ବିକୁଥିଲେ ନକଲି ଔଷଧ – ବିଜେପି ନେତାଙ୍କ ଦୋକାନ ସମେତ ଦୁଇ ଦୋକାନ ସିଲ

ଅନୁଗୋଳ – ନକଲି ଔଷଧ ବିକ୍ରି ଅଭିଯୋଗରେ ଅନୁଗୋଳର ଗୋଟିଏ ଔଷଧ ଦୋକାନ ଓ ଆଉ ଏକ ହୋଲସେଲ ଦୋକାନକୁ ସିଜ କରା ଯାଇଛି । ଏହି ଦୁଇ ଦୋକାନରେ ପାଣ୍ଟୋସିଡ ଡିଏସଆର ନାମକ ନକଲି ଔଷଧ ବିକ୍ରି ହେଉଥିବା ଅଭିଯୋଗ ହୋଇଛି । ସୂଚନା ଅନୁସାରେ ଅନୁଗୋଳ ପୁରୁଣା ବସଷ୍ଟାଣ୍ଡ ନିକଟରେ ଥିବା ମା ବୁଢ଼ୀ ମେଡ଼ିସିନ ଦୋକାନରେ ପାଣ୍ଟୋସିଡ ଡିଏସଆର ନାମକ ଔଷଧ ନକଲି ଥିବା ଅଭିଯୋଗ ହୋଇଥିଲା । ଯାହାକି ଗ୍ୟାଷ୍ଟିକ ରୋଗ ପାଇଁ ବ୍ୟବହାର ହୋଇଥାଏ । ଏହି ଅଭିଯୋଗ ଷ୍ଟେଟ ଟାସ୍କ ଫୋର୍ସ ନିକଟରେ ହେବା ପରେ ରାଜ୍ୟ ଡ୍ରଗ୍ସ କଣ୍ଟ୍ରୋଲ ତଦନ୍ତ କରିଥିଲା । ଏହି ତଦନ୍ତ ବେଳେ ମା ବୁଢ଼ୀ ଔଷଧ ଦୋକାନରେ ଏହି ନକଲି ଔଷଧ ବିକ୍ରି ହେଉଥିବା ସ୍ପଷ୍ଟ ହୋଇଥିବା ବେଳେ ସେ ଅମଲାପଡା ଠାରେ ଥିବା ଗଣପତି ଏଣ୍ଟରପ୍ରାଇଜେସରୁ ଏହି ଔଷଧ ଆଣିଥିବା ଜଣା ପଡିଥିଲା । ଏହା ଜଣା ପଡିବା ପରେ ଗତକାଲି ରାତିରେ ଏସ ଟି ଏଫ ଗୋଟିଏ ଓ ଡ୍ରଗ୍ସ କଣ୍ଟ୍ରୋଲ ପକ୍ଷରୁ ଆଉ ଗୋଟିଏ ଅଭିଯୋଗ ଅନୁଗୋଳ ଥାନାରେ କରା ଯାଇଥିଲା । ଆଉ ଏହି ଅଭିଯୋଗ ଆଧାରରେ ଆଜି ଉଭୟ ଦୋକାନକୁ ସିଲ କରାଯାଇଛି । ସବୁଠାରୁ ବଡ କଥା ହେଲା ଯେ ମା ବୁଢ଼ୀ ମେଡ଼ିସିନ ଷ୍ଟୋର ଜିଲ୍ଲା ବିଜେପିର ସାଧାରଣ ସମ୍ପାଦକ ସୁଦୀପ ଗଡନାୟକଙ୍କ ବୋଲି ଜଣା ପଡିଛି । ଜଣେ ନେତା ହୋଇ ଏଭଳି ନକଲି ମେଡ଼ିସିନ ବିକ୍ରି କରିବା ଅଭିଯୋଗ ଆସିବା ପରେ ଏବେ ଅନୁଗୋଳରେ ଚର୍ଚ୍ଚାର ବିଷୟ ପାଲଟିଛି । ଆଜି ଏହି ସିଲ ବେଳେ କଟକ ଆଡିସିନାଲ ଡ୍ରଗ୍ସ କଣ୍ଟ୍ରୋଲର ଧର୍ମଦେବ ପୁହାଣ , ଆଡିସିନାଲ ଡ୍ରଗ୍ସ କଣ୍ଟ୍ରୋଲର  ତୁଷାର ରଂଜନ ପାଣିଗ୍ରାହୀ , କଟକ ଡ୍ରଗ୍ସ ଇନ୍ସିପେକ୍ଟର ହରିପ୍ରିୟା ମଲ୍ଲିକ , ଅନୁଗୋଳ ଡ୍ରଗ୍ସ ଇନ୍ସପେକ୍ଟର ମୁକ୍ତିନନ୍ଦା ଶତପଥିଙ୍କ ସହ ଅନୁଗୋଳ ଆଡିସିନାଲ ତହସିଲଦାର ପ୍ରଶାନ୍ତ ସିଂ ମ୍ୟାଜିଷ୍ଟ୍ରେଟ ଭାବେ ଉପସ୍ଥିତ ଥିଲେ ।ଅନୁଗୁଳ ଏସ୍ଡିଜେଏମଙ୍କ କୋର୍ଟରେ ଏକ ମାମଲା ରୁଜୁକରାଯିବାସହ ଅନୁଗୁଳ ଥାନାରେ ଉଭୟ ସଂସ୍ଥାର ୪ ଜଣ ପାର୍ଟନରଙ୍କ ନାମରେ ଲିଖିତ ଅଭିଯୋଗ କରାଯାଇ ଏକ ମାମଲା ରୁଜୁ କରାଯାଇଛି।

Advertisement