କଣିହାଁ – ଅନୁଗୁଳ ଜିଲ୍ଲା କଣିହାଁ ଥାନା ଅନ୍ତର୍ଗତ ତାଳପଦା ଗ୍ରାମରେ ଗୁଣିଗାରେଡ଼ି ସନ୍ଦେହରେ ଜଣେ ବିବାହିତ ଯୁବକଙ୍କୁ ହତ୍ୟା କରାଯାଇଥିବା ମୃତକଙ୍କ ପତ୍ନୀ ଥାନାରେ ବୁଧବାର ଅଭିଯୋଗ କରିଛନ୍ତି । ମୃତକ ଜଣଙ୍କ ହେଲେ ଅରୁଣ ନାଏକ । ତାଙ୍କ ପତ୍ନୀ ଅନୀତା ନାଏକ ରେଙ୍ଗାଳି ଥାନା କରଡାଖମଣ ସ୍ଥିତ  ବାପଘରକୁ ୬ ଦିନ ତଳୁ ଯାଇଥିଲେ । ଏହି ସମୟରେ ହିଁ ତାଙ୍କୁ ହତ୍ୟା କରା ଯାଇଥିବା ସେ ଥାନାରେ ଅଭିଯୋଗ କରିଛନ୍ତି । ତାଙ୍କ ସ୍ତ୍ରୀଙ୍କ ଅଭିଯୋଗ ଅନୁସାରେ , ସେହି ଗ୍ରାମର ସୁରେଶ ବେହେରା, କାତୁ ବେହେରା, ମଳିଆ ବେହେରା ଗୁଣିଗାରେଡ଼ି କରୁଥିବା ନେଇ ପୂର୍ବରୁ ଅରୁଣଙ୍କୁ ସନ୍ଦେହ କରୁଥିବା ବେଳେ ଅନେକ ସମୟରେ ଧମକ ଚମକ ଦେଇ ମାଡ଼ପିଟି କରିଥିଲେ । ଆଉ ସେ ବାପା ଘରକୁ ଯାଇଥିବା ବେଳେ , ଅରୁଣ ଘରେ ଏକୁଟିଆ ଥିବାର ସୁଯୋଗ ନେଇ ତାଙ୍କୁ ହତ୍ୟା କରାଯାଇଥିବା ଅନୀତା ଅଭିଯୋଗ କରିଛନ୍ତି । କଣିହାଁ ଥାନା ପୁଲିସ ଶବ ଜବତ କରି ଶବ ବ୍ୟବଚ୍ଛେଦ ପାଇଁ ମଣ୍ଡାପାଳ ଡାକ୍ତରଖାନା ପଠାଇ ଏକ ହତ୍ୟା ମାମଲା ରୁଜୁ କରି ଘଟଣାର ଛାନଭିନ୍ ଚଳାଇଛି ।