ଅନୁଗୁଳ – ଅନୁଗୁଳ ସହର ଦେଇ ଯାଇଥିବା ଜାତୀୟ ରାଜପଥ ୫୫ର ରନ୍ତଲେଇଠାରୁ ବଅଁରପାଳ ପର୍ଯ୍ୟନ୍ତ ରାସ୍ତା ଅବସ୍ଥା ଅତ୍ୟନ୍ତ ଶୋଚନୀୟ ହୋଇ ପଡିଛି । ଯାହା ଫଳରେ ଏହି ରାଜପଥ ଉପରେ ଯିବା ଆସିବା କରିବା ଏକ ପ୍ରକାର ଅସମ୍ଭବ ହୋଇ ପଡ଼ିଥିବା ବେଳେ ପ୍ରତ୍ୟେକ ଡିବି ଦୁର୍ଘଟଣାର ଶିକାର ହେଉଛନ୍ତି ଲୋକେ। ଏଥିପାଇଁ ରନ୍ତଲେଇଠାରୁ ବଅଁରପାଳ ପର୍ଯ୍ୟନ୍ତ ରାଜପଥର ମରାମତି ନିତ୍ୟାନ୍ତ ଆବଶ୍ୟକ ଥିବା ବେଳେ ଏହାକୁ ମରାମତି କରିବା ପାଇଁ ଗତ ୧ ତାରିଖରେ ପ୍ରଶାସନ ପକ୍ଷରୁ ରନ୍ତଲେଇ ଏବଂ ବଅଁରପାଳ ଠାରେ ନୋ ଏଣ୍ଟ୍ରି ଲାଗୁ କରା ଯାଇଥିଲା। ସକାଳ ୯ ଟାରୁ ସନ୍ଧ୍ୟା ୮ ଟା ପର୍ଯ୍ୟନ୍ତ ଏହି ରାସ୍ତାରେ ଭାରିଯାନ ଚଳାଚଳ ନିଷେଧ କରାଯାଇଥିଲା । ତେବେ ଏହି ୧୫ ଦିନରେ ରାସ୍ତା ମରାମତି କାମ ବିଶେଷ ଭାବେ ଆଗେଇ ପାରିନାହିଁ । ଏହାକୁ ଆଖି ଆଗରେ ରଖି ଜିଲ୍ଲାପାଳ ଅବ୍ଦାଲ୍ ମ.ଅଖତାର୍ ଆଉ ଏକ ମାସ ନୋ ଏଣ୍ଟ୍ରି ଅବଧିକୁ ବୃଦ୍ଧି କରିଛନ୍ତି । ପୂର୍ବ ନିୟମ ଲାଗୁ ରହିବା ବେଳେ ଥାନା ଅଧିକାରୀ ମାନେ ଏହା ଉପରେ ଦୃଷ୍ଟି ଦେବାକୁ ନିର୍ଦେଶ ଦିଆ ଯାଇଛି ।