ଅନୁଗୁଳ – ଜିଲ୍ଲାରେ କୋଇଲା ଖଣି ଚାଲିଲେ ଅନୁଗୁଳ ଜିଲ୍ଲାର ଆର୍ଥିକ ପରିବର୍ତ୍ତନରେ ମୂଳଦୁଆ ପଡିବ ଏବଂ ଅନୁଗୁଳ ଉନ୍ନତିର ସୋପାନ ଦେଖିବା ବୋଲି ଆଶା କରା ଯାଉଥିଲା । ହେଲେ ଉପଯୁକ୍ତ କ୍ଷତିପୂରଣ, ଥଇଥାନ ଏବଂ ନିଯୁକ୍ତି କୁ ଆଖ୍ ବୁଜି ବଳପୂର୍ବକ କୋଇଲା ଖଣି ଚାଲୁ କରିବା ନେଇ କ୍ଷତିଗ୍ରସ୍ଥ ତଥା ବିସ୍ଥାପିତଙ୍କର ଦୁଃଖର ସୀମା ବଢି ଯାଇଛି । ପୁରୁଷାନୁକ୍ରମେ ବଞ୍ଚିବାର ସାହାରା ଥିବା ଭିଟାମାଟିରୁ ସେମାନେ ବହିଷ୍କୃତ ହେଉଛନ୍ତି । ଅଥଚ ସରକାରୀ ଆଇନ କାନୁନକୁ ଭିଡି ମୋଡ଼ି କମ୍ପାନୀକୁ ସୁହାଇବା ପରି ସୁଖଦ ପନ୍ଥା ଅନୁକରଣ ଯୋଗୁଁ ଆଜି ଜମିହରା ତଥା ବିସ୍ଥାପିତ ନିରୀହ ଶହ ଶହ ପରିବାରର ଅବସ୍ଥା ହା ହା କାରମୟ ହେଉଛି ବୋଲି ଅଭିଯୋଗ ଆଣିଛି ଖଣି ଓ ଶିଳ୍ପ ପ୍ରଭାବିତ ଜନମଞ୍ଚ ।
ମଞ୍ଚର କହିବା କଥା ଛେଣ୍ଡିପଦା ତହସିଲ ଅନ୍ତର୍ଗତ ନାଣ୍ଡିଛୋଡ (ଗୋପୀବଲଭପୁର), ଧୋବାମଳିଆ ତଥା ରାଇଝରଣ ରାଜସ୍ବ ଗ୍ରାମରେ ନାଲକୋ କମ୍ପାନୀ ତାର ଉତ୍କଳ -ଇ ଏବଂ ଡି କୋଇଲା ଖଣି ହାତେଇଛି । ବିଗତ ଦୁଇ ବର୍ଷ ହେଲା ଡି ବ୍ଲକରେ କୋଇଲା ଖଣି ଚାଲୁ କରିଅଛି । ହେଲେ ଯେଉଁ ମାନଙ୍କ ଜମି ଓ ଭିଟାମାଟି ଉପରେ ଡି ବ୍ଲକ କୋଇଲା ଖଣି ଗଢି ଉଠିଛି ସେହି କ୍ଷତିଗ୍ରସ୍ଥ ଜମିହରାଙ୍କ କ୍ଷତିପୂରଣ, ଥଇଥାନ ଓ ନିଯୁକ୍ତି କ୍ଷେତ୍ରରେ ଟାଳ ଟୁଳ ନୀତି ଅବଲମ୍ବନ କରିବାରୁ ପୁଲିସ ପ୍ରଶାସନ ସହାୟତାରେ ବଳପୂର୍ବକ ଖଣି ଚଳାଇଛନ୍ତି । ନାର୍ଯ୍ୟଦାବି ଏବଂ ଥଇଥାନ ପାଇଁ ସ୍ଵର ଉତ୍ତୋଳନ କରିବାର ଫଳ ସ୍ବରୂପ ଏକାଧକ ଜମିହରାଙ୍କ ନାମରେ ମିଥ୍ୟା ମୋକଦମା ଦାୟର ହୋଇଛି । କେତେକ ଜମିହରା ଜେଲ ଦଣ୍ଡ ମଧ୍ୟ ଭୋଗିଛନ୍ତି । ଠିକ ସେହିପରି ନାଣ୍ଡିଛୋଡ ଗ୍ରାମର ୨୮୦ ଅନୁସୂଚିତ ଜାତି ସମ୍ପ୍ରଦାୟଙ୍କୁ ଥଇଥାନ ନକରି, ଅତି ସନ୍ନିକଟ ଉତ୍କଳ ଡି ବ୍ଲକରେ ଅନବରତ ଅନାଧିକାର ବ୍ଲାଷ୍ଟିଙ୍ଗ, ଖୋଲା ଟ୍ରକ ଯୋଗେ ଗ୍ରାମ ରାସ୍ତାରେ କୋଇଲା ପରିବହନ ନେଇ ଉତ୍କଟ ପ୍ରଦୂଷଣ, ଗ୍ରାମ ପଞ୍ଚାୟତ ରାସ୍ତାକୁ ବଳପୂର୍ବକ ଅବରୋଧ କରିବା ସହ ପାତର ଅନ୍ତର ନୀତି ଆପଣେଇ ସାମାଜିକ ଗ୍ରାମ୍ୟ ଜୀବନରେ ବିଶୃଙ୍ଖଳା ଜନିତ ସମସ୍ୟା ନେଇ ଗ୍ରାମବାସୀ ଓଡିଶା ମାନବାଧିକାର କମିଶନଙ୍କ ଦ୍ବାରସ୍ଥ ହୋଇଛନ୍ତି । ପୁଲିସ ପ୍ରଶାସନର ଅବାଂଛିତ ଏବଂ ମାତ୍ରାଧିକ କାର୍ଯ୍ୟ ବିରୁଦ୍ଧରେ କେଶ ନମ୍ବର ୧୧୨୨/୨୦୨୩ ଉପରେ ନାଲକୋ କର୍ତ୍ତୃପକ୍ଷଙ୍କୁ ଉପଯୁକ୍ତ ଥଇଥାନ ପ୍ରକ୍ରିୟା ସମାପ୍ତ କରିବା ପାଇଁ ମାନବାଧିକାର କମିଶନ ତାଙ୍କର ଅନ୍ତରୀଣ ଆଦେଶ ତାରିଖ ୦୫.୧୨.୨୦୨୪ ରେ ପ୍ରଦାନ କରିଛନ୍ତି । ତଥାପି ନାଲକୋ କର୍ତ୍ତୃପକ୍ଷ କୌଣସି ପଦକ୍ଷେପ ଗ୍ରହଣ କରୁନାହାନ୍ତି । ଅନ୍ୟ ପକ୍ଷରେ କୋଇଲା ଖଣି ଚାଲୁରଖୁବା ସହିତ ପ୍ରତିଦିନ ହଜାର ହଜାର ଖୋଲା ଟ୍ରକ ଯୋଗେ ଗ୍ରାମ ରାସ୍ତାରେ କୋଇଲା ପରିବହନ ନେଇ ଗ୍ରାମବାସୀ ଉତ୍କଟ ପ୍ରଦୂଷଣରେ ଛଟପଟ ହେଉଛନ୍ତି । ଠିକ ସେହିପରି ଉପଯୁକ୍ତ ଥଇଥାନ ଏବଂ ଆବଶ୍ୟକ ନିଯୁକ୍ତିକୁ ନେଇ ଅନ୍ୟ ଏକ କେସ ନମ୍ବର ୪୮୦/୭୦୨୪ ର ଶୁଣାଣି କରି ମାନ୍ୟବର ମାନବାଧିକାର କମିଶନ ଏକ ମଧ୍ୟବର୍ଗିକାଳୀନ ଆଦେଶ ତାରିଖ ୦୪.୦୨.୨୦୨୫ ପ୍ରଦାନ କରିବା ପୂର୍ବକ ଥଇଥାନ ସମ୍ପର୍କିତ ବିଷଦ କାର୍ଯ୍ୟକାରୀ ଯୋଜନା କମିଶନଙ୍କ ପାଖରେ ପ୍ରଦାନ କରିବାପାଇଁ ଆଦେଶ ଦେଇଛନ୍ତି ।
ପ୍ରକାଶ ଥାଉକି ଜମିହରାଙ୍କ ଚାକିରୀ, ଥଇଥାନ ଓ ପୁନର୍ବାସ ପାଇଁ ସରକାରଙ୍କର ସ୍ପଷ୍ଟ ନୀତି ଥିବା ସଙ୍ଗେ କମ୍ପାନୀ କର୍ତ୍ତୃପକ୍ଷ ତଥା ଜିଲ୍ଲା ପ୍ରଶାସନ ବିଭିନ୍ନ ସମୟରେ ଟାଳ ଟୁଳ ନୀତି ଅବଲମ୍ବନ କରୁଛନ୍ତି । ଓଡିଶା ମାନବାଧିକାର କମିଶନ ତଥା ମାନ୍ୟବର କୋର୍ଟଙ୍କ ମଧ୍ୟବର୍ତ୍ତୀ କାଳୀନ ଆଦେଶକୁ ବିଭିନ୍ନ ଆଳରେ ଗଡ଼ାଇ ଚାଲିଛନ୍ତି । ପ୍ରଶାସନ ଓ ପୋଲିସ କମ୍ପାନୀର କୋଇଲା ଖଣି ଚାଲୁ ରଖିବାପାଇଁ ଯେତିକି ତତ୍ପରତା ପ୍ରକାଶ କରୁଛନ୍ତି ଜମିହରାଙ୍କ ନର୍ଯ୍ୟା ଦାବୀ ପ୍ରତି ସେତିକି ଉଦାସୀନତା ଦେଖାଉଛନ୍ତି ।
ଏହାର ପ୍ରତିବାଦରେ ଆଜି କ୍ଷତିଗ୍ରସ୍ଥ ଗ୍ରାମ ମାନଙ୍କର ତଥା ନାଣ୍ଡିଛୋଡ (ଗୋପୀବଲ୍ଲଭପୁର), ଧୋବାମଳିଆ ଓ ରାଇଝରଣ କ୍ଷତିଗ୍ରସ୍ଥ ଗ୍ରାମବାସୀମାନେ ବରିଷ୍ଠ ରାଜନେତ୍ରୀ, ଇଂ ସୁସ୍ମିତା ବେହେରା ତଥା ସ୍ଥାନୀୟ ସମାଜସେବୀ ଶ୍ରୀ ସତମ ପଟ୍ଟନାୟକଙ୍କ ନେତୃତ୍ୱରେ ଏକ ସାମ୍ବାଦିକ ସମ୍ମିଳନୀ କରି ପ୍ରକାଶ କରିଛନ୍ତି ଯେ ଆସନ୍ତା ୧୫ ଦିନ ମଧ୍ୟରେ ଜମିହରାଙ୍କ ନାର୍ଯ୍ୟଦାବି ଉପରେ ଜିଲ୍ଲା ପ୍ରଶାସନ ବିହିତ ପଦକ୍ଷେପ ଗ୍ରହଣ ନକଲେ ବାଧ୍ୟ ହୋଇ ସେମାନେ ଅର୍ଥନୈତିକ ଅବରୋଧ ପନ୍ଥା ଆପଣେଇବାକୁ ବାଧ୍ୟ ହେବେ । ଯେଉଁଥିପାଇଁ ଉଭୟ ନାଲକୋ କର୍ତ୍ତୃପକ୍ଷ ଏବଂ ଜିଲ୍ଲା ପ୍ରଶାସନ ଦାୟୀ ରହିବେ ।
