ଅନୁଗୋଳ – ଜୀବନସାଥୀ ଖୋଜି ଦେବାକୁ ଜିଲ୍ଲାପାଳଙ୍କୁ ଆବେଦନ । ଜିଲ୍ଲାପାଳଙ୍କ ଅଭିଯୋଗ ଶୁଣାଣି ବେଳେ ଏଭଳି ଆବେଦନ କରିଛନ୍ତି ଜଣେ ଦିବ୍ୟଙ୍ଗ ଯୁବକ । ସୂଚନା ଅନୁସାରେ ଅନୁଗୋଳ ଜିଲ୍ଲା ଛେଣ୍ଡିପଦା ଗୋଷ୍ଠୀ ଉନ୍ନୟନ କାର୍ଯ୍ୟାଳୟ ଠାରେ ଆଜି ଜିଲ୍ଲାପାଳଙ୍କ ଅଭିଯୋଗ ଶୁଣାଣି ଥିଲା । ଏହି ଅଭିଯୋଗ ଶୁଣାଣି ବେଳେ ନୂଆଁପଡା ଗାଁର ମୁରଲୀଧର ମହାପାତ୍ରଙ୍କ ସାନ ପୁଅ ସଞ୍ଜୀବ ମହାପାତ୍ର ନିଜ ଅଭିଯୋଗ ନେଇ ଆସିଥିଲେ । ତେବେ ସେ ଜିଲ୍ଲାପାଳଙ୍କୁ ଏକ ଅଜବ ଅଭିଯୋଗ କରିଥିଲେ । ସେ ତାଙ୍କ ଦରଖାସ୍ତରେ ନିଜେ ଭିନ୍ନକ୍ଷମ ହୋଇଥିବା ବେଳେ ବାପା – ମା ବୃଦ୍ଧ ହୋଇ ଯାଇଛନ୍ତି ଏବଂ ବଡ ଭାଇ ଅଲଗା ରହୁଥିବାରୁ ତାଙ୍କ ଚଳଣିରେ ଅସୁବିଧା ହେଉଛି ବୋଲି ଜଣାଇଥିଲେ । ଏଥିପାଇଁ ତାଙ୍କର ଜୀବନସାଥି ନିହାତୀ ଆବଶ୍ୟକ ବୋଲି ଗୁହାରି କରିଥିଲେ । ତେବେ ସେ ଭିନ୍ନକ୍ଷମ ଯୋଗୁଁ ତାଙ୍କୁ କେହି ଝିଅ ଦେଉ ନାହାନ୍ତି , ଏଣୁ ସେ ଜିଲ୍ଲାପାଳଙ୍କୁ ଜୀବନସାଥୀ ଯୋଗାଡି ଦେଲେ ସେ ଉପକୃତ ହେବେ ବୋଲି ନିବେଦନ କରିଛନ୍ତି । ଏହି ଘଟଣା ଆଜି ସବୁଠି ଚର୍ଚ୍ଚା ର ବିଷୟ ପାଲଟିଛି ।