ଅନୁଗୋଳ – ଆସନ୍ତା ୨୦ ତାରିଖରୁ ରଥଯାତ୍ରା । ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ଯଥାରୀତି ନୀତି ଅନୁସାରେ ଅନୁଗୋଳ ଶୈଳ ଶ୍ରୀକ୍ଷେତ୍ରରେ ରଥଯାତ୍ରା ଅନୁଷ୍ଠିତ ହେବ । ଏଥିପାଇଁ ସମୟ ନିର୍ଘଣ୍ଟ କରା ଯାଇଛି । ରଥଯାତ୍ରା ୨୦ ତାରିଖ ଦିନ ସକାଳ ୫:୩୦ ସୂର୍ଯ୍ୟ ପୂଜା,ଦ୍ୱାରପାଳ ପୂଜା ଠାରୁ ଆରମ୍ଭ ହେବ । ସକାଳ ୯ ଟାରେ ପହଣ୍ଡି ହୋଇ ଦିନ ୧୨ଟା ସମୟରେ ଛେରା ପହଁରା ଏବଂ ଦିନ ୨:୩୦ ରେ ରଥ ଟଣା କାର୍ଯ୍ୟ ଆରମ୍ଭ ହୋଇ ସନ୍ଧ୍ୟା ୬.୩୦ରେ ରଥ ଶ୍ରୀଗୁଣ୍ଡିଚା ଚକଡ଼ାରେ ପ୍ରବେଶ କରିବାକୁ ଧାର୍ଯ୍ୟ କରା ଯାଇଛି । ତେବେ ଚଳିତ ବର୍ଷ ଖରା ଅଧ‌ିକ ଥିବାରୁ ଭକ୍ତ ମାନଙ୍କ ଉପରେ ପାଣି ସିଞ୍ଚନର ବ୍ୟବସ୍ଥା କରାଯାଇଛି । ଏହା ସହ ଆଲୋକ , ପାନୀୟ ଜଳ, ପରିମଳ ଓ ସୁରକ୍ଷା ପାଇଁ ସବୁ ପ୍ରକାର ବନ୍ଦୋବସ୍ତ କରାଯାଇଛି ବୋଲି ଆଜି ଏକ ସାମ୍ବାଦିକ ସମ୍ମିଳନୀରେ ସୂଚନା ଦିଆ ଯାଇଛି । ଏହି ସମ୍ମିଳନୀରେ ମନ୍ଦିର ପରିଚାଳନା କମିଟିର ସମ୍ପାଦକ ହେମନ୍ତ କୁମାର ଦାଶ , ଯୁଗ୍ମ ସମ୍ପାଦକ ଆନନ୍ଦ ଚନ୍ଦ୍ର ମହାପାତ୍ର,ବିଶେଷ ପୂଜା ନୀତିର ମୁଖ୍ୟ ଭବାନୀ ପ୍ରସାଦ ମିଶ୍ର , ଅନୁଗୋଳ ପୌରାଧ୍ୟକ୍ଷ ଅକ୍ଷୟ କୁମାର ସାମନ୍ତ ଏବଂ ଜିଲ୍ଲା ଲୋକ ସମ୍ପର୍କ ଅଧିକାରୀ କୈଳାସ ଚନ୍ଦ୍ର ବେହେରା ପ୍ରମୁଖ ଯୋଗ ଦେଇ ରଥ ଯାତ୍ରା ପ୍ରସ୍ତୁତି ନେଇ ସବିଶେଷ ତଥ୍ୟ ଦେଇଥିଲେ । ୨୪ ତାରିଖରେ ହେରାପଞ୍ଚମି , ୨୮ ତାରିଖରେ ବାହୁଡା଼ ଯାତ୍ରା ଅନଷ୍ଠିତ ହେବ । ଆଡ଼ପ ମଣ୍ଡପରେ ୨୧ ରୁ ୨୭ ତାରିଖ ପର୍ଯ୍ୟନ୍ତ ସାଂସ୍କୃତିକ କାର୍ଯ୍ୟକ୍ରମ ଏବଂ ଶ୍ରୀମନ୍ଦିରରେ ୨୮ ଓ ୨୯ ତାରିଖ ଦୁଇ ଦିନ ଧରି ସାଂସ୍କୃତିକ କାର୍ଯ୍ୟକ୍ରମ କରାଯିବ। ଏହାଛଡା ରଥ ଯାତ୍ରା ସମୟରେ ସବୁ ବର୍ଷ ପରି ଧାରା ବିବରଣୀ ପ୍ରଦାନ ଓ ସ୍ମରଣିକା ଉନ୍ମୋଚନ କାର୍ଯ୍ୟକ୍ରମ ରହିଛି ।