ନାଲକୋନଗର – ଅନୁଗୁଳ ଜିଲ୍ଲା ଦେଇ ଯାଇଥିବା ୫୫ଜାତୀୟ ରାଜପଥ ନାଲକୋନଗର ଥାନା ଅନ୍ତର୍ଗତ ଦୈନିକ କୃଷକ ବଜାର ସମ୍ମୁଖରେ ଆଜି (ରବିବାର) ରାତି ୯ଘଟିକା ସମୟରେ ଏକ ପାଉଁଶ ବୋଝେଇ  ହାଇୱା ଧକ୍କାରେ ଜଣେ ମୋଟରସାଇକେଲ ଚାଳକଙ୍କ ଘଟଣା ସ୍ଥଳରେ ମୃତ୍ୟୁ ହୋଇଛି । ମୃତକ ଜଣଙ୍କ ହେଲେ କାମାକ୍ଷାନଗର ଅନ୍ତର୍ଗତ  ବାଉଁଶପାଳ ଗ୍ରାମର ନିର୍ମଳ ସାହୁଙ୍କ ପୁତ୍ର ଅନିଲ ସାହୁ । ସେ ନିଜ କୁଲାଡ଼ରେ ତାଙ୍କ ଭାଇଙ୍କୁ ଦେଖା କରି ସାରି ବଡକେରା ଶଶୁର ଘରକୁ  ଯାଉଥିବା ବେଳେ ଦୁର୍ଘଟଣା ଘଟିଥିଲା । ମିଳିଥିବା ସୂଚନା ଅନୁଯାୟୀ ୫୫ଜାତୀୟ ରାଜପଥ ଦେଇ ଅନଗୁଳରୁ ବଅଁରପାଳ ଅଭିମୁଖେ ଯାଉଥିବା ଏକ  ପାଉଁଶ ବୋଝେଇ ହାଇୱା ଟ୍ରକ ଅନିଲ ଏକ କଳା ରଙ୍ଗର ପଲସର (ଗାଡି ଓଡି-୦୬ଜି-୦୬୯୫) ରେ ଯାଉଥିବା ବେଳେ ଧକ୍କା ଦେଇଥିଲା । ଦୁର୍ଘଟଣାରେ ଅନିଲ ହାଇୱା ଗାଡିର ଚକା ତଳେ ପଡି ଯାଇଥିଲେ । ତାଙ୍କ ମୁଣ୍ଡରେ ଚକ ଚଢି ଯାଇଥିଲା । ଫଳରେ ହେଲମେଟ ପିନ୍ଧିଥିବା ସତ୍ବେ ଅନିଲ ମୁଣ୍ଡ କାପ୍ୟ ହୋଇଯିବା ଫଳରେ ଘଟଣା ସ୍ଥଳରେ ତାଙ୍କର ମୃତ୍ୟୁ ହୋଇଥିଲା । ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚିଲା ବେଳେ ହାଇୱା ଚାଳକ ଗାଡି ଛାଡି ଫେରାର ହୋଇଯାଇଥିଲା । ପୋଲିସ ଦୁର୍ଘଟଣାଗ୍ରସ୍ତ ଗାଡିକୁ ଜବତ କରି ତଦନ୍ତ କରୁଛି ।