଼ିରେ ଭୋଟ ଦେବା ପାଇଁ ନିବେଦନ କରୁଛନ୍ତି । ଦୀର୍ଘ ଦିନର ନିରବତା ପରେ ଦୁଇ ପୂର୍ବତନ ନଗରପାଳଙ୍କ ସକ୍ରିୟତା ଖୋଦ୍ ବିଜେଡି କର୍ମୀ ମାନଙ୍କୁ ଉତ୍ସାହିତ କରିଥିବା ବେଳେ ଅକ୍ଷୟଙ୍କ ବଳ ବୃଦ୍ଧିରେ ସହାୟକ ହେବ ବୋଲି ଚର୍ଚ୍ଚା ହେଉଛି ।