ଅନୁଗୁଳ – ଆସନ୍ତା ୧ ତାରିଖରେ ଆନ୍ଦୋଳନକୁ ଓଲ୍ହାଇବ ବିଜେଡି । ମୁଖ୍ୟତଃ ଜାତୀୟ ରାଜପଥ ଗୁଡିକର ଦୁରବସ୍ଥା ଓ ଏମ୍ ସି ଏଲ ବିସ୍ଥାପନ ନେଇ କରୁଥିବା ଟାଳଟୁଳ ନୀତି ବିରୁଦ୍ଧରେ ଜିଲ୍ଲା ବିଜେଡି ଆନ୍ଦୋଳନ ସ୍ୱରୂପ ଦୁଇ ଘଣ୍ଟିଆ ଜାତୀୟ ରାଜପଥ ଅବରୋଧ କରିବାକୁ ନିଷ୍ପତି ନେଇଛି । ଆଜି ଜିଲ୍ଲା ବିଜେଡି ପକ୍ଷରୁ ଏକ ସାମ୍ବାଦିକ ସମ୍ମିଳନୀରେ ଏ ନେଇ ସୂଚନା ଦିଆ ଯାଇଛି । ବିଜେଡି ର କହିବା କଥା ଗତ କିଛି ବର୍ଷ ହେଲା ଅନୁଗୁଳ ଜିଲ୍ଲା ଦେଇ ଯାଇଥିବା ରାଜପଥ ଗୁଡିକର ଅବସ୍ଥା ଶୋଚନୀୟ ହୋଇ ପଡିଛି । ଯେଉଁଥିପାଇଁ ଅନେକ ଧନ ଜୀବନ ଗଲାଣି । ହେଲେ ମଧ୍ଯ ଜାତୀୟ ରାଜପଥ ବିଭାଗର ନିଦ ଭାଙ୍ଗୁ ନାହିଁ । ଏପଟେ ଏମ୍ ସି ଏଲ ଅନୁଗୁଳ ଜିଲ୍ଲାର ଜମିହରା ପ୍ରଜା ମାନଙ୍କୁ ଦୁଃଖ କଷ୍ଟ ଦେଇ ଆସୁଛି । କେନ୍ଦ୍ର ସରକାରଙ୍କ ଥଇଥାନ ନେଇ ରହିଥିବା ୨୦୦୬ ପଲିସି ହେଉ କି ୨୦୧୩ ପଲିସିକୁ ସମାଧାନ କରୁ ନାହାନ୍ତି । ଯାହା ଫଳରେ ଜମି ହରା ପ୍ରଜା ମାନେ ବହୁ କଷ୍ଟରେ ଅଛନ୍ତି । ୩୦ ବର୍ଷ ହେଲା ଲୋକ ବିସ୍ଥାପନ ପ୍ରକ୍ରିୟାରେ ରହିଥିବା ବେଳେ ଆଜି ଯାଏ ସେମାନଙ୍କୁ ଥଇଥାନ କରା ଯାଉ ନାହିଁ । ଏମ୍ ସି ଏଲ କେବେ ହେଲେ ଆଖିଦୃଶିଆ ସି ଏସ୍ ଆର କାମ କରୁ ନାହିଁ । ତାଳଚେର ଅଂଚଳରେ ପ୍ରଦୂଷଣ ବୃଦ୍ଧି ଯୋଗୁଁ ହାର୍ଟ , କିଡନୀ , କ୍ୟାନସର ଭଳି ମାରାତ୍ମକ ରୋଗରେ ପଡୁଛନ୍ତି । ହେଲେ ଏ ନେଇ କୌଣସି ପ୍ରକାର ଦୃଷ୍ଟି ଦେଉ ନାହିଁ ଏମ୍ ସି ଏଲ । ଏଥିପାଇଁ ଜିଲ୍ଲା ବିଜେଡି ଏମ୍ ସି ଏଲ ଓ ଜାତୀୟ ରାଜପଥ ବିଭାଗକୁ ଚେତାବନୀ ଦେବାପାଇଁ ଦୁଇ ଘଣ୍ଟିଆ ଜାତୀୟ ରାଜପଥ ଅବରୋଧ କରିବ । ସକାଳ ୮ ରୁ ୧୦ ଯାଏ ଏହି ଅନୁଗୁଳ ସହର ପିଟିସି ଛକ ଠାରେ ଅନ୍ଦୋଳନ କରାଯିବ । ଏହାପରେ ମଧ୍ୟ ଉଭୟ ଜାତୀୟ ରାଜପଥ ବିଭାଗ ଓ ଏମ୍ ସି ଏଲ ଲୋକଙ୍କ ହିତ ପାଇଁ ଆଗେଇ ନ ଆସନ୍ତି ତେବେ ଭବିଷ୍ୟତରେ ଯାହା କ୍ଷୟକ୍ଷତି ହେବେ ସେଥିପାଇଁ ସେହିମାନେ ହିଁ ଦାୟୀ ରହିବେ ବୋଲି ଚେତାବନୀ ଦିଆ ଯାଇଛି ।