ଅନୁଗୁଳ – ଅନୁଗୁଳର ବ୍ୟବସାୟୀ ସୁଶୀଲ ଅଗ୍ରୱାଲଙ୍କ ନାଁରେ ସୁଧ କାରବାର ଅଭିଯୋଗ ଆସିବା ପରେ ଅନୁଗୁଳ ସଦର ଥାନା ପୁଲିସ ତାଙ୍କୁ କୋର୍ଟ ଚାଲାଣ କରିବା ପରେ ଜାମିନରେ ଆସିଥିଲେ ବ୍ୟବସାୟୀ । ଆଉ ଜାମିନରେ ଆସିବା ପରେ ଏକ ସାମ୍ବାଦିକ ସମ୍ମିଳନୀ ଡାକି ନିଜକୁ ସଫେଇ ଦେଇଛନ୍ତି । ଏହା ସହ ପୁଲିସ ତାଙ୍କ ବିରୁଦ୍ଧରେ ମିଥ୍ୟା ମକଦମା କରିଥିବାରୁ ସେ ପୋଲିସ ବିରୁଦ୍ଧରେ କୋର୍ଟରେ ମାନହାନୀ ମକଦମା କରିବାକୁ ପ୍ରସ୍ତୁତ ହେଉଛନ୍ତି ବୋଲି କହିଛନ୍ତି । ସୂଚନା ଅନୁସାରେ ଛେଣ୍ଡିପଦା ଥାନା ବାଗଡିଆ ଗାଁର ଶିକ୍ଷକ ଵଂଶୀଧର ଦେହୁରୀ ସୁଶୀଲଙ୍କ ବିରୁଦ୍ଧରେ ଗତ ୧୨ ତାରିଖ ଅନୁଗୁଳ ସଦର ଥାନାରେ ଅଭିଯୋଗ କରିଥିଲେ ଯେ ସେ ସୁଶୀଲଙ୍କ ଠାରୁ ୫ଲକ୍ଷ ଟଙ୍କା କରଜ କରିଥିଲେ । ଆଉ ପରେ ସମୂଳସୁଧ ହିସାବରେ ୨୫ଲକ୍ଷ ଟଙ୍କା ଫେରାଇବାକୁ କହିବା ସହ ଟଙ୍କା ଆଦାୟ କରିବାକୁ ଧମକ ଦେଇଥିଲେ । ପୁଲିସ ଏହି ଘଟଣାରେ ଏକ ମକଦମା ରୁଜୁ କରି ସୁଶୀଳଙ୍କୁ ଗିରଫ କରିଥିଲା । ପରେ ଅବଶ୍ୟ ସୁଶୀଲଙ୍କୁ କୋର୍ଟରୁ ସଙ୍ଗେ ସଙ୍ଗେ ଜାମିନ ମିଳି ଯାଇଥିଲା ।

କିନ୍ତୁ ସୁଶୀଲ ଆଜି ସନ୍ଧ୍ୟାରେ ଏକ ସାମ୍ବାଦିକ ସମ୍ମିଳନୀରେ ନିଜକୁ ସଫେଇ ଦେବା ସହ ପୁଲିସ ନାମରେ ମାନହାନି ମୋକଦମା କରିବେ ବୋଲି କହିଛନ୍ତି । ତାଙ୍କ କହିବା ଵଂଶୀଧର ତାଙ୍କ ଠାରୁ ୩ ଟି ପର୍ଯ୍ୟାୟରେ ୧୧ଲକ୍ଷ ୭୦ହଜାର ଟଙ୍କା ନେଇଛନ୍ତି । ନିଜର ଜମି ବିକ୍ରି କରିବାକୁ ଵଂଶୀଧର ଏହି ଟଙ୍କା ନେଇଥିଲେ । ଏଥିପାଇଁ ସେ ସୁଶୀଲଙ୍କୁ ଚେକ ମଧ୍ୟ ଦେଇଛନ୍ତି । ନୋଟାରୀଙ୍କ ପାଖରେ ଜମି ପାଇଁ ଟଙ୍କା ନେଇଥିବା ସତ୍ୟପାଠ କରିଛନ୍ତି । ସେ ସବୁ ଡକୁମେଣ୍ଟ ପୁଲିସକୁ ଦେଖାଇବା ପରେ ମଧ୍ୟ ପୁଲିସ ଉଦ୍ଧେଶ୍ୟ ମୂଳକ ଭାବେ ମକଦମା ରୁଜୁ କଲା । ତେଣୁ ପୁଲିସ ବିରୁଦ୍ଧରେ ମାନହାନୀ ମକଦମା କରିବାକୁ ଚେତାବନୀ ଦେଇଛନ୍ତି । ତେବେ ପୂର୍ବରୁ ସୁଶୀଲଙ୍କ ନାମରେ ୭୦୦ ଏକର ଜମି ହଡପ ଏବଂ ଅନୁଗୁଳର ପୂର୍ବତନ ଜିଲ୍ଲାପାଳ ତଥା ଆଇଏଏସ ଅଫିସର ଅରବିନ୍ଦ ଅଗ୍ରୱାଲା ଏବଂ ମନୀଷ ଅଗ୍ରୱାଲାଙ୍କ ସୁସମ୍ପର୍କ ଥିବା କଥା କଂଗ୍ରେସ ଅଭିଯୋଗ କରିଥିଲା । କଂଗ୍ରେସ ଆହୁରି ମଧ୍ୟ ଅଭିଯୋଗ କରିଥିଲା ଯେ ଏହି ଦୁଇ ଆଇଏଏସ ଅଫିସରଙ୍କ ଜରିଆରେ ସୁଶୀଲ ଜମି କିଣାବିକା କାମ କରନ୍ତି । ତେବେ ଅନୁଗୁଳର ପୂର୍ବତନ ଜିଲ୍ଲାପାଳ ତଥା ଆଇଏଏସ ଅଫିସର ଅରବିନ୍ଦ ଅଗ୍ରୱାଲା ତାଙ୍କର ଦୂର ସମ୍ପର୍କୀୟ ଏବଂ ମନୀଷ ଅଗ୍ରୱାଲା ସହିତ ତାଙ୍କର କୌଣସି ସମ୍ପର୍କ ନାହିଁ ବୋଲି କହିବା ସହ ସେ କୌଣସି ଜମି ହଡପ ମାମଲାରେ ସମ୍ପୃକ୍ତ ନାହିଁ ବୋଲି ସମ୍ବାଦିକଙ୍କ ପ୍ରଶ୍ନର ଉତ୍ତର ଦେବାକୁ ଯାଇ କହିଥିଲେ ।