ନାଲକୋନଗର – ଅନୁଗୁଳ ଜିଲ୍ଲା ନାଲକୋ ନଗର ଥାନା ସିପିପି ଛକ ନିକଟରେ ଥିବା ଜଣେ ସାଇକେଲ ଦୋକାନୀ ଆତ୍ମହତ୍ୟା କରିଥିବା ଜଣାଯାଇଛି । ସୂଚନା ଅନୁସାରେ ଢେଙ୍କାନାଳ ଜିଲ୍ଲା ପର୍ଜଙ୍ଗ ଥାନା ଅନ୍ତର୍ଗତ ରୋଡ ଅଞ୍ଚଳରେ ରାଜ କିଶୋର ମୁଦୁଲି , ଦୀର୍ଘଦିନ ଧରି ସିପିପି ଛକ ନିକଟରେ ଏକ ସାଇକେଲ ଦୋକାନ କରିଥିଲେ । ରାଜକିଶୋରଙ୍କ କିଛିଦିନ ହେବ ବଅଁରପାଳ ବ୍ଲକ ବନ୍ଦା ଗ୍ରାମରେ ଭଡା ନେଇ ପରିବାର ସହ ରହୁଥିଲେ । ପାରିବାରିକ କଳହ ପାଇଁ ରାଜ କିଶୋରଙ୍କ ପତ୍ନୀ ଭଡାଘରୁ ଛାଡି ନିଜ ବାପଘର କଲିୟରୀ ଥାନା ଅନ୍ତର୍ଗତ ଜାମ୍ବୁ ବାହାଳି ଗ୍ରାମକୁ ଚାଲିଯାଇଥିଲେ । ଗତକାଲି (ମଙ୍ଗଳବାର) ସେ ନିଜ ସ୍ତ୍ରୀଙ୍କ ପାଖକୁ ଯାଇଥିଲେ । ତେବେ ଆଜି ସକାଳେ ରାଜକିଶୋର ନିଜ ଦୋକାନ ଘର ଭିତରେ ଥିବା ଆଜବେଷ୍ଟ ପାଇପରେ ନିଜେ ପିନ୍ଧିଥିବା ସାର୍ଟ ସାହାଯ୍ୟରେ ମରୁତ ଅବସ୍ଥାରେ ଝୁଲି ରହିଥିବା ଦେଖିବାକୁ ମିଳିଥିଲା । ଖବର ପାଇ ସ୍ତ୍ରୀ ଓ ପରିବାର ଲୋକ ଘଟଣାସ୍ଥଳରେ ପହଞ୍ଚି ଥିବାବେଳେ ପୁଲିସ ଶବ ଉଦ୍ଧାର କରି ବ୍ୟବଛେଦ ପାଇଁ ପଠାଇଛି । ପ୍ରାଥମିକ ତଦନ୍ତରୁ ସେ ଆତ୍ମହତ୍ୟା କରିଥିବା ପୁଲିସ ଜାଣିବାକୁ ପାଇଛି । ଗତ କିଛିଦିନ ତଳେ ରାଜକିଶୋର ଆତ୍ମହତ୍ୟା ଉଦ୍ୟମ କରିଥିଲେ ବି ସ୍ଥାନୀୟ ଲୋକ ତାଙ୍କୁ ଉଦ୍ଧାର କରିଥିଲେ ।