ଅନୁଗୁଳ – ରବିବାର ମଧ୍ୟ ଅନୁଗୁଳ ଜିଲ୍ଲାର ୫ ଜଣଙ୍କ କରୋନାରେ ମୃତ୍ୟୁ ହୋଇଥିବା ନେଇ ରାଜ୍ୟ ସ୍ବାସ୍ଥ୍ୟ ଏବଂ ପରିବାର କଲ୍ୟାଣ ବିଭାଗ ତରଫରୁ ସୂଚନା ଦିଆଯାଇଛି । ସୂଚନା ଯୋଗ୍ୟ ଯେ, ବୁଧବାର ଠାରୁ ଅନୁଗୁଳ ଜିଲ୍ଲାରୁ ଦୈନିକ ୫ଜଣଙ୍କ ମୃତ୍ୟୁ ହେଉଛି । ମୃତ୍ୟୁରେ ଅନୁଗୁଳ ଜିଲ୍ଲା ଏବେ ରାଜ୍ୟରେ ଏକ ନମ୍ବର ରହୁଛି । କାରଣ ଅନ୍ୟ ଜିଲ୍ଲା ଗୁଡ଼ିକ ଅପେକ୍ଷା ଅନୁଗୁଳ ଜିଲାରୁ ସର୍ବାଧିକ କରୋନା ଆକ୍ରାନ୍ତଙ୍କ ମୃତ୍ୟୁ ହେଉଛି । ଏପରିକି ଭୁବନେଶ୍ବର, ସୁନ୍ଦରଗଡ଼, କଳାହାଣ୍ଡି, କେନ୍ଦ୍ରାପଡ଼ା ଏବଂ ଝାରସୁଗୁଡ଼ା ଭଳି ଜିଲାକୁ ମଧ୍ୟ ପଛରେ ପକାଇ ଦେଇଛି ଅନୁଗୁଳ ଜିଲ୍ଲା । ଅନ୍ୟ ଜିଲ୍ଲା ତୁଳନାରେ ଅନୁଗୁଳରେ ମୃତକଙ୍କ ସଂଖ୍ୟା ଯଥେଷ୍ଟ ଅଧିକ ରହୁଛି । କେବଳ ଏତିକି ନୁହଁ, ଅନୁଗୁଳ ଜିଲ୍ଲାରେ ମୋଟ ମୃତକଙ୍କ ସଂଖ୍ୟା ୧୦୦ ପାର୍‌ ହୋଇଛି । ରବିବାର ସୁଦ୍ଧା ଜିଲାରେ ମୋଟ ମୃତକଙ୍କ ସଂଖ୍ୟା ୧୦୪ରେ ପହଞ୍ଚି ଯାଇଛି । ରାଜ୍ୟରେ ମୋଟ ମୃତକଙ୍କ ମଧ୍ୟରୁ ଅନୁଗୁଳର ପରିମାଣ ହେଉଛି ୩.୮୨ପ୍ରତିଶତ । ସୂଚନା ଯୋଗ୍ୟ ଯେ, ୨୫ ତାରିଖରେ ଜିଲ୍ଲାରେ ୪ ଜଣଙ୍କ ମୃତ୍ୟୁ ହୋଇଥିବା ବେଳେ ଏହା ପରଠୁ ଦୈନିକ ୫ ଜଣଙ୍କ ମୃତ୍ୟୁ ହେଉଛି । ମେ’ ୭ ତାରିଖ ବେଳକୁ ଜିଲ୍ଲାରେ ମାତ୍ର ୩୮ ଜଣଙ୍କ ମୃତ୍ୟୁ ହୋଇଥିଲା । କିନ୍ତୁ ଏବେ ମାତ୍ର ୨୩ ଦିନରେ ୬୬ ଜଣଙ୍କ ମୃତ୍ୟୁ ହେଲାଣି ।