ଅନୁଗୁଳ – ଅନୁଗୁଳ ଜିଲ୍ଲା ତାଳଚେର ପୁଲିସର ଏନକାଉଣ୍ଟର । ଏନକାଉଣ୍ଟରରେ ଦୁର୍ଦାନ୍ତ ଅପରାଧୀ ସୁଶାନ୍ତ ନାୟକ @ ଝାମୁ ଗୁରୁତର ହୋଇ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଛି । ସୂଚନା ଅନୁସାରେ ଝାମୁ ନାମରେ ଅନୁଗୁଳ ସମେତ ତିନି ଚାରୋଟି ଜିଲ୍ଲାରେ ଲୁଟ , ରାହାଯାନୀ ଭଳି ମାମଲା ରହିଛି । ଅନୁଗୁଳ ଜିଲ୍ଲାର ପାଲଲହଡା ଥାନାରେ ୧ ଟି , ଜରପଡା ଥାନାରେ ୪ ଟି , ଅନୁଗୁଳ ଥାନାରେ ୮ ଟି , ତାଳଚେର ଥାନାରେ ୩ ଟି , ସମଲ ଥାନାରେ ୨ ଟି , ଖମାର ଥାନାରେ ୧ ଟି , ନାଲକୋନଗର ଥାନାରେ ୧ଟି , ନିଶା ଶିଳ୍ପାଞ୍ଚଳ ଥାନାରେ ୨ଟି ମାମଲା ରହିଥିବା ବେଳେ ଢେଙ୍କାନାଳ ଜିଲ୍ଲା କଙ୍କଡାହାଡ , ହିନ୍ଦୋଳ ଆଦି ଥାନାରେ ମଧ୍ୟ ଡକାୟତି , ଧମକ , ମାରଣାସ୍ତ୍ର ଦେଖାଇ ଧମକ , ଚୋରି ଭଳି ଅପରାଧରେ ସୁଶାନ୍ତ ନାୟକ @ ଝାମୁର ସମ୍ପୃକ୍ତି ରହିଛି । ଏପରିକି ବିଭିନ୍ନ କୋର୍ଟରୁ ତା ନାମରେ ୮ ଟି ୱାରେଣ୍ଟ ମଧ୍ୟ ଅଛି । ଏଥିପାଇଁ ଅନୁଗୁଳ ପୁଲିସର ମୋଷ୍ଟ ୱାଣ୍ଟେଡ ତାଲିକାରେ ସୁଶାନ୍ତ ନାୟକ @ ଝାମୁ ରହିଥିଲା । ଅନେକ ଥର ତାକୁ ଧରିବାକୁ ପୁଲିସ ଚେଷ୍ଟା ମଧ୍ୟ କରିଥିଲା । ହେଲେ କୌଶଳତାର ସହ ସୁଶାନ୍ତ ନାୟକ @ ଝାମୁ ଖସି ଯାଇଥିଲା । ଗତକାଲି ରାତିରେ ସେ ତାଳବେଡା ଜଙ୍ଗଲରେ ଥିବା ଖବର ପାଇ ତାଳଚେର ପୁଲିସ ଓ ସ୍ପେସିଆଲ ସ୍କ୍ବାର୍ଡ ପହଞ୍ଚିଥିଲା । ତେବେ ସେଠାରେ ପହଂଚିବା ପରେ ଝାମୁ ପୁଲିସକୁ ଦେଖି ପୁଲିସ ଉପରକୁ ପ୍ରଥମେ ୨ ରାଉଣ୍ଡ ଗୁଳି ଚଳାଇଥିଲା । ହେଲେ ପୁଲିସ ବ୍ଲାଙ୍କ ଫାୟାର କରି ତାକୁ ସରେଣ୍ଡର ପାଇଁ କହିଥିଲା । ହେଲେ ଝାମୁ ପୁଣି ଆଉ ଏକ ରାଉଣ୍ଡ ଗୁଳି ଚଳାଇଵା ଯୋଗୁଁ ପୁଲିସ ବାଧ୍ୟ ହୋଇ ତା ଉପରକୁ ଗୁଳି ଚଳାଇଥିଲା । ତା ବାଆଁ ଗୋଡ଼ରେ ଗୁଳି ବାଜି ସେ ପଡିଯିବା ପରେ ପୁଲିସ ତାକୁ କାବୁ କରିବାକୁ ଚେଷ୍ଟା କରିଥିଲା । ହେଲେ ସେଠାରେ ଥିବା ପ୍ରଫୁଲ ନାୟକ ନାମକ ଆଉ ଜଣେ ଅପରାଧୀ ଏକ କାତି ସାହାଯ୍ୟରେ ପୁଲିସକୁ ଆକ୍ରମଣ କରିବାକୁ ଚେଷ୍ଟା କରିଥିଲା । ହେଲେ ପୁଲିସ ତାକୁ ମଧ୍ୟ କାବୁ କରି ନେଉଥିଲା । ସେମାନଙ୍କ ନିକଟରୁ ଦୁଇଟି ମୋଟର ସାଇକେଲ , ବନ୍ଧୁକ , କାତି ଆଦି ଜବତ କରା ଯାଇଛି । ଝାମୁ ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହେଉଥିଲା । ହେଲେ ଅବସ୍ଥାରେ ସୁଧାର ନ ହେବାରୁ ତାକୁ କଟକ ସ୍ଥାନାନ୍ତର କରା ଯାଇଛି ।
