ପାଲଲହଡା – ଅନୁଗୁଳ ଜିଲ୍ଲା ପାଲଲହଡାର ବିଧାୟକ ଅଶୋକ ମହାନ୍ତି ମିଛ କହୁଛନ୍ତି । ଟଙ୍କାଟିଏ ନ ଦେଇ କୋଟିଏ ଟଙ୍କା ଦେଇଥିବା ମିଥ୍ୟା ତଥ୍ୟ ଦେଉଛନ୍ତି ବୋଲି ଅଭିଯୋଗ କରିଛନ୍ତି ପାଲଲହଡାର ପୂର୍ବତନ ବିଧାୟକ ମୁକେଶ ପାଳ । ଆଜି ଏକ ସାମ୍ବାଦିକ ସମ୍ମିଳନୀ ଡକାଇ ଗଣମାଧ୍ୟମକୁ ଏଭଳି ପ୍ରତିକ୍ରିୟା ସେ ଦେଇଛନ୍ତି ।
ଅନୁଗୁଳ ଜିଲ୍ଲାର ଦ୍ଵିତୀୟ ଚିଲିକାରେ ଟୁରିଜିମ ପାଇଁ ବିଭିନ୍ନ ପ୍ରକାର ବ୍ୟବସ୍ଥା କରାଯାଇ ଗତ ୩୧ ତାରିଖରେ ଏହାକୁ ଉଦଘାଟନ କରା ଯାଇଥିଲା । ଏହାର ଉଦଘାଟନ ବେଳେ ବିଧାୟକ ଅଶୋକ ମହାନ୍ତି ଏହି ଟୁରିଜିମ ପାଇଁ ବର୍ତ୍ତମାନର ସରକାର ଏକ କୋଟି ଟଙ୍କା ଦେଇଥିବା କହିଥିଲେ । ଯାହାକି ସଂପୂର୍ଣ୍ଣ ମିଥ୍ୟା ବୋଲି ଅଭିଯୋଗ ଆଣିଛନ୍ତି ପୂର୍ବତନ ବିଧାୟକ ମୁକେଶ ପାଳ । ତାଙ୍କ କହିବା କଥା ଏହି ଟୁରିଜିମ କ୍ଷେତ୍ରର ଉନ୍ନତି ପାଇଁ ପୂର୍ବ ସରକାର ଅନୁଦାନ ଦେଇଥିବା ବେଳେ ସେ ନିଜେ , ସେତେବେଳର ମୁଖ୍ୟ ସଚେତକଙ୍କ ସହ ଏହି ପ୍ରକଳ୍ପର ଶୁଭାରମ୍ଭ କରିଥିଲେ । ତେବେ ବନ ବିଭାଗର ଜାଗାରେ ଏହି କାମ ହେଉଥିବା ଯୋଗୁଁ କାମରେ ବିଳମ୍ବ ହୋଇଥିଲା । ପରବର୍ତ୍ତୀ ସମୟରେ ଜିଲ୍ଲାପାଳଙ୍କ ହସ୍ତକ୍ଷେପ ପରେ କାମର ଅଗ୍ରଗତି ହୋଇଥିଲା । ଏଥିରେ ବର୍ତ୍ତମାନ ସରକାର ଟଙ୍କାଟିଏ ମହୀ ଅନୁଦାନ ଦେଇ ନଥିବା ସେ କହିବା ସହ ବର୍ତ୍ତ୍ମାନର ବିଧାୟକ ମିଛ କହି ଲୋକଙ୍କୁ ଭୁଆଁ ବୁଲାଇବାକୁ ଚେଷ୍ଟା କରୁଥିବା ଅଭିଯୋଗ ଆଣିଛନ୍ତି । ଯଦି ବିଧାୟକ ଅଶୋକ ମହାନ୍ତି ଟଙ୍କା ଅନୁଦାନ ଦେଇଛନ୍ତି ତେବେ ପାଲଲହଡାବାସୀଙ୍କ ସମ୍ମୁଖରେ କେଉଁ ବିଭାଗରୁ କେତେ ଟଙ୍କା ଦେଇଛନ୍ତି ତାହାର ତଥ୍ୟ ରଖନ୍ତୁ ବୋଲି ସେ ଦାବି କରିଛନ୍ତି । ଏହାସହ ଏଭଳି ମିଥ୍ୟା ତଥ୍ୟ ଲୋକଙ୍କ ଆଗରେ ରଖିଥିବାରୁ ବିଧାୟକ କ୍ଷମା ମାଗନ୍ତୁ ବୋଲି ମୁକେଶ ପାଳ ଦାବି କରିଛନ୍ତି ।
