ଅନୁଗୋଳ – ଅନୁଗୋଳ ଜିଲ୍ଲା କୋଲିଏରୀ ଥନା ଅନ୍ତର୍ଗତ ଘଣ୍ଟପଡ଼ାଠାରେ ଥିବା ଗ୍ଲୋବାଲ କୋଲ ୱାସେରୀର ଜଣେ କର୍ମଚାରୀଙ୍କଠାରୁ ୯୭ ହଜାର ୬୯୦ ଟଙ୍କା ଲୁଟି ନେଇଛନ୍ତି ସାଇବର ଲୁଟେରା । ସୂଚନା ଅନୁସାରେ , ଝାଡ଼ଖଣ୍ଡ ଅଞ୍ଚଳର ଜିଆଉଲ ହକ୍ ନାମକ ଜଣେ କୋଲ ୱାସେରୀର କର୍ମଚାରୀଙ୍କୁ ୧୭ ତାରିଖରେ ଆକ୍ସିସ୍ ବ୍ୟାଙ୍କର ଏକ କ୍ରେଡିଟ କାର୍ଡ ମିଳିଥିଲା । ୨୩ ତାରିଖ ଅପରାହ୍ନରେ ଏକ ଅଜଣା ନମ୍ବରରୁ ଫୋନ୍ ତାଙ୍କ ପାଖକୁ ଆସିଥିଲା । କ୍ରେଡିଟ କାର୍ଡ ବିଭାଗରୁ କଗୁଥିବା କହି ତାଙ୍କ ନୂଆ କ୍ରେଡିଟ କାର୍ଡରେ ୨ ଅଫର ଆସିଛି ବୋଲି ଫୋନ କରିଥିବା ବ୍ୟକ୍ତି କହିଥିଲା । ଅଫର ସମ୍ପର୍କରେ ଶୁଣି ଜିଆଉଲ କାର୍ଡର ସମସ୍ତ ତଥ୍ୟ ସହ ତାଙ୍କ ମୋବାଇଲକୁ ଆସିଥିବା ଓଟିପି ଦେଇ ଦେଇଥିଲେ । ଏହାପରେ ତାଙ୍କ କ୍ରେଡିଟ କାର୍ଡରୁ ୯୭ ହଜାର ୬୯୦ ଟଙ୍କା କଟିଥିବା ମେସେଜ୍ ଆସିଥିଲା । ଏ ନେଇ ଜିଆଉଲ ଆକ୍ସିସ୍ ବ୍ୟାଙ୍କରେ ଲିଖିତ ଅଭିଯୋଗ କରିବାପରେ ସୋମବାର ଅନୁଗୋଳ ସାଇବର ଥାନାରେ ଲିଖିତ ଅଭିଯୋଗ କରିଛନ୍ତି । ଅଭିଯୋଗ ପାଇ ପୁଲିସ ଏକ ମାମଲା ରୁଜୁକରି ଘଟଣାର ତଦନ୍ତ ଆରମ୍ଭ କରିଛି ।