ପାଲଲହଡା – ଶୁକ୍ରବାର ଅନୁଗୁଳ ଜିଲ୍ଲା ପାଲଲହଡା ଉପଖଣ୍ଡର ଉପାନ୍ତ ଅଞ୍ଚଳ ନଗିରା ପଞ୍ଚାୟତ ତନଗୁଳା ଗାଁରେ ଏକ ଅଭାବନୀୟ ଘଟଣା ଘଟି ଯାଇଛି । ନିଜ ପିଇସିକୁ ଜଣେ ପୁତୁରା ତଣ୍ଟି ଚିପି ହତ୍ୟା କରିଛି । ପରେ ଅଭିଯୁକ୍ତ ପୁତୁରା ଜଣଙ୍କ ନିଜେ ପାଲଲହଡା ଥାନାରେ ଆତ୍ମସମର୍ପଣ କରିଥିବା ସୂଚନା ମିଳିଛି । ମିଳିଥିବା ସୂଚନା ଅନୁସାରେ ଗୁରୁବାର ରାତିରେ ତନଗୁଳା ଗାଁର ପୁଟୁକି ଦେହୁରୀ ନାମକ ଜଣେ ମହିଳା ଘରେ ଏକା ଥିବା ସମୟରେ ନିଜ ସମ୍ପର୍କୀୟ ପୁତୁରା ରଞ୍ଜା ଦେହୁରୀ ତାଙ୍କ ଘରକୁ ଆସିଥିଲା । ତେବେ ସେଠାରେ ଉଭୟଙ୍କ  ମଧ୍ୟରେ  କୌଣସି କଥାକୁ ନେଇ କଥା କଟାକଟି ହୋଇଥିଲା । ଏଥିରେ ଉତକ୍ଷିପ୍ତ ହୋଇ ରଞ୍ଜା ନିଜ ପିଇସି, ପୁଟୁକିକୁ ତଳେ ପକାଇ ତଣ୍ଟି ଚିପି ହତ୍ୟା କରିଥିଲା । ପୁଟୁକି ନିସ୍ତେଜ ହୋଇଯିବା ପରେ ରଞ୍ଜା ମୃତ ପୁଟୁକିର ମୃତଦେହକୁ ଘରର ଏକ କୋଣ ରେ ରଖି ଦେଇଥିଲା । ଶୁକ୍ରବାର ରଞ୍ଜା ପାଲଲହଡା ଥାନାରେ ପହଞ୍ଚି ସମସ୍ତ କଥା କହିବା ସହ ରାଗରେ ସେ ନିଜ ସମ୍ପର୍କୀୟ ଅପାକୁ ହତ୍ୟା କରିଥିବା ସ୍ୱୀକାର କରିଥିଲା । ଅନ୍ୟପଟେ ମୃତ ପୁଟୁକି ଦେହୁରୀଙ୍କ ସ୍ୱାମୀ ଆକୁଳ ଦେହୁରୀ ଅନୁଗୁଳର କୌଣସି ସ୍ଥାନରେ ଶ୍ରମିକ ଭାବେ କାର୍ଯ୍ୟ କରୁଥିବାରୁ ସେ ଏ ବିଷୟ ରେ ଶୁକ୍ରବାର ଖବର ପାଇବା ପରେ ଏ ଘଟଣା ସମ୍ପର୍କରେ ପାଲଲହଡା ଥାନାରେ ଲିଖିତ ଅଭିଯୋଗ କରିଥିଲେ । ପରେ ଥାନା ଅଧିକାରୀ କିଶୋର କୁମାର ସାମଲ ଏକ ଟିମ ଗଠନ କରି ଉକ୍ତ ଗାଁରେ ପହଞ୍ଚି ତଦନ୍ତ ଆରମ୍ଭ କରିଥିବା ବେଳେ ମୃତ ଦେହକୁ ଜବତ କରି ବ୍ୟବଛେଦ ପାଇଁ ପୁଲିସ ପଠାଇଛି । ଅନ୍ୟପଟେ ପାରିବାରିକ କଳହ ପାଇଁ ଏହି ହତ୍ୟାକାଣ୍ଡ ହୋଇଥାଇ ପରେ ବୋଲି ପୁଲିସ ଅନୁମାନ କରୁଥିବାବେଳେ ଏ ଘଟଣାରେ ଏକ ମାମଲା ରୁଜୁ କରି  ଅଭିଯୁକ୍ତ ପୁତୁରା ରଞ୍ଜାକୁ ଅଟକ ରଖି ଅଧିକ ତଦନ୍ତ ଚଳାଇଥିବା ଥାନା ଅଧିକାରୀ କିଶୋର କୁମାର ସାମଲ କହିଛନ୍ତି  ।