ଅନୁଗୁଳ – ଅନୁଗୁଳ ଜିଲ୍ଲା ବଳରାମପ୍ରସାଦ ଠାରେ ବୁଧବାର ଇଏସଆଇ ହସପିଟାଲ ଉଦଘାଟନ ହୋଇଯାଛି । ଏହି ଅବସରରେ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ କେନ୍ଦ୍ରମନ୍ତ୍ରୀ ରାମେଶ୍ୱର ଟେଲି , ରାଜ୍ୟ ଲେବର ଏଣ୍ଡ ଏମ୍ପ୍ଲଇଜ ମନ୍ତ୍ରୀ ଶ୍ରୀକାନ୍ତ ସାହୁ , ଢେଙ୍କାନାଳ ସାଂସଦ ମହେଶ ସାହୁ ଆଦି ମଧ୍ୟ ଉପସ୍ଥିତ ଥିଲେ । ତେବେ ଉଦଘାଟନୀ ସଭାରେ ଢେଙ୍କାନାଳ ସାଂସଦ ମହେଶ ସାହୁଙ୍କ ଭାଷଣ ଶୁଣି ମଞ୍ଚ ଆଗରେ ବସିଥିବା ବୁଦ୍ଧିଜୀବୀ ମାନେ ଫୁସୁରୁଫାସର ହୋଊଥିବା ଦେଖିବାକୁ ମିଳିଥିଲା । କାରଣ ମହେଶ ସାହୁ ତାଙ୍କ ଭାଷଣରେ କେନ୍ଦର୍ମାନ୍ତରୀ ଧର୍ମେନ୍ଦ୍ର ପ୍ରଧାନଙ୍କୁ ପ୍ରଶଂସାରେ ପୋତି ପକେଇଥିବା ବେଳେ ଖୋଦ ତାଙ୍କ ଦଳର ଦୁଇ ଜଣ ନେତାଙ୍କୁ ସମାଲୋଚନା କରିବାକୁ ପଛେଇ ନଥିଲେ । ମହେଶ ସାହୁ ତାଙ୍କ ଭାଷଣରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ରାମେଶ୍ବର ତେଲିଙ୍କୁ ପ୍ରଶଂସା କରିଥିଲେ । ଏହି ଦୁଇ କେନ୍ଦ୍ରମନ୍ତ୍ରୀ ଏ ମାଟି ପାଇଁ ଯାହା କରିଛନ୍ତି ତାକୁ କେହି କହୁ ନାହାନ୍ତି ବୋଲି କହିବା ସହ ତାଙ୍କ ପାଇଁ ଏଠି କ’ଣ କ’ଣ ବିକାଶ ହୋଇଛି ତା’ର ଲାମ୍ବା ଚିଠା ଦେଇଥିଲେ । କେନ୍ଦ୍ରୀୟ ବିଦ୍ୟାଳୟରୁ କୋଟା ବ୍ୟବସ୍ଥା ଉଠାଇବା ଧର୍ମେନ୍ଦ୍ରଙ୍କ ଏକ ଐତିହାସିକ ନିଷ୍ପତ୍ତି । ଏଥିପାଇଁ ତାଙ୍କୁ ଯେତେ ପ୍ରଶଂସା କଲେ ବି କମ୍ ହେବ ବୋଲି ମଧ୍ୟ କହିଥିଲେ । ସାରା ଓଡିଶାର ଅର୍ଦ୍ଧାଧିକ ଲୋକ ତେଲ ଟିକିଏ ପକାଇବା ପାଇଁ ହଇରାଣ ହେଉଥିଲେ । ଢେଙ୍କାନାଳ ଜିଲ୍ଲା ସଦାଶିବପୁରଠାରେ ତେଳ ଡିପୋକୁ ମାନ୍ୟବର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଶୁଭାରମ୍ଭ କରିଥିବା ବେଳେ ଧର୍ମପଦ ଭଳି ଏହାର ମୁଣ୍ଡି ମାରିଥିଲେ ମନ୍ତ୍ରୀ ରାମେଶ୍ଵର ତେଲି । ଏହା ହେବା ଓଡିଶାବାସୀ ତେଲ ପାଇଁ ଆଉ ହଇରାଣ ହେଉନାହାନ୍ତି । ଏବେ ୬୫ କୋଟି ଟଙ୍କା ଖର୍ଚ୍ଚ କରି ଇଏସଆଇସି ଡାକ୍ତରଖାନା କରାଯାଇଛି । ଯେଉଁଥିରେ ରାଜ୍ୟ ସରକାରଙ୍କର ସହଯୋଗ ଥାଇପାରେ କିନ୍ତୁ କେନ୍ଦ୍ର ସରକାର , ଶତ ପ୍ରତିଶତ ନିଜସ୍ବ ଖର୍ଚ୍ଚରେ ଏତେବଡ଼ ଡାକ୍ତରଖାନା କରିଛନ୍ତି । ଜିଲ୍ଲାରେ ନୂଆ କେନ୍ଦ୍ରୀୟ ବିଦ୍ୟାଳୟ ଖୋଲାଯାଇଛି । ଏଥିରୁ ଜିଲ୍ଲାବାସୀ ଉପକୃତ ହେବେ ବୋଲି ମହେଶ କହିଥିଲେ । ମହେଶଙ୍କ ଏମିତି ପ୍ରଶଂସା ଶୁଣି ଅନ୍ୟମାନେ ଚକିତ ହୋଇ ଯାଇଥିଲେ । ଏତିକିରେ ରହି ନ ଯାଇ ମହେଶ ସାହୁ ପରୋକ୍ଷରେ ନିଜ ଦଳର ଦୁଇ ନେତାଙ୍କୁ ସମାଲୋଚନା କରିଥିଲେ । କେନ୍ଦ୍ରମନ୍ତ୍ରୀଙ୍କ ସଭାକୁ ଆସି ନ ଥିବା ଉପବାଚସ୍ପତି ରଜନୀକାନ୍ତ ସିଂହ ଓ ବିଜେଡି ଜିଲ୍ଲା ପରିଷଦ ସଭ୍ୟ ଗୋପାଳ ନାଏକ ଉଦ୍ୟେଶରେ କଟାକ୍ଷ କରି ସେ କହିଥିଲେ ଯେ , ବୋଧ ହୁଏ କରୋନା ଆକ୍ରାନ୍ତ ହୋଇ ଥିବାରୁ ସଭାକୁ ଆସି ପାରି ନାହାନ୍ତି । ଶିକ୍ଷା ଓ ସ୍ବାସ୍ଥ୍ୟସେବା କ୍ଷେତ୍ରରେ ନେଇ ସେ କୌଣସି ପ୍ରୋଟକଲରେ ବିଶ୍ବାସ କରନ୍ତି ନାହିଁ ଏଣୁ ନିଜ ଆଡ଼ୁ ମାଇକ ମାଗି ସେ ଧନ୍ୟବାଦ ଦେଇଛନ୍ତି । ଶିକ୍ଷା ଓ ସ୍ବାସ୍ଥ୍ୟ କ୍ଷେତ୍ରକୁ ଆଦୌ ରାଜନୀତିକରଣ କରିବା ଉଚିତ ନୁହେଁ ବୋଲି କହି ମହେଶ ବକ୍ତବ୍ୟ ସାରିଥିଲେ । ମହେଶ ସାହୁଙ୍କ ଏପରି ବକ୍ତବ୍ୟ ପରେ ବିଭିନ୍ନ ମହଲରେ ଭିନ୍ନ ଭିନ ଆଲୋଚନା ହେଉଛି । ମହେଶ ବିଜେପି ଆଡକୁ ଯିବା ନେଇ ପୂର୍ବରୁ ଚର୍ଚ୍ଚା ହେଉଥିଲା ବେଳେ ଆଜିର ଭାଷଣ ଏହି ଚର୍ଚ୍ଚାରେ ନିଆଁରେ ଘିଅ ଢାଳିଲା ଭଳି ହୋଇଛି ।
https://www.youtube.com/watch?v=fZx5IhMlwzE
Advertisement
