ଅନୁଗୁଳ – ଅନୁଗୁଳ ଜିଲ୍ଲା ବନ ଖଣ୍ଡ ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ୩ ଜଣ ଯୁବକ ଆମରଣ ଅନଶନରେ ବସିଛନ୍ତି । ସେମାନଙ୍କୁ ଚାକିରୀରୁ ବେଆଇନ ଭାବେ ବହିଷ୍କାର କରା ଯାଇଥିବା ସେମାନେ ଅଭିଯୋଗ କରିଛନ୍ତି । ସୂଚନା ଅନୁସାରେ, ତାଳଚେର ରେଞ୍ଜ୍ ସିପୁର ସେକ୍ସନ୍ ରେ ଅଜିତ କୁମାର ସାହୁ ଓ ଅନ୍ୟ ଦୁଇ ଜଣ ଯୁବକ କାର୍ଯ୍ୟ କରୁଥିଲେ । ତେବେ ଦୁଇ ମାସ ହେବ ବିନା କୌଣସି ନୋଟିସରେ ଏମାନଙ୍କୁ ଚାକିରୀରୁ ବହିଷ୍କାର କରି ଦିଆ ଯାଇଥିଲା । ଚାକିରୀରୁ ବହିଷ୍କାର ପଛର କାରଣ ମଧ୍ୟ ସେମାନଙ୍କୁ ଦିଆ ଯାଇ ନଥିଲା । ଉପରିସ୍ଥ ଅଧିକାରୀଙ୍କୁ ଏ ନେଇ ପଚରା ଯାଇଥିଲେ ମଧ୍ୟ କୌଣସି ସୁଫଳ ନ ମିଳିବାରୁ ଆଜି ବାଧ୍ୟ ହୋଇ ଜିଲ୍ଲା ବନ ଖଣ୍ଡ ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖ ଆମରଣ ଅନଶନରେ ବସିବା ସହ ସେମାନଙ୍କୁ ନ୍ୟାୟ ଦେବାକୁ ଦାବି କରିଛନ୍ତି ।