ଅନୁଗୁଳ – ଚାକିରି ଦେବା ନାଁରେ ଠକେଇ କରିଥିବା ବାପ-ପୁଅଙ୍କ ଚେର ଲମ୍ବା ରହିଛି । ଏହି ରାକେଟରେ ବାପ-ପୁଅଙ୍କ ବ୍ୟତୀତ ଆହୁରି ଅନେକ ଲୋକଙ୍କ ସମ୍ପୃକ୍ତି ଥିବା ପୁଲିସ ଜାଣିବାକୁ ପାଇଛି । ଘଟଣାରେ ପୁଣି ଦୁଇଜଣଙ୍କୁ ପୁଲିସ ଗିରଫ କରିଛି । ଆଉ ଏହି ଠକ ରାକେଟର ଟାର୍ଗେଟରେ ଛାତ୍ର ଛାତ୍ରୀ ରହୁଥିବା ବେଳେ କେବଳ ଯେ ଜିଲ୍ଲା କି ରାଜ୍ୟ ଭିତରର ନୁହେଁ ବଂର ରାଜ୍ୟ ବାହାରର ଅନେକ ଛାତ୍ରଛାତ୍ରୀଙ୍କୁ ଏଭଳି ଠକେଇ କରିଥିବା ପୁଲିସ କହିଛି । ସୂଚନା ଅନୁସାରେ ଅନୁଗୁଳ ଜିଲ୍ଲା ବେଣାଗାଡିଆ ଗାଁର ଦାମୋଦର ଜେନା ନାମକ ଜଣେ ବ୍ୟକ୍ତି ଥାନାରେ ଅଭିଯୋଗ କରିଥିଲେ ଯେ ଗତ ପ୍ରାୟ ୨ ବର୍ଷ ୧୦ ମାସ ପୂର୍ବରୁ ଅନୁଗୁଳ ସହର ଶିମିଳିପଡା ମିଲନ ଭିଲ୍ଲାରେ ରହୁଥିବା ଘନଶ୍ୟାମ ମିଶ୍ର ନାମକ ଜଣେ ବ୍ୟକ୍ତି ଦାମୋଦରଙ୍କ ପୁଅକୁ ଜାମସେଦପୁର ଟାଟାରେ ନିଯୁକ୍ତି କରାଇ ଦେବେ ବୋଲି କହିଥିଲେ । ଆଉ ଏହି ବାବଦରେ ଘନଶ୍ୟାମ ତାଙ୍କଠାରୁ ୪ ଲକ୍ଷ ୫୦ ହଜାର ଟଙ୍କା ନେଇଥିଲେ । ହେଲେ ଏହା ଭିତରେ ଅନେକ ଦିନ ବିତି ଯାଇଥିଲେ ମଧ୍ୟ ଦାମୋଦରଙ୍କ ପୁଅକୁ ଘନଶ୍ୟାମ ମିଶ୍ର ଚାକିରି ଦେବାରେ ବିଫଳ ହୋଇଥିଲେ । ଚାକିରି କରାଇଦେବା ପାଇଁ ଟଙ୍କା ନେବା ସମୟରେ ଟାଟା ରେ ନିୟୋଜିତ କରିବାରେ ବିଫଳ ହେଲେ ପୁରା ରାଶି ଫେରସ୍ତ କରିବାକୁ ଘନଶ୍ୟାମ ମିଶ୍ର ପ୍ରତିଶୃତି ଦେଇଥିଲେ । କିନ୍ତୁ ଚାକିରି ନ ପାଇବା ପରେ ଦାମୋଦର ଯେତେବେଳେ ତାଙ୍କ ଟଙ୍କା ଫେରସ୍ତ କରିବାକୁ କହିଥିଲେ, ଘନଶ୍ୟାମ ମିଶ୍ର ୨୦୨୦ ମସିହା ନଭେମ୍ବର ମାସରେ ୪୦ ହଜାର , ଡିସେମ୍ବର ମାସରେ ୨୦ ହଜାର ଓ ୨୦୨୧ ମସିହା ଜାନୁଆରୀ ମାସରେ ୨୦ ହଜାର ଟଙ୍କା ଫେରସ୍ତ କରିବା ପରେ ଆଉ ଟଙ୍କା ଫେରାଇବାର ନାଁ ନେଉ ନଥିଲେ । ବାକି  ଟଙ୍କା ଦାମୋଦରଙ୍କ ପତ୍ନୀ ଡଲି ରାଣୀ ଜେନା , ଘନଶ୍ୟାମ ମିଶ୍ରଙ୍କ ବାସଭବନକୁ ଯାଇ ବାକି ରାଶି ଫେରସ୍ତ କରିବାକୁ କହିଥିଲେ । କିନ୍ତୁ ଘନଶ୍ୟାମ ମିଶ୍ର ସେମାନଙ୍କୁ ଅଶ୍ଳୀଳ ଭାଷାରେ ଦୁର୍ବ୍ୟବହାର କରିଥିଲେ, ଧମକ ଦେଇଥିଲେ ଏବଂ ଏକ କାଠ ପଟା ଧରି ଆକ୍ରମଣ କରିବାକୁ ଗୋଡ଼ାଇଥିଲେ । ଏ ନେଇ ଦାମୋଦର ଥାନାରେ ଲିଖିତ ଅଭିଯୋଗ କରିବା ପରେ ପୁଲିସ ତଦନ୍ତ ଆରମ୍ଭ କରିଥିଲା । ଆଉ ଘଟଣାରେ ସମ୍ପୃକ୍ତ ବାପା ଘନଶ୍ୟାମ ମିଶ୍ର ଏବଂ ପୁଅ ଶୋଭନ ମିଶ୍ରଙ୍କୁ ଫେବୃୟାରି ୨୨ ତାରିଖରେ ଗିରଫ କରିଥିଲା । ଆଉ ତଦନ୍ତ ବେଳେ ବାପ-ପୁଅ ଏଭଳି ଏକ ଠକେଇ ରାକେଟ ଚଳାଇଥିବା ଜାଣିବାକୁ ପାଇ ତଦନ୍ତ ଆଗକୁ ବଢାଇଥିଲା । ଆଉ ଠକେଇ ରାକେଟରେ ସମ୍ପୃକ୍ତ ଆଉ ୨ ଜଣଙ୍କୁ ପୁଣି ପୁଲିସ ଗିରଫ କରିଛି । ଗିରଫ ଅଭିଯୁକ୍ତ ଦ୍ବୟ ହେଲେ, ନାଲକୋ ଥାନା ଇଲାକା କୁଲାଡ ଗ୍ରାମର ଶାନ୍ତନୁ କୁମାର ବାରିକ ଓ ଅନୁଗୁଳ ଥାନା ଶିମିଳିପଡାର ବିକାଶ ରଞ୍ଜନ ନାଏକ । ପୁଲିସ ସେମାନଙ୍କ ନିକଟରୁ ମୋବାଇଲ୍ , ଲାପଟପ୍ ଓ ବହୁ ନକଲି ନିଯୁକ୍ତି ପତ୍ର ଜବତ କରିଛି । ଜବତ ଲାପଟପରେ ଅଭିଯୁକ୍ତ ଠକିଥିବା ଯୁବକମାନଙ୍କ ସମସ୍ତ ତଥ୍ୟ ରହିଥିବା ଜଣାପଡିଛି ।