ଛେଣ୍ଡିପଦା – ଅନୁଗୁଳ ଜିଲା ଛେଣ୍ଡିପଦା ଥାନା ବରପଦା ଗ୍ରାମର ରୋଜାଲି ଦେହୁରୀ ୭ ବର୍ଷ ତଳେ କୁକୁରପେଟା ଗ୍ରାମର ଅନିଲ କୁମାର ସାହୁଙ୍କୁ ବିବାହ କରିଥିଲେ ।ବିବାହର ଏକ ବର୍ଷପରେ ଶଶୁର ଘର ଲୋକମାନେ ରୋଜାଲିକୁ ଯୈାତୁକ ନିର୍ଯ୍ୟାତନା ଦେବା ସହିତ ଜିବନରୁ ମାରି ଦେବା ପାଇଁ ଉଦ୍ୟମ କରିଥିଲେ ।ଏ ନେଇ ରୋଜାଲି ଛେଣ୍ଡିପଦା ଥାନାରେ ଅଭିଯୋଗ କରିଥିଲେ ।ଅଭିଯୋଗକୁ ଭିତ୍ତିକରି ପୋଲିସ ମାମଲା ରୁଜୁ କରିଥିବା ବେଳେ ଉକ୍ତ ମାମଲା ଏବେ ଅଦାଲତରେ ବିଚାରାଧିନ ରହିଛି । ଗତ ୧୭ ତାରିଖରେ ଅନିଲ ଦ୍ବିତୀୟ ପତ୍ନୀ ଗ୍ରହଣ କରିଥିବା ଖବର ପାଇ ପ୍ରଥମ ପତ୍ନୀ ରୋଜାଲି ନ୍ୟାୟ ଦାବିରେ ଅନିଲଙ୍କ ଘର ସମୁଖରେ ଧାରଣା ଦେଇଥିଲେ ।ଏହା ଦେଖି ଅନିଲଙ୍କ ପରିବାର ତାଲ ପକାଇ ଫେରାର ହୋଇଯାଇଥିଲେ । ୩ଦିନ ବସିବା ପରେ ଗ୍ରାମରେ ମହିଳା ସଂଘ ରୋଜାଲିକୁ ନ୍ୟାୟ ଦେବାପାଇଁ ବୈଠକ କରିଥିଲେ । ରବିବାର ଛେଣ୍ଡିପଦା ପୋଲିସ ଓ ଅନିଲଙ୍କର ଅନୁଗୋଳରୁ ଆସିଥିବା ଜୈନେକ ଆଇନଜିବୀ ରୋଜାଲିଙ୍କ ଯୌତୁକ ସାମଗ୍ରୀ ଫେରାଇବାକୁ ଅପରାହ୍ନରେ କୁକୁରପେଟା ଗ୍ରାମକୁ ଯାଇଥିଲେ ।ଯୌତୁକ ସାମଗ୍ରୀ ଅନିଲଙ୍କ ଘରୁ କଢାଯାଉଥିବା ବେଳେ ଗ୍ରାମର କିଛି ମହିଳା ଆସି ବିରୋଧ କରିବା ସହିତ ଏତେ ଦିନ ଯାଏ କୁଆଡେ ଯାଇଥିଲ କହି ପାରିତୁଣ୍ଡ କରିବା ଯୋଗୁଁ ଘଟଣା ସ୍ଥଳରେ ଉତ୍ତେଜନା ଦେଖାଦେଇଥିଲା । ପୋଲିସ ମହିଳା ମାନଙ୍କୁ ବୁଝାଇବା ପାଇଁ ଉଦ୍ୟମ କରିଥିଲେ ମଧ୍ୟ ମହିଳା ମାନେ ଶୁଣି ନଥିଲେ ।ଏହାପରେ ପୋଲିସ ଘଟଣା ସ୍ଥଳରୁ ପଳାଇ ଆସିବା ସହିତ ଆଇନଜିବୀଙ୍କୁ ମଧ୍ୟ ଚାଲିଯିବା ପାଇଁ କହିଥିଲେ ।କିନ୍ତୁ ଆଇନଜିବୀ ନ ଯାଇ ମହିଳାଙ୍କୁ ଆଇନ ଅନୁସାରେ କାମ କରିବା ପାଇଁ ବୁଝାଇବା ପାଇଁ ଉଦ୍ୟମ କରିଥିଲେ । ଆଇନଜିବୀ ଅନିଲଙ୍କ ସପକ୍ଷରେ କହୁଥିବା ନେଇ ମହିଳା ମାନେ ଉତ୍ତେଜିତ ହେବା ସହିତ ଆଇନଜିବୀଙ୍କୁ ମାଡ ମାରିଥିଲେ ।ଏହା ପରେ ଆଇନଜିବୀ ସେଠାରୁ ପଳାଇ ଆସିଥିଲେ ।ଖବର ଲେଖା ହେବା ସୁଦ୍ଧା ଥାନାରେ ଏ ନେଇ କୈାଣସି ମାମଲା ରଜୁ ହୋଇ ନାହିଁ ।ଅଭିଯୋଗ ଆସିଲେ ମାମଲା ରୁଜୁ କରାଯିବ ବୋଲି ଥାନା ଅଧିକାରୀ ଧିରେନ କୁମାର ବେହେରା ପ୍ରକାଶ କରିଛନ୍ତି ।