ଅନୁଗୁଳ – ଅନୁଗୁଳ ଜିଲ୍ଲାରେ ହାତୀ ଆକ୍ରମଣରେ ଚାରି ଜଣଙ୍କର ମୃତ୍ୟୁ ହୋଇଥିଲା । ଏହା ଭିତରୁ ବଅଁରପାଳ ବ୍ଲକ ଅନ୍ତର୍ଗତ ଗଡସନ୍ତ୍ରୀ ପଞ୍ଚାୟତ ଜାମ୍ବୁସାହିରେ ହାତୀ ଆକ୍ରମଣରେ ଅଜୟ ବିଶ୍ୱାଳ ଜଣେ । ଆଜି ଏହି ଘଟଣାକୁ ନେଇ ମୃତକ ଅଜୟଙ୍କ ପରିବାରଙ୍କୁ ପି ସି ସି ସଭାପତି ଶରତ ଚନ୍ଦ୍ର ପଟ୍ଟନାୟକ ଭେଟି ସମବେଦନା ଜଣାଇଛନ୍ତି । ପିସିସି ସଭାପତି ଆଜି ଦିନିକିଆ ଅନୁଗୁଳ ଗସ୍ତରେ ଆସିଥିବା ବେଳେ ବଅଁରପାଳର ଏକ କାର୍ଯ୍ୟକ୍ରମରେ ଯୋଗ ଦେବାକୁ ଆସିଥିଲେ । ଏହି ସମୟରେ ସେ ମୃତକଙ୍କ ପରିବାରକୁ ଭେଟିବା ସହ ପରିବାରବର୍ଗଙ୍କୁ ୨୦ ଲକ୍ଷ ଟଙ୍କା ସହାନୁଭୂତି ରାଶି ପ୍ରଦାନ କରିବା ସହ ପରିବାରର ଜଣଙ୍କୁ ସ୍ଥାୟୀ ନିଯୁକ୍ତି ଦେବାକୁ ଦାବି କରିଥିଲେ । ଏହାସହ କାର୍ଯ୍ୟରେ ଅବହେଳା କରୁଥିବା ବନ ବିଭାଗ କର୍ମଚାରୀଙ୍କ ପ୍ରତି ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ସେ ଦାବି କରିଛନ୍ତି । ଅନ୍ୟମାନଙ୍କ ମଧ୍ୟରେ ତାଙ୍କ ସହ ଜିଲ୍ଲା ସଭାପତି ବିପ୍ଳବ ଜେନା, ବ୍ଲକ୍ ସଭାପତି ବିନୋଦ ମାଝୀ, ସରୋଜ କାନ୍ତ ପଟ୍ଟନାୟକ ଆଦି ଉପସ୍ଥିତ ଥିଲେ । ଅନ୍ୟ ପକ୍ଷରେ ହାତୀ ଆକ୍ରମଣରେ ଚାରି ଜଣ ମୃତ୍ୟୁ ଘଟଣା ପରେ ବନ ବିଭାଗର ଦାୟିତ୍ୱହୀନତାକୁ ଦାୟୀ କରିଛି ବିଜେପି । ବିଜେପି ଜିଲ୍ଲା ସଭାପତି ଡିଲେଶ୍ୱର ପ୍ରଧାନ ପ୍ରତିକ୍ରିୟା ପ୍ରକାଶ କରିବା ସହ ନରହନ୍ତା ହାତୀକୁ କାବୁ କରିବାକୁ ଦାବି କରିଛନ୍ତି । ଏହା ସହ ହାତୀ ଦାଉରୁ ରକ୍ଷା ପାଇବାକୁ ସ୍ଥାୟୀ ପ୍ରତିକାର ଦାବି କରିବା ସହ ସ୍ଥାୟୀ ପ୍ରତିକାର ନ କରାଗଲେ ଆଗାମୀ ଦିନରେ ବିଜେପି ଆନ୍ଦୋଳନକୁ ଓଲ୍ହାଇବ ବୋଲି ଚେତାବନୀ ଦେଇଛନ୍ତି । ଦରକାର ପଡ଼ିଲେ ଅନୁଗୁଳ ବନ୍ଦ ଡାକରା ଦିଆଯିବ ବୋଲି କହିଛନ୍ତି ।
Advertisement
