ଅନୁଗୋଳ – ଅନୁଗୋଳ ଜିଲ୍ଲା ବଅଁରପାଳ ଥାନା ଫୁଲପଡାଠାରେ ଥିବା ଏକ ଘରୋଇ ସ୍କୁଲର ଛାତ୍ରୀଙ୍କୁ ସ୍କୁଲ ବସର ହେଲପର ମାଡ଼ ମାରିଥିବା ଅଭିଯୋଗ ହୋଇଛି । ସୂଚନା ଅନୁସାରେ ସାନ୍ତରାପୁର ଗ୍ରାମର ଜଣେ ୬ଷ୍ଠ ଶ୍ରେଣୀର ଛାତ୍ରୀ ଫୁଲପଡା ଅଞ୍ଚଳରେ ଥିବା ପ୍ରଜ୍ଞା ଜାଗୃତି ଶିକ୍ଷା ନିକେତନ ନାମକ ଏକ ସ୍କୁଲରେ ପାଠ ପଢନ୍ତି । ସମ୍ପୃକ୍ତ ଛାତ୍ରୀ ଜଣଙ୍କ ସ୍କୁଲ ବସରେ ଯିବା ଆସିବା କରନ୍ତି । ତେବେ ସ୍କୁଲ ବସର ହେଲପର ବିନା କାରଣରେ ସମ୍ପୁକ୍ତ ଛାତ୍ରୀଙ୍କୁ ଏକ ବାଡ଼ିରେ ମୁଣ୍ଡକୁ ପିଟିଥିଲେ । ଫଳରେ ଛାତ୍ରୀ ଜଣଙ୍କ ମୁଣ୍ଡ ଫୁଲି ଯାଇଥିବା ବେଳେ ତାଙ୍କୁ ଅସହ୍ୟ ଯନ୍ତ୍ରଣା ହୋଇଥିଲା । ଏ ନେଇ ଛାତ୍ରୀଙ୍କ ପରିବାର ସ୍କୁଲ କର୍ତ୍ତୃପକ୍ଷଙ୍କୁ ଅଭିଯୋଗ କରିଥିଲେ । ତେବେ ସ୍କୁଲ କର୍ତ୍ତୃପକ୍ଷ ଏ ନେଇ କୌଣସି କର୍ଣ୍ଣପାତ ନ କରିବାରୁ ବାଧ୍ୟ ହୋଇ ଏ ନେଇ ବଅଁରପାଳ ଥାନାରେ ଅଭିଯୋଗ କରା ଯାଇଛି ।