ଦୁଇ ଘଣ୍ଟାରେ ଚାରି ଜଣଙ୍କୁ ଗୋଡ଼ାଇ ମାରିଲା ହାତୀ

୩୦ ରୁ ଅଧିକ ହାତୀ ଗତ ଦୁଇ ମାସ ହେଲା ଅନୁଗୁଳ ସହର ଉପଖଣ୍ଡ ଏବଂ ଏହାର ଆଖପାଖ ଅଞ୍ଚଳରେ ଘୁରି ବୁଲୁଥିଲେ । ସେଥିରୁ ଗୋଠଛଡ଼ା ହୋଇ ଆଜି ଏକ ମାଈ ହାତୀ ଜିଲ୍ଲାରେ ଉତ୍ପାତ କରିଛି । ଜିଲ୍ଲାର ବିଭିନ୍ନ ସ୍ଥାନରେ ଆକ୍ରମଣ କରି ୪ ଜୀବନ ନେଇଛି । ଯାହାକୁ ନେଇ ଅସନ୍ତୋଷ ବଢିଛି । ପ୍ରାୟ ୨ ମାସ ହେଲା , ଅନୁଗୁଳ ସହର ଉପକଣ୍ଠ ଛେଳିଆପଡା , କାଙ୍ଗୁଳା ଆଦି ଅଞ୍ଚଳ ସହ ବଅଁରପାଳ , ମହିଧରପୁର ଓ ଏହାର ଆଖପାଖ ଅଞ୍ଚଳରେ ଏକ ୩୦ ରୁ ଅଧିକ ହାତୀ ଥିବା ଏକ ହାତୀ ପଲ ଘୁରି ବୁଲିବା ସହ ବ୍ୟାପକ ଫସଲ ନଷ୍ଟ କରୁଥିଲେ । ଶହ ଶହ ଏକର ଜମିରୁ ଧାନ ଫସଲ ସମେତ କୋବି , ଟମାଟୋ , ଆଳୁ ଭଳି ଅନେକ ପ୍ରକାର ପନିପରିବା ଫସଲ ନଷ୍ଟ ହୋଇଥିଲା । ହେଲେ ବନ ବିଭାଗ ଏହି ହାତୀପଲକୁ ଆଜି ଯାଏ ଘଉଡାଇବା କୁ ଅସଫଳ ହୋଇଛି । ଏପରିସ୍ଥଳେ ଆଜି ସେହି ହାତୀପଲରୁ ଗୋଟିଏ ମାଈ ହାତୀ ଗୋଠଛଡ଼ା ହୋଇ ଜିଲ୍ଲାରେ ଆତଙ୍କ ସୃଷ୍ଟି କରିଛି । ଏହି ଗୋଠଛଡ଼ା ମାଈ ହାତୀ ପ୍ରଥମେ ଛେଳିଆପଡ଼ାରେ ଫସଲ ଜଗିଥିବା ସୁବାଷ ବିଶ୍ୱାଳଙ୍କୁ ଆକ୍ରମଣ କରି ମାରି ଦେଇଥିଲା । ପରେ ଅଙ୍ଗାରବନ୍ଧ ଗାଁ ଦେଇ ଯାଉଥିବା ବେଳେ ବିଲରେ କାମ କରୁଥିବା ଅନିରୁଦ୍ଧ ସାହୁଙ୍କୁ ମାରିଥିଲା । ପରେ ତା ଯିବା ରାସ୍ତାରେ ଶୌଚ ପାଇଁ ଯାଇଥିବା ବାରସିଂହା ଗାଁର ରମେଶ ସ୍ୱାଇଁ ଓ ସନ୍ତରୀ ଗାଁରେ ଅଜୟ ସାମଲଙ୍କୁ ଗୋଡ଼ାଇ ମାରିଦେଇଥିଲା । ପରେ ସେହି ରାସ୍ତା ଦେଇ ହାତୀଟି ଢେଙ୍କାନାଳ ଜିଲ୍ଲାକୁ ପଳାଇ ଯାଇଥିବା ଜଣା ପଡ଼ିଛି । ତେବେ ଏଭଳି ଘଟଣା ପରେ ଏହି ସବୁ ଅଞ୍ଚଳରେ ଅସନ୍ତୋଷ ଦେଖା ଦେଇଛି । ବନ ବିଭାଗର ଉଦାସୀନତା ଓ ଦାୟିତ୍ବହୀନତା ଯୋଗୁଁ ଏଭଳି ଘଟଣା ଘଟିଥିବା ଲୋକ ଅଭିଯୋଗ କରିଛନ୍ତି । ତେବେ ଏଥିପାଇଁ ବନ ବିଭାଗ ହିଁ ଦାୟୀ ବୋଲି ପରିବେଶକର୍ମୀ ମତ ଦେଇଛନ୍ତି । ବନ ବିଭାଗ ଯେଉଁ ଭଳି ଭାବରେ ହାତୀର ଗତିପଥ ଉପରେ ନଜର ରଖିଵା କଥା ସେଭଳି କରୁ ନାହିଁ । ସେପଟେ ହାତୀ ଜନ ବସତି ମୁହାଁ ହେଲା ବେଳେ ଲୋକଙ୍କୁ ସଚେତନ ମଧ୍ୟ କରା ଯାଉ ନାହିଁ ବୋଲି ଅଭିଯୋଗ କରିଛନ୍ତି । ସେପଟେ ମୃତକଙ୍କ ପରିବାରକୁ କ୍ଷତିପୂରଣ ଓ ବନ ବିଭାଗ ଉପରେ କାର୍ଯ୍ୟାନୁଷ୍ଠାନ ଦାବି କରି ସ୍ଥାନୀୟ ଲୋକ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ମୃତଦେହ ରଖି ଆନ୍ଦୋଳନ କରିଥିଲେ । ପ୍ରଶାସନ ବହୁ ବୁଝାସୁଝା କରିବା ପରେ ମୃତକଙ୍କ ପରିବାରକୁ ୪ ଲକ୍ଷ ୬୫ ହଜାର ଟଙ୍କା ଲେଖାଏଁ କ୍ଷତିପୂରଣ ଦିଆଯିବ ବୋଲି ପ୍ରତିଶ୍ରୁତି ଦେବା ପରେ ଆନ୍ଦୋଳନ ପ୍ରତ୍ୟାହାର ହୋଇଥିଲା । ସେପଟେ ବନ ବିଭାଗ ଏଭଳି ଆକ୍ରମଣ କରିଥିବା ହାତୀ ଉପରେ ନଜର ରଖିଛି ବୋଲି ଆଞ୍ଚଳିକ ବନ ସଂରକ୍ଷକ କହିଛନ୍ତି । ଆଜିର ଘଟଣା ଦୁର୍ଭାଗ୍ୟଜନକ ବୋଲି କହିଛନ୍ତି । ତେବେ ବର୍ଷ ଆରମ୍ଭରୁ ଅନୁଗୁଳ ଜିଲ୍ଲାରେ ହାତୀ ଆକ୍ରମଣରେ ୫ ଜଣଙ୍କ ମୃତ୍ୟୁ ହେଲାଣି । ଗତ ୨ ତାରିଖ ଦିନ ହମାମିରା ଗାଁର ନିତ୍ୟା ଗୋଛାୟତ ନାମକ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଥିଲା ।

Advertisement