ପାଲଲହଡ଼ା – ଅନଗୁଳ ଜିଲ୍ଲା ପାଲଲହଡ଼ା ଥାନା ଅନ୍ତର୍ଗତ ଶିଗଡ ଗ୍ରାମରେ ମାତାଲ ସମ୍ପର୍କୀୟ ମାମୁଁର ଛୁରା ମାଡରେ ଭାଣିଜୀ ଗୁରୁତର ହୋଇଥିବା ଜଣା ପଡିଛି । ଗୁରୁତର ଭାଣିଜୀ ଜଣଙ୍କ ସେହି ଗ୍ରାମର ମୋତି ନାୟକଙ୍କୁ ଗୁରୁତର ଅବସ୍ଥାରେ ପାଲଲହଡ଼ା ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରା ଯାଇଛି । ସୂଚନା ଅନୁସାରେ ଶିଗଡ ଗ୍ରାମର ରଞ୍ଜନ ନାଏକ ନାମକ ଯୁବକ ନିଶାସକ୍ତ ଅବସ୍ଥାରେ ଗାଁ ଦାଣ୍ଡରେ ପାଟିତୁଣ୍ଡ କରୁଥିଲେ । ରଞ୍ଜନଙ୍କ ସମ୍ପର୍କୀୟ ଭାଣିଜୀ ମୋତି ନାଏକ ଏହାର ପ୍ରତିବାଦ କରିବାରୁ ଏଥିରେ ଉତକ୍ଷୀପ୍ତ ହୋଇ ପାଖରେ ରଖିଥିବା ଏକ ଛୁରାରେ ମୋତିଙ୍କ ଶରୀରକୁ ଅନେକ ଥର ପ୍ରହାର କରି କ୍ଷତାକ୍ତ କରିଦେଇଥିଲେ । ଗାଁ ଦାଣ୍ଡରେ ଏପରି ବିଭତ୍ସ ଦୃଶ୍ୟ ଦେଖି  ଗ୍ରାମବାସୀ ଭୟଭୀତ ହୋଇ ପୁଲିସକୁ ସୂଚନା ଦେଇଥିଲେ । ଘଟଣା ସ୍ଥଳରେ ପୁଲିସ ପହଞ୍ଚି ଗୁରୁତର ମୋତିଙ୍କୁ ଉଦ୍ଧାର କରି ଉପଖଣ୍ଡ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିବା ସହିତ ରଞ୍ଜନକୁ ଥାନାରେ ଅଟକ ରଖିଛି ।