ଅନୁଗୋଳ – ଅନୁଗୋଳ ଅବକାରୀ ବିଭାଗକୁ ବ୍ରାଉନସୁଗାର ବେପାରୀଙ୍କୁ ଧରିବାରେ ଆଉ ଏକ ସଫଳତା ମିଳିଛି । ତାଳଚେର ସମଲ ଅଞ୍ଚଳରେ ବ୍ୟାପକ ଭାବେ ଏହି କାରବାର ବଢି ଚାଲିଥିବା ବେଳେ ଆଜି ସେହି ଅଞ୍ଚଳରୁ ବିଜୟ ସାହୁ ନାମକ ଜଣେ ବ୍ରାଉନସୁଗାର ବେପାରିକୁ ତାଳଚେର ଅବକାରୀ ବିଭାଗ ଗିରଫ କରିଛି । ସୂଚନା ଅନୁସାରେ ସମଲ ଥାନା ସିଲଙ୍ଗ ଗାଁର ବିଜୟ ସାହୁ ବ୍ରାଉନସୁଗାର ଧରି ବିକ୍ରି କରିବାକୁ ଗରାଖ ଅପେକ୍ଷାରେ ଥିବା ତାଳଚେର ଅବକାରୀ ଥାନା ଅଧିକାରୀ କୁଳମଣି ମହାରଣା ଖବର ପାଇଥିଲେ । ଖବର ପାଇବା ପରେ ସେ ସଦଳବଳେ ପବିତ୍ରନଗର ଠାରେ ବିଜୟକୁ କାବୁ କରି ନେଇଥିଲେ । ଜାଞ୍ଚ ବେଳେ ତା ନିକଟରୁ ୨୦ ଗ୍ରାମ ବ୍ରାଉନସୁଗାର ଜବତ ହୋଇଥିଲା । ଯାହାର ଆନୁମାନିକ ମୁଲ୍ୟ ପ୍ରାୟ ୨ ଲକ୍ଷ ୫୦ ହଜାର ଟଙ୍କା ହେବ । ଅବକାରୀ ବିଭାଗ ତାକୁ ଗିରଫ କରି କୋର୍ଟ ଚାଲାଣ କରିଥିବା ବେଳେ ତା ନିକଟରୁ ଏକ ମୋଟରସାଇକେଲ ମଧ୍ୟ ଜବତ କରିଛି ।