ଅନୁଗୁଳ – ଅନୁଗୁଳ ଅବକାରୀ ବିଭାଗକୁ ପୁଣି ମିଳିଛି ଏକ ବଡ଼ ସଫଳତା । ବ୍ରାଉନସୁଗାର ବିକ୍ରି ପାଇଁ ନେଉଥିବା ବେଳେ ଏହି ବେପାରରେ କିଙ୍ଗପିନ କୁହା ଯାଉଥିବା ଜଣେ ମହିଳା ଓ ତାର ସହଯୋଗୀକୁ ଗିରଫ କରାଯାଇଛି । ସୂଚନା ଅନୁସାରେ ଗିରାଙ୍ଗ ଅଂଚଳରେ ରହୁଥିବା ଝିଲି ସାହୁ ନାମକ ଜଣେ ମହିଳା ଅନେକଦିନ ହେଲା ବ୍ରାଉନସୁଗାର ବେପାର କରୁଥିବା ଖବର ମିଳିଥିବା ବେଳେ ଏହା ଉପରେ ଅବକାରୀ ବିଭାଗ ନଜର ରଖିଥିଲା । ଆଜି ସେ ବ୍ରାଉନସୁଗାର ନେଇ ଯାଉଥିବା ଖବର ପାଇ ଅବକାରୀ ବିଭାଗ ତାଳଚେର ମୁଣ୍ଡାସାହି ଠାରେ ତାକୁ ଧରି ଯାଞ୍ଚ କରିଥିଲା । ଯାଞ୍ଚ ବେଳେ ତା ନିକଟରୁ ୧୪୨ ଗ୍ରାମ ବ୍ରାଉନସୁଗାର ଜବତ ହୋଇଥିଲା । ଯାହାର ଆନୁମାନିକ ମୂଲ୍ୟ ୧୪ ଲକ୍ଷ ୨୦ ହଜାର ଟଙ୍କା ହେବ । ଝିଲି ସହ ତାର ସହଯୋଗୀ ପ୍ରଦ୍ୟୁମ୍ନ ସାହୁକୁ ଅବକାରୀ ବିଭାଗ ଗିରଫ କରିଛି । ଝିଲି ଅନେକ ଦିନ ହେଲା ଏହି ବେପାର କରୁଥିବା ବେଳେ ସେ ନାଲକୋ ଏବଂ ତାଳଚେର ଅଞ୍ଚଳରେ ଏହି ବ୍ୟବସାୟ କରି ଆସୁଥିଲା । ତେବେ ସେ କେଉଁଠାରୁ ଆଉ କିଭଳି ବ୍ରାଉନସୁଗାର ଆଣୁଥିଲା ସେ ନେଇ ତଦନ୍ତ କରା ଯାଉଛି ।