ଅନୁଗୁଳ – ଅନୁଗୁଳ ସହରରେ ଥିବା ୨ଟି ଏଟିଏମ୍ ଲୁଟ୍ ଉଦ୍ୟମ କରିଥିବା ଲୁଟେରାକୁ ଗୁରୁବାର ପୁଲିସ ଗିରଫ କରିଛି । ସୂଚନା ଅନୁସାରେ ଗତ ୩୧ ତାରିଖରେ ହନୁମାନ ବଜାରରେ ଥିବା ଇଣ୍ଡିଆନ ଓଭରସିଜ୍ ବ୍ୟାଙ୍କ ଓ କାନାରା ବ୍ୟାଙ୍କର ଏଟିମ୍ କୁ ତାଡିଲୁଟ୍ କରିବାର ଉଦ୍ୟମ କରାଯାଇଥିଲା । ଏ ନେଇ ବ୍ୟାଙ୍କ କତ୍ତୃପକ୍ଷ ଥାନାରେ ଲିଖିତ ଅଭିଯୋଗ କରିବା ପରେ ପୁଲିସ ଏକ ମାମଲା ରୁଜୁକରି ଏଟିଏମ୍ ର ସିସିଟିଭି ଫୁଟେଜ୍ ଯାଞ୍ଚ କରିଥିଲା । ଆଉ ଏହି ସିସି ଟିଭି ଫୁଟେଜ ଆଧାରରେ ସୂଚନା ପାଇ ପୁଲିସ ସହରର ଜବରଦସ୍ତିପଡ଼ାର ଟୁନା@ମୁନା ଗୋଚ୍ଛାୟତଙ୍କୁ ଗିରଫ କରିଛି । ପୁଲିସ ସୂଚନା ଅନୁସାରେ ଟୁନା ଭୋର ୪ ତା ବେଳେ ଏକ ସ୍କୃ ଡ୍ରାଇଭର ସହାୟତାରେ ପ୍ରଥମେ କାନାରା ବ୍ୟାଙ୍କ ଏଟିଏମ ଲୁଟ କରିବାକୁ ଉଦ୍ୟମ କରିଥିଲା । ହେଲେ ଏଥିରେ ବିଫଳ ହେବା ପରେ ସେ ନିକଟରେ ଥିବା ଇଣ୍ଡିଆନ ଓଭରସିଜ୍ ବ୍ୟାଙ୍କ ଏଟିଏମକୁ ତାଡି ଟଙ୍କା ଲୁଟିବାକୁ ଚେଷ୍ଟା କରିଥିଲା । ହେଲେ ଏଥିରେ ବିଫଳ ହେବାରୁ ଘଟଣା ସ୍ଥଳରୁ ଚମ୍ପଟ ମାରିଥିଲା । ପୁଲିସ ଆଜି ତାକୁ ଗିରଫ କରିବା ସହ ତା ନିକଟରୁ ସ୍କୃ ଡ୍ରାଇଭର ଜବତ କରିଛି । ଟୁନା ସହରର ବିଭିନ୍ନ ସ୍ଥାନ ବୁଲି ଅଳିଆ ଆବର୍ଜନାରୁ ପ୍ଲାଷ୍ଟିକ ଗୋଟାଇ ବିକ୍ରି କରିଥାଏ ବୋଲି ଜଣା ପଡିଛି ।