ତାଳଚେର – ୧୯୫୨ ମସିହାରେ ସ୍ଥାପିତ ତାଳଚେର ପୌରପାଳିକା ତା’ର ୭୧ ତମ ଜନ୍ମ ଦିବସ ତଥା ସ୍ବାୟତ୍ତ ଶାସନ ଦିବସ ପାଳନ କରିଥିବାବେଳେ ଅବ୍ୟବସ୍ଥା ଭିତରେ ଏହା ପାଳିତ ହୋଇଛି । ସ୍ବାୟତ୍ତ ଶାସନ ଭଳି ଗୁରୁତ୍ଵପୂର୍ଣ୍ଣ ଦିବସରେ ପୌରାଧ୍ୟକ୍ଷ ପବିତ୍ର ଭୂତିଆଙ୍କ ସହିତ ୧୮ କାଉନ୍‌ସିଲର୍ ଯୋଗଦେଇ ନଥିବାରୁ ଏହା ଚର୍ଚାର ବିଷୟ ପାଲଟିଛି । ୨ଜଣ କାଉନସିଲର୍ , ଅଳ୍ପକେତେ ଜଣ କର୍ମଚାରୀ , ପୌର ନିର୍ବାହୀ ଅଧିକାରୀଙ୍କୁ ନେଇ ଏହି ଉତ୍ସବ ମାତ୍ର ୧୦ ମିନିଟ୍‌ରେ ଶେଷ କରିଛନ୍ତି । ସୂଚନା ଅନୁସାରେ , ପୌର ବିଧି ବ୍ୟବସ୍ଥା ଅନୁଯାୟୀ ନଗରପାଳ ପୌରପରିଷଦର ମୁଖ୍ୟ ହୋଇଥିବାରୁ ସେ ଆଜି ପୌରପାଳିକାରେ ଜାତୀୟ ପତାକା ଉତ୍ତୋଳନ କରିବା କଥା । ହେଲେ ଏହି କାର୍ଯ୍ୟକ୍ରମରେ ଶାସକ ବିଜେଡିର ନଗରପାଳ ପବିତ୍ର ଭୂତିଆଙ୍କ ସମେତ ୧୮ ଜଣ କାଉନସିଲର୍‌ ଆସି ନଥିଲେ । ପୌର ନିର୍ବାହୀ ଅଧିକାରୀ ରଶ୍ମିରେଖା ଅମାନ୍ତ ଏହି ଅବସରରେ ଭାଷଣ ଦେଇ ନଗରପାଳ ଅନୁପସ୍ଥିତ ଥିବାରୁ ଦୁଃଖ ପ୍ରକାଶ କରିଥିଲେ । ଏ ସମ୍ପର୍କରେ ନଗରପାଳ ଶ୍ରୀ ଭୂତିଆଙ୍କୁ ପଚାରିବାର ସେ କହିଥିଲେ ‘ ପୌର ନିର୍ବାହୀ ଅଧିକାରୀ ଏଠାରେ ନିଜ ମନଇଛା କାମ କରୁଛନ୍ତି । ଉତ୍ସବ ପାଇଁ ନିର୍ବାଚିତ ପ୍ରତିନିଧିମାନଙ୍କୁ ନିମନ୍ତ୍ରଣ ନକରି ଉତ୍ସବରେ ଯୋଗଦେବା ପାଇଁ ଦ୍ଵାଟ୍ସଆପ୍ ଗ୍ରୁପରେ ଜଣାଇ ଦେଇଥିଲେ । ଗତ ଦୁଇବର୍ଷ ଧରି କରୋନା କଟକଣା ଯୋଗୁଁ ଠିକ୍ ରୂପେ ସ୍ବାୟତ୍ତ ଶାସନ ଦିବସ ପାଳିତ ହୋଇ ନଥିଲା । ଚଳିତବର୍ଷ ଏହି କଟକଣା ନଥିବାରୁ ଉତ୍ସବକୁ ସ୍ଥାନୀୟ ବିଧାୟକ , ସାଂସଦଙ୍କ ସହ ଗୁରୁଜନ , ବରିଷ୍ଠ ନାଗରିକଙ୍କୁ ନିମନ୍ତ୍ରଣ କରାଯିବା ଉଚିତ ଥିଲା । ମାତ୍ର ପୌର ନିର୍ବାହୀ ଅଧିକାରୀ କେବଳ ମୋବାଇଲ୍ ମେସେଜ୍‌ରେ କାର୍ଯ୍ୟ ସମ୍ପାଦନ କରିଦେଲେ । ଏଥିପାଇଁ ସେମାନେ ଏଜି କାର୍ଯ୍ୟକ୍ରମରେ ଯୋଗ ଦେଇ ନାହାନ୍ତି । ଆଉ ଆଗକୁ ନିର୍ବାହୀ ଅଧିକାରୀଙ୍କ ଏଭଳି ଆଚରଣ ପାଇଁ ଗଣତାନ୍ତ୍ରିକ ପଦ୍ଧତିରେ ତୀବ୍ର ବିରୋଧ କରାଯିବ ବୋଲି ଚେତାବନୀ ଦେଇଛନ୍ତି । ତାଳଚେର ପୌରପାଳିକାର ୧୮ଜଣ କାଉନସିଲର୍ ଓ ନଗରପାଳ ବିଜେଡିର ହୋଇଥିବା ବେଳେ ବିଧାୟକ ଓ ସାଂସଦ ମଧ୍ୟ ଏହି ଦଳର । ମାତ୍ର ପୌର ଉତ୍ସବରେ ସେମାନଙ୍କୁ ଅଣଦେଖା କରାଯିବା ଘଟଣା ମଧ୍ୟରେ ତୀବ୍ର ଅସନ୍ତୋଷ ସୃଷ୍ଟି କରିଛି । ଏ ସଂପର୍କରେ ତାଳଚେର ପୌର ନିର୍ବାହୀ ଅଧିକାରୀ ରଶ୍ମିରେଖା ଅମାନ୍ତଙ୍କୁ ପଚାରିବାରୁ ସେ କହିଛନ୍ତି ‘ ଆଜିର ଉତ୍ସବରେ ନଗରପାଳଙ୍କ ସହିତ ଅଧିକାଂଶ କାଉନସିଲର୍ ଉପସ୍ଥିତ ନଥିଲେ । ସ୍ବାୟତ୍ତ ଶାସନ ଦିବସ ପାଳନ କରିବା କର୍ତ୍ତବ୍ୟ ହେଉଛି ପୌରାଧ୍ୟକ୍ଷଙ୍କର । ତାଙ୍କୁ ଫୋନ ଯୋଗେ ଯୋଗାଯୋଗ କରିଥିଲେ ମଧ୍ୟ ସେ ଫୋନ ରିସିଭ୍ କରି ନଥିଲେ । କର୍ମଚାରୀଙ୍କୁ ମଧ୍ୟ ତାଙ୍କ ପାଖକୁ ପଠାଇଥିଲି । ମାତ୍ର ସେ ଆସିବାକୁ ମନା କରିଦେଇଥିଲେ । ତେଣୁ ଉପସ୍ଥିତ ଥିବା କର୍ମଚାରୀ ଓ କାଉନସିଲରଙ୍କୁ ନେଇ ଉତ୍ସବ ପାଳନ କରିଥିଲୁ ।