ତାଳଚେର – ଅନୁଗୁଳ ଜିଲ୍ଲା ତାଳଚେର ଅବକାରୀ ବିଭାଗ ହାଜତ ଭିତରେ ଦରମରା ଅବସ୍ଥାରେ ଜଣେ ଯୁବକ ଘଣ୍ଟା ଘଣ୍ଟା ଧରି ପଡ଼ି ରହିଥିବାର ଦେଖିବାକୁ ମିଳିଥିଲା । ତାଙ୍କୁ ଅବକାରୀ ବିଭାଗ ହାଜତ ଭିତରେ ରଖିଥିଲେ ସୁଦ୍ଧା ଆଜି ଦିନ ୨ଟା ସୁଦ୍ଧା ଚିକତ୍ସା ଯୋଗାଇ ନଥିଲା । ଯାହାକୁ ନେଇ ଅସନ୍ତୋଷ ପ[ରକାଶ କରିଛନ୍ତି ଯୁବକଙ୍କ ପରିବାର ଲୋକ । ସୂଚନା ଅନୁସାରେ ଏକ କାରରେ ବିପୁଳ ପରିମାଣର ମଦ ଯାଉଥିବା ଖବର ପାଇ ଅବକାରୀ ବିଭାଗ ଚଢାଉ କରିଥିଲା । ଚଢାଉ ବେଳେ ଏକ କାରରୁ ବିପୁଳ ପରିମାଣର ମଦ ଜବତ ହୋଇଥିଲା । ଏହି ମଦ ଚାଲାଣ କରୁଥିବା ଅଭିଯୋଗରେ ତାଳଚେର ଗୁରୁଜାଙ୍ଗ ଗ୍ରାମର ସାନନ୍ଦ ଦେହୁରୀଙ୍କୁ ଅବକାରୀ ବିଭାଗ ଗିରଫ କରି ହାଜତକୁ ଆଣିଥିଲା । ତେବେ ହାଜତ ଭିତରେ ସାନନ୍ଦ ଆହତ ଥିବା ଦେଖା ଯାଇଥିଲା । ତାଙ୍କ ଅଣ୍ଟା ଓ ହାତରେ ଆଘାତ ଲାଗିଥିବା ଦେଖିବାକୁ ମିଳିଥିଲା । ସେ କିଭଳି ଆହତ ହେଲେ ସେ ନେଇ ଅବକାରୀ ବିଭାଗକୁ ପଚରା ଯିବାରୁ , ସାନନ୍ଦ ଫେରାର ହୋଇ ଯିବାକୁ ଚେଷ୍ଟା କରିବା ବେଳେ ଖସି ପଡି ଆହତ ହୋଇଥିବା ଅବକାରୀ ବିଭାଗ ପକ୍ଷରୁ କୁହା ଯାଇଛି । ତେବେ ଆହତ ଅବସ୍ଥାରେ ସାନନ୍ଦଙ୍କୁ ହାଜତ ଭିତରେ ରକ୍ଷା ଯାଇଥିବା ବେଳେ ବହୁ ସମୟ ଧରି ତାଙ୍କୁ ଚିକିତ୍ସା ଯୋଗାଇ ଦିଆ ଯାଇ ନଥିବା ଅଭିଯୋଗ ହୋଇଛି । ଯେତେ ବଡ ଅପରାଧୀ ହେଉନା କାହିଁକି ତାକୁ ଧରିବା ପରେ , ସେ ଯଦି ଆହତ ହୋଇଛି ତାକୁ ପ୍ରଥମେ ଚିକିତ୍ସା ଯୋଗାଇ ଦେବା ଦାୟିତ୍ଵ ସମ୍ପୃକ୍ତ ବିଭାଗର ରହିଛି । ତେବେ ଜଣେ ମଦ ଚାଲାଣ ଅଭିଯୋଗରେ ଜଣେ ଯୁବକଙ୍କୁ କାହିଁକି ତୁରନ୍ତ ଚିକିତ୍ସା ଯୋଗାଇ ନ ଦେଇ ଘଣ୍ଟା ଘଣ୍ଟା ହାଜତ ଭିତରେ ଆହତ ଅବସ୍ଥାରେ ରଖାଗଲା ତାକୁ ନେଇ ପ୍ରଶ୍ନ ଉଠିଛି । ତେବେ ଏହି ଅଭିଯୋଗକୁ ଖଣ୍ଡନ କରିଛି ଅବକାରୀ ବିଭାଗ । ତାଙ୍କ କହିବା କଥା ଯୁବକ ଜଣକୁ ଧରିବା ଚେଷ୍ଟା କରିବା ବେଳେ ସେ ପଡି ଯାଇଥିଲେ । ତାଙ୍କୁ ସଠିକ ସମୟରେ ଚିକିତ୍ସା ଯୋଗାଇ ଦିଆ ଯାଇଥିଲା ।