ତାଳଚେର – କୋଭିଡ କଟକଣା ନ ମାନିବା ମନ୍ଦିର ପୂଜକଙ୍କୁ ମହଙ୍ଗା ପଡିଛି । ମନ୍ଦିରରେ ଭିଡ଼ କରିବା ଯୋଗୁଁ ୪ ପୂଜକଙ୍କୁ ଥାନାରେ ଅଟକ ରଖିଲା ପୁଲିସ । ଏଭଳି ଘଟଣା ଘଟିଛି ଅନୁଗୁଳ ଜିଲ୍ଲା ତାଳଚେର ହାଟତୋଟା ଠାରେ । ଆଜି ମଙ୍ଗଳା ଓଷା ଥିବା ଯୋଗୁଁ ହାଟତୋଟା ମନ୍ଦିରରେ ବ୍ୟାପକ ଭିଡ଼ ଜମିଥିଲା । ଲୋକ କୋଭିଡ କଟକଣାକୁ ବେଖାତିର କରି ମନ୍ଦିରରେ ପୂଜା କରିଥିଲେ । ଜିଲ୍ଲାରେ କରୋନା ବୃଦ୍ଧି ପାଉଥିବା ଯୋଗୁଁ ଜିଲ୍ଲା ପ୍ରଶାସନ ଦେବାଳୟରେ ଭିଡ ନ କରି କୋଭିଡ କଟକଣା ମାନି ପୂଜାପାଠ କରିବାକୁ ପୂର୍ବରୁ ନିର୍ଦେଶ ଦେଇଛି । ତେବେ ଏହି ନିର୍ଦେଶକୁ ଫୁ କରି ବ୍ୟାପକ ଭିଡ ଲାଗିଥିଲା । ଖବର ପାଇ ତାଳଚେର ପୁଲିସ ଘଟଣା ସ୍ଥଳରେ ପହଞ୍ଚି ଲୋକଙ୍କୁ ଘଉଡ଼ାଇ ଥିଲା । ତେବେ ନିୟମ ଉଲ୍ଲଘଂନ କରିଥିବା ଯୋଗୁଁ ମନ୍ଦିରର ୪ ଜଣ ପୂଜକଙ୍କୁ ପୁଲିସ ଅଟକ ରଖିଥିଲା । ପରେ ସେମାନଙ୍କୁ ତାଗିଦ କରି ଛାଡି ଦେଇଥିବା ଜଣା ପଡିଛି ।
Advertisement
