ଅନୁଗୁଳ – ଦାମୀ ଗାଡ଼ିରେ ଗଞ୍ଜେଇ ରଖି ଟ୍ରେନ୍ ଯୋଗେ ବାହାରକୁ ଚାଲାଣ କରିବାକୁ ଚାହିଁ ରହି ଥିବା ବେଳେ କାବୁ କରିନେଲା ପୁଲିସ । ଆଉ ସେହି ଦାମୀ ଗାଡିରୁ ୧୨ କିଲୋ ଓଜନର ଗଞ୍ଜଇ ଜବତ କରିବା ସହ ଚୋରା କାରବାରରେ ସମ୍ପୃକ୍ତ ଜଣେ ବେପାରୀକୁ ଗିରଫ କରାଯାଇଛି । ଗିରଫ ଅଭିଯୁକ୍ତ ଜଣଙ୍କ ହେଲେ ଅନୁଗୁଳ ଥାନା ଗୋପୀନାଥପୁର ଗ୍ରାମର ମୁନା ଖିଲାର ବୋଲି ଜଣା ପଡିଛି । ସୂଚନା ଅନୁସାରେ , ରବିବାର ଭୋରରୁ ରାଣୀଗୋଡ଼ା ରେଲୱେ ଷ୍ଟେସନ୍ ନିକଟ ପମ୍ପ ହାଉସ୍ ପଡ଼ିଆରେ ଏକ ଦାମୀ ଗାଡ଼ି ( ଡିଏନ୍୦୯ଡି ୧୬୧୫ ) ଛିଡ଼ା ହୋଇଥିଲା । ଏଥିରେ ଗଞ୍ଜେଇ ଥିବା ପୁଲିସକୁ ସୂଚନା ମିଳିଥିଲା । ଖବର ପାଇ ଅନୁଗୁଳ ଥାନା ଅଧିକାରୀ ରମେଶ ଚନ୍ଦ୍ର ବିଶୋୟୀଙ୍କ ନିର୍ଦ୍ଦେଶରେ ଏସ୍‌ଆଇ ପ୍ରଶାନ୍ତ ପ୍ରଧାନ , ଏଏସ୍‌ଆଇ ପ୍ରଶାନ୍ତ ସାହୁ , ଏଏସ୍‌ଆଇ ଜୟଚନ୍ଦ୍ର ସାହୁଙ୍କ ନେତୃତ୍ବରେ ଚଢ଼ାଉ କରାଯାଇ ଦାମୀ ଗାଡ଼ିକୁ ଘେରି ଯିବା ସହ ଯାଞ୍ଚ କରିଥିଲେ । ଚଢାଉ ବେଳେ ପଛ ସିଟ୍‌ରୁ ୧୨ କିଲୋ ୨୦୦ ଗ୍ରାମର ଗଞ୍ଜଇ ଜବତ କରା ଯାଇଥିଲା । ତେବେ ଯାଞ୍ଚ ବେଳେ ଘଟଣା ସ୍ଥଳରୁ ଚମ୍ପଟ ମାରିବାକୁ ଉଦ୍ୟମ କରିବା ବେଳେ ପୁଲିସ ମୁନାକୁ କାବୁ କରି ନେଇଥିଲା । ରବିବାର ସନ୍ଧ୍ୟାରେ ଅଭିଯୁକ୍ତକୁ କୋର୍ଟଚାଲାଣ କରାଯାଇଥିବା ଜଣାପଡ଼ିଥିବା ବେଳେ ତା ନିକଟରୁ ପୁଲିସ୍ ନଗଦ ୧୦ ହଜାର ଟଙ୍କା ମଧ୍ୟ ଜବତ କରିଥିବା ଜଣାପଡ଼ିଛି ।