ଅନୁଗୋଳ – ନିଜକୁ ପୁଲିସ ପରିଚୟ ଦେଇ ଜନସାଧାରଣଙ୍କୁ ଧମକ ଦେଉଥିଲା ଯୁବକ । ସ୍ଥାନୀୟ ଲୋକ ଜାଣି ପାରି ପୁଲିସର ଜିମା ଦେଲେ ଠକକୁ । ଏଭଳି ଘଟଣା ଅନୁଗୋଳ ଜିଲ୍ଲା ବଅଁରପାଳ ଅଞ୍ଚଳରେ ଘଟିଛି । ସୂଚନା ଅନୁସାରେ ବଅଁରପାଳରେ ଜଣେ ଯୁବକ ଗାଡି ଚାଳକ ଓ ଜନସାଧାରଣଙ୍କୁ ନିଜକୁ ପୁଲିସ ଏସ.ଆଇ. ପରିଚୟ ଦେଇ ଧମକ ଦେଉଥିଲା । ଏହି ସମୟରେ ସ୍ଥାନୀୟ ଅଞ୍ଚଳର କିଛି ଯୁବକଙ୍କ ସନ୍ଦେହ ହୋଇଥିଲା । ସନ୍ଦେହ ହେବାରୁ ସ୍ଥାନୀୟ ଲୋକ ଯୁବକଙ୍କୁ ଘେରି ଯାଇ ପରିଚୟପତ୍ର ମାଗିଥିଲେ । ତେବେ ଯୁବକ ଜଣଙ୍କ ପରିଚୟପତ୍ର ଦେଖାଇ ପାରି ନଥିବା ବେଳେ ପୁଲିସ କର୍ମଚାରୀ ନୁହଁ ବୋଲି ମାନି ଯାଇଥିଲେ । ଫଳରେ ସ୍ଥାନୀୟ ଲୋକ ପୁଲିସକୁ ଖବର ଦେବା ପରେ ବଅଁରପାଳ ପୁଲିସ ପହଞ୍ଚି ଯୁବକକୁ ଥାନାକୁ ନେଇଥିଲେ । ତେବେ ପରେ ଯୁବକ ଜଣଙ୍କୁ ଥାନାରେ ଚେତାବନୀ ଦେଇ ଛାଡି ଦେଇଥିବା ଜଣା ପଡ଼ିଛି । ଏ ସମ୍ପର୍କରେ କେହି ଅଭିଯୋଗ ନକରିବାରୁ ପୁଲିସ ଅଭିଯୁକ୍ତର ପରିବାର ଲୋକଙ୍କୁ ଡକାଇ ଥାନାରେ ଏକ ଲିଖିତ ଚୁକ୍ତିନାମା ଦେବା ପରେ ପରିବାରଙ୍କୁ ହସ୍ତାନ୍ତର କରିଛି ।