ଅନୁଗୁଳ – ଦୁଇଦିନିଆ ଓଡିଶା ଗସ୍ତରେ ଆସିଥିବା ଅବସରରେ କେନ୍ଦ୍ର କୋଇଲା ଏବଂ ଖଣି ରାଷ୍ଟ୍ରମନ୍ତ୍ରୀ ସତୀଶ ଚନ୍ଦ୍ର ଦୁବେ ଆଜି ଅନୁଗୁଳସ୍ଥିତ ନାଲକୋ ପରିଦର୍ଶନ କରିଥିଲେ । ଅନୁଗୁଳ ନାଲକୋ ଅତିଥି ଭବନରେ ପହଞ୍ଚିବା ପରେ ସେଠାରେ CISF ତରଫରୁ ତାଙ୍କୁ ଗାର୍ଡ ଅଫ ଅନର ଦିଆଯାଇଥିଲା । ଅତିଥି ଭବନରେ ଶ୍ରମିକମାନଙ୍କର କ’ଣ ଅସୁବିଧା ଅଛି, ତାହା ଉପରେ ବିଭିନ୍ନ ଶ୍ରମିକ ସଂଗଠନର ନେତୃବୃନ୍ଦଙ୍କ ସହ ଆଲୋଚନା କରିଥିଲେ । ସ୍ଥାନୀୟ ଲୋକଙ୍କ ସମସ୍ୟା ଉପରେ ‘ନାଲକୋ’ ଧ୍ୟାନ ଦେଉଛି କି ନାହିଁ ସେ ନେଇ ବିଭିନ୍ନ ଲୋକଙ୍କ ସହ ସିଧାସଳଖ ଆଲୋଚନା କରିଥିଲେ । ପରେ ମନ୍ତ୍ରୀ ସ୍ମେଲ୍ଟର ପ୍ଲାଣ୍ଟ ସହ ସିପିପି ପରିଦର୍ଶନ କରିଥିଲେ । ପ୍ଲାଣ୍ଟରେ କାର୍ଯ୍ୟ ସଠିକ ଢ଼ଙ୍ଗରେ ଚାଲୁଥିବା ନେଇ ସନ୍ତୋଷ ବ୍ୟକ୍ତ କରିବା ସହ ଆଗାମୀ ଦିନରେ ନାଲକୋର ସମ୍ପ୍ରସାରଣ ନେଇ ସୂଚନା ଦେଇଥିଲେ । ଏହି ପରିଦର୍ଶନ ସମୟରେ ନାଲକୋ CMD ଏବଂ ଅନୁଗୁଳ ବିଧାୟକ ପ୍ରତାପ ପ୍ରଧାନ ଓ ଛେଣ୍ଡିପଦା ବିଧୟକ ଅଗସ୍ତି ବେହେରା ପ୍ରମୁଖ ଉପସ୍ଥିତ ଥିଲେ । ନାଲକୋ CMD ପ୍ଲାଣ୍ଟର ଉତ୍ପାଦନ କ୍ଷମତା ଦୁଇ ଗୁଣ ବଢ଼ାଯିବା ନେଇ କାର୍ଯ୍ୟ ଚାଲୁଥିବା କହିଥିଲେ ।ଯାହାକୁ ଖୁବଶୀଘ୍ର କାର୍ଯ୍ୟକାରୀ କରାଯିବ ବୋଲି ସେ କହିଛନ୍ତି । ସଂପ୍ରସାରଣ ପାଇଁ ବୋର୍ଡ ଆପୃଭାଲ ମିଳିସାରିଛି । ଜମି ଅଧିଗ୍ରହଣ ହେବା ପରେ ଷ୍ଟାଚୁଟାରୀ କ୍ଲିୟରାନ୍ସ ମିଳିବା ପରେ ଆଉ ୫ ଲକ୍ଷ ଟନ ସ୍ମେଲଟରର କ୍ଷମତା ବଢାଯିବାକୁ ଚେଷ୍ଟା କରାଯିବ ବୋଲି CMD କହିଥିଲେ ।