ଅନୁଗୋଳ – ଅନୁଗୋଳ ଜିଲ୍ଲାରେ କାର୍ଯ୍ୟରତ ଜଣେ ବରିଷ୍ଠ କିରାଣୀ ସାଇବର ଠକାମୀର ଶିକାର ହୋଇଛନ୍ତି । ଦୁର୍ବୃତ୍ତ ମାନେ ଅତି ଚାଲାକିରେ ତାଙ୍କ ଆକାଉଣ୍ଟରୁ ୧ ଲକ୍ଷ ୧୮ ହଜାର ୫୦୦ ଟଙ୍କା ଲୁଟି ନେଇଛନ୍ତି । ସୂଚନା ଅନୁସାରେ ଢେଙ୍କାନାଳ ଜିଲ୍ଲା କଣ୍ଟାନାଳୀର ବିଶ୍ୱ ରଞ୍ଜନ ପଣ୍ଡା ଅନୁଗୋଳ କୋର୍ଟରେ ବରିଷ୍ଠ କିରାଣୀ ଭାବେ କାମ କରନ୍ତି । ଗତ ଗୁରୁବାର ଦିନ ସେ ଅଫିସରେ କାମ କରୁଥିବା ବେଳେ ଦିନ ପ୍ରାୟ ୩.୪୫ ବେଳେ ତାଙ୍କ ମୋବାଇଲକୁ ଏକ ମେସେଜ ଆସିଥିଲା । ଯେଉଁଥିରେ ତାଙ୍କ କ୍ରେଡିଟ କାର୍ଡରେ ଥିବା ୮୮୯୪ ଟଙ୍କାର ପଏଣ୍ଟ ଆସନ୍ତାକାଲି ସମାପ୍ତ ହୋଇଯିବ । କ୍ୟାସବ୍ୟାକ ପାଇବାକୁ ହେଲେ ଦିଆଯାଇଥିବା ଲିଙ୍କରେ କ୍ଲିକ କରିବାକୁ ନିର୍ଦ୍ଦେଶ ଥିଲା । ଏହାପରେ ତାଙ୍କ କ୍ରେଡିଟ କାର୍ଡ ଆକାଉଣ୍ଟରୁ ପ୍ରଥମ କିସ୍ତିରେ ୪୮ ହଜାର ୫୦୦ ଟଙ୍କା ଓ ପରବର୍ତ୍ତୀ କିସ୍ତିରେ ୭୦ ହଜାର କଟି ଯାଇଥିଲା । ଏହା ଦେଖି ବିଶ୍ୱ ରଞ୍ଜନ ତୁରନ୍ତ ବ୍ୟାଙ୍କ ଆପ୍ଲିକେସନ ଜରିଆରେ କ୍ରେଡିଟ କାର୍ଡକୁ ବ୍ଲକ କରି ଦେଇଥିଲେ । ଫଳରେ ଠକ ଆଉ ଟଙ୍କା ନେଇ ପାରି ନଥିଲା । ଏଭଳି ସାଇବର ଠକଙ୍କ ଶିକାର ହେବା ପରେ ବିଶ୍ୱ ରଞ୍ଜନ ଅନୁଗୋଳ ଥାନାରେ ଲିଖିତ ଅଭିଯୋଗ କରିଛନ୍ତି । ଅଭିଯୋଗ ପାଇ ପୁଲିସ ଘଟଣାର ତଦନ୍ତ କରୁଛି ।